Medische en technische Middelnederlandse recepten

189. Leuende water sal men dus maken.aant.

Men (fol. 39^v) sal nemen buguum, aloe ende spich ende musscelgaet ende clenum, leticie, violetten ende noten musscaten ende andre gheme<e>ne crude, ende van al desen ghewichte van drien groten tornoisen. Ende makent wel ende dan suldi weghen .ix. weruen also vele bernens waters alse der crude siin ende doet disteleren, hets goet iegen de hoeft suere ende ieghen flu<e>me rueme, jeghen rode plecken int daensichte ende vlammen die op wart slaen, jeghen droeue herte, quade maghe, corsse, aessemen, jeghen worme, festelen, quade gate, stinkenden adem⁽³⁴⁾, jeghen den canker nolime tangere, jeghen quade oghen ende het vergroit de adren van den mensche ende het verquict al de sennen die verstoruen siin (fol. 40^r) ende het veriaghet lopende tfledersiin ende beuinghe van den leden ende het es goet ieghen de tansuere ende gheft langhe leuen ende ghesont.

(34) adem: Het Hs. heeft aden gevolgd door het doorstreepte reo?