Medische en technische Middelnederlandse recepten

77.aant.

¶ Betonie es heet ende droghe. Soe es goet ieghen de hooftzweere die (fol. 14^v) comt van couder naturen. ¶ Men salse drinken ghezoden in aysile alse de hooftzwere vander maghen comt salmense drinken met borne oft in wijn ende drinkent waerm dat zacht de maghe ende sterket. ¶ Betonie ghedrooght ende ghemalen ende ghedronken met loen uerlicht uasten lichame die coud es ende versch. ¶ Tpuluer van betonien helpt ieghen allen onghemake inden lechame ende ieghen tghescuerde. ¶ Betonie ghedronken met loen es goet den ghenen die bloet raecsemen ende etter ende ieghen den oeuste ende corten adem. ¶ Betonie gheten oft ghedronken claert de oghen. Sop van be(fol. 15^r)tonien met sope van weghebreeden ghedronken es goet ieghen den dagheliken corts. ¶ Betonie es goet ieghen den vierden dach ende ieghen melancolie. ¶ Betonie doet wech donkere vaerwe ende gheeilzocht ende droghet twater. ¶ Betonie ghestamt met zoute gheneset nieuwe wonden leit mense daer op. ¶ Betonie helpt orine te makene ende ieghen den steen.