Historie van Malegijs

[p. 339]

Hoe die heidenen Eggermont bevochten ende bestormden, ende hoe si veel schaden hadden vanden kerstenen die seer wter stadt schoten.

DOen den dach aen gecomen was ende die wachter geblasen hadde soo stonden die Turken al bereet om aen die stadt te vallen ende dye te bestormen ende de heren seiden. Ghi vroeme gesellen hebt u vromeliken tegen dese vermaledijde kerstenen in de eere van Mamet ende wie hem vromelijckste heeft int aen vallen vander stadt die salmen geven elc .C. bisanten van goude. Als de heidenen hoorden vanden .C. bisanten van goude so waren si gewillich die kerstenen te bestormen, ende die kersten hadden ooc haer engienen wel gestelt om haer vianden te crencken, ende steenen doen brengen ontrent die mueren om mede te werpen ende veel ander dingen. Buevijn sey. Lieve kinderen hebt elc nu eenen leeuwenmoet om ons vianden te weder staen die aen comen om ons te bevechten. Die heidenen quamen vast aen die grachten vander stadt met groten gedruise ende de kerstenen scoten over seer ende questen veel vanden Turcken so datter veel doot bleef. Die ruesen dreven die heidenen vast aen ende ten lesten wert die ruese Gardifort gescoten door sinen arm. Ende dye ruese Gardimant was aen dander side vander stadt, daer geworpen was met steenen dat hi in onmacht lach so dat men wech droech in zijn tente. Doen dit de heidenen sagen so vloden si achterwaerts ende lieten dat stormen staen. Die heeren vander stadt dat siende waren seer blide ende Buevijn seide. Mijn kinderen danct Gode van hemelricke dat wi door dit bestormen gecomen zijn sonder groot verlies van onsen volcke want en had ons Gods gracie niet bi gestaen wi en hadden die heidenen niet connen wederstaen. Die heidensce coninc Goriant beclaechde die grote scade die hi gehadt had, ende

[p. 340]

dat hi zijn volc verloren had, so seide hi. Dye kerstenen en zijn geen lieden mer het sijn duvels want sy hebben mijnen eenen broeder den arm doorschoten ende mijnen anderen broeder half doot geworpen, ende veel van minen volc verslagen. Doen seide coninc Morgalien. Weest te vreden want ten sal niet lange dueren want si en hebben geen vitalie binnen aldus so moeten si hem op geven oft hem selven door vechten. Doen seide coninc Goriant. Dat is certeyn waer, ende aldus laet ons onse ordinancie stellen oft si onversiens op onsen hals quamen dat wi hem lieden dan mogen verslaen tot onsen wille. Die kersten heren hielden raet ende Buevijn seide. Ghi heren hoe sullen wijt maken, die heydenen sijnder vele ende onsen hoop is cleyn, mer wil ons God bistaen so en hebben wi geen noot. Dye grave van Moncler seide. Wi en hebben geen vitalie meer aldus so moeten wi ons door vechten oft wi sterven alle van honger. De heren seiden. Laet ons avontueren op den troost van Gode ende van sijn gebenedide moeder ende stelden dordinancie, ende reden ter poorten wt ende Galier bleef in die stadt, ende reden so lange dat si quamen daer de coninc Goriant met sijn volc lach ende sijn daer in gevallen met groten gedruisse daer si veel Sarasinen vermoorden. Die coninc waende verwoeden van gramscap ende hi is op geseten te paerde ende hi reet inden hoop ende Buevijn quam hem tegen ende sloegen malcander so vreeslic: mer die coninc die viel hem te stranc ende hi gaf Buevijn eenen slach so groot dat hi doot vanden paerde viel. Aymijn dit siende dat sijn grootheere verslagen was reedt met eenen grammen moede op den coninc Goriant ende sloech so vervaerliken slach dat hi hem dat hooft cloofde totten tanden toe, also dat hy doot vanden paerde viel. Die heidenen ende die ruesen dit siende omcingelden die kerstenen also dat si daer alle verslagen waren

[p. 341]

sonder alleen een ridder die heymelijck ontvloot ende claechdet coninc Karel also ghi horen sult, mer dye stadt en conden si niet winnen om datter veel te veel geschuts was ende si sijn op gebroken: ende een yegelijc ruese reysde na zijn casteel. Die heidenen pilgeerden der kerstenen doden ende doen vonden si Aymijn liggende op sinen groothere hem beclagende, ende daer wert hi gevangen ende voor den ruesen gebracht. Doen si hem sagen so seyden si. Aymijn ghi sijt nu onse ghevangen man wildy uwen god loochenen ende geloven aen onsen Mamet ende wildi ons getrouwe zijn so sullen wi u te lijve laten om dat ghi sijt vanden bloede vanden ouden coninc van Mombrant, ende maken u een machtich coninc in Mombrant. Daer Aymijn op antwoorde ende seyde. Vermaledide honden eer ic dat dede ic sage mi u liever hangen, ende ic waer mi liever deen lidt vanden anderen gesneden oft getogen van strate tot straten eer ic mijnen Here ende God loochenen soude die so minliken ende goedertierlijcken om onser alder sonden wille heeft hem selven so laten dorwonden aen die galge des cruces om ons te brengen in zijn eewich leven ende daer met hem eewelic te leven ende te regneren. Doen de ruesen dit van hem hoorden so hebben si hem swaerliken gevangen geleyt opt roode casteel ende een yegelijc ruese ghinck op een casteel, ende setteden een becken voor tcasteel met eenen brief daer in geschreven stont, so wie daer voorbi passeerde dat hi tol geven moeste van handen ende voeten so voorseyt is.