Historie van Malegijs

Hoe dye coninc van Mombrant seynde eenen bode aen den hertoghe Buevijn.

DOen die bode den brief ontfangen had, so is die bode gereist te Eggermont: ende is gegaen voor den hertoge,

[p. 338]

ende heeft hem den brief gegeven. Doen Buevijn van Eggermont den brief open gedaen had so stont daer in gescreven. Weet Buevijn dat wi ontbieden dat ghy coemt in u lijnwaet in dien ghi u lijf onthouden wilt met u hulpers ende begeert gracie. Voort so hebdy als een verrader ons lieden verradeliken verlaget ende doot geslagen, ende hebt ons artelrije ende bussen dieflicken int stadt gebracht daer ghi ons beteringe afdoen moet te weten u stede ons leveren in onsen handen om onsen wille daer mede te doen ende ooc so suldi uwen god versaken ende gelooven aen onsen Mamet, so sullen wy u gratie doen. Doen Buevijn van desen brief verstant had so seide hi. Ghi heren wat antwoort willen wy weder om seinden. Aymijn antwoorde ende seide. Ontbiet hem lieden dat wi op hem niet en passen ende dat wi van geen dreygen vervaert en zijn ende als noot is so sullen wi ooc ons beste doen. Dit dochte al den heren goet ende si bevalen den bode dat hi seggen soude tgeen dat Aymijn geseit had. Die bode is ter poorten wt gereist, ende is na dat sarasinsce heyr gereyst. Doen die heren den bode sagen so hebben si hem willecome geheten vragende wat antwoort die kerstenen gegeven hadden ende oft si in handen wilden comen. Daer op dye bode antwoorde ende seyde. Si en sijn noch so van sinne niet, mer si ontbieden u dat ghi sout comen halen u bussen ende u artelrije ende verlost den ammirael Iorabin die daer gevangen leyt, ende als ghi dat gedaen hebt so sullen si sien wat si doen oft laten sullen mer haren god en willen si niet loochenen. Doen die heren dit hoorden so waren si seer verstoort ende overdroegen dat si de stadt des anderen dages souden bestormen.