Historie van Malegijs

Hoe dat die ridder die gevloden was quam aen coninc Karel, ende claechde dat dye kerstenen verslagen waren, ende wat wrake coninck karel daer over dede.

DOen die ridder wten heyr ghevloden was so is hi so lange gheghaen dat hy te Parijs binnen quam ende hi

[p. 342]

is gegaen in des conincx pallays, ende heeft hem vriendelijck gegruet seggende. Heer keyser ende coninc die almogende God bewaer u ende al u vrienden van alle ongerieve, ende wilt u verootmoedigen te hooren mijn deerlic clagen. Die coninc dit horende verschricte hem seer, ende vraechde watter te doen was. Die ridder seyde. Heer coninc ic moet u clagen dat ongeval datter bi Eggermont gesciet is. Die heydenen sijn over gecomen ende hebben Rootsefluer gewonnen, ende Buevijn van Eggermont ende den grave van Moncler met Gautier van Lyons verslagen met noch wel vijftich dusent kerstenen, ende ick ben daer met groter avontueren wt ghecomen. Die coninc dit hoorende versuchtede seer ende seide. O almogende God sijn daer alle dese edelinghen ghebleven dat moet u geclaget sijn, segt mi doch waer Malegijs was dat hi met sijnder consten daer niet tegen en viel. Die ridder seide. Heer coninc hi is pelgrimagie gereyst tot sint Iacobs te Compostellen also dat hi daer niet af en weet. Doen seyde coninc Karel, is Malegijs wten lande so sal ic daer selve reysen met al mijnder macht. Daer op die ridder antwoorde ende seyde. Heer coninc ic bid u door die passie ons heren dat ghi daer selve reist, ende helpt keeren den overlast die die heydenen daer doen. Daer sijn drie broeders Gardimant, Gardifort ende Morgalien gheheeten, ende tsijn drie de stercste ruesen diemen vinden mach, ende een yegelijc heeft daer doen maken een sterc casteel dat onwinlijc is, ende daer si dye lieden mede persequeren, ende si hebben daer voor een iegelic casteel in spite van dijnre conincliker maiesteyt eenen tol in gesedt, also dat die gene die daer voorby passeren moeten van haer lichaem tol geven, ende Aymijn leyt op een van die drye casteelen gevangen ende ic sorge dat si hem dooden sullen. Daer op die coninc seide. Heet ic Kaerle die grote ic salse vervolgen ende verdrijven,

[p. 343]

ende hi geboot alle sijn heren datse hem gereet maeken souden. Ende coninc Kaerle seinde terstont na die casteelen Namals van Bavier, Ridtsaert van Normandien, Ingelram van Gaschoengien, Reynier van Geneven met haren volcke. Ter wijlen dat si reysende waren so had die ruese Gardifort eenen iongelinc gevangen die na coninc Karel soude reysen, ende hi sneet hem die nose af. Dese vier heren zijn aen die casteelen gecomen ende hebben de ruesen te campe gheeyscht, die welcke terstont beneden quamen. Namals van Bavier vacht tegen Morgalin, Ridsaert ende Ingelram vochten beyde teghen Gardifort ende Reynier van Geneven vacht tegen Gardimant. Dese drie campen duerden lange tijt, al waren die ruesen seer sterc si hadden daer genoech te doen, ende si gaven malcanderen menigen swaren slach eer si malcanderen verwinnen consten. Ten lesten werden die kersten heren te cranc ende die ruesen namense gevangen ende brachtense gevangen daer Aymijn gevangen lach ende si staken der heren scilden buiten den casteel. Binnen desen tijt so quam die iongelinck geloopen tot coninc Karel die daer bereit stont met sinen volcke, ende hi seyde hoe den ruese sinen nose met zijn hant af gesneden hadde ende dat de heren gevangen waren. Als dit coninc Karel hoorde so was hi seer bedruct, ende mettien so quam daer Roelant, Olivier, Ogier ende den iongen Spiet ende si waren bereet om metten coninc te reysen na die casteelen toe om Aymijn te verlossen, aldus reysden si met grooter heyrcracht nae den casteel toe. Coninc Karel quam aen die valleye daer hi die casteelen sach staen ende hi sach die wapenen hangen van verre aen die casteelen van die gheen diese gevangen hadden. Roelant, Olivier ende Spiet seiden tot den coninc. Heer coninc wi willen gaen becampen dese felle gasten dye hier den toren bewachten, twelc de coninc consenteerde. Aldus

[p. 344]

sijn dese drie heren ten drie casteelen gegaen, ende Olivier riep aen dat roode casteel ende sloech met sinen messe opt becken daer den brief in stont, ende hi eyschte Gardifort te campe, ende Roelant sloech opt becken vanden witten casteele, ende hi eyschte Gardimant te campe ende Spiet sloech opt becken vanden swarten casteele ende eyschte Morgalien te campe, ende Morgalien ghecte met Spiet om dat hi so clein was ende hiet hem weder om lopen pap tetene. Als Spiet dit hoorde seide hi. Her ruese al ben ic cleine ic en sal u niet ontloopen ende ic sal u hert ghenoech vallen. Als Morgalien dit hoorde so is hi van den casteele gegaen ende ter wijlen nam Spiet dien rinc (die hi van sinen vader behouden hadde) ende daer mede was hi onsienlijc. Doen de ruese beneden was so en sach hi Spiet niet, ende Spiet nam sijn colve ende sloech Morgalien so langhe tot dat hi ter aerden viel, ende doen tooch hi den rinc vander hant. Doen dye ruese Spiet sach seyde hi. Ghi toovenaer ghi hebt mi betoovert ende ick salt u noch vergelden met mijnder ghijsarmen. Doen stac Spiet sinen rinc weder aen zijn hant en sloech hem metter metalen colve dat hi en hoorde noch en sach ende hi nam des ruesen mes ende sloech hem den hals af ende bracht coninc Karel, dies hi hem seer bedancte. Olivier vacht teghen den ruese Gardifort, ende na veel vechtens so sloech Olivier van onder beyde zijn handen af ende sloech hem den hals voor af, ende hi ginc in den casteel ende ontsloot de ghevanghenen ende versloech die heydenen die opt casteel waren. Roelant ende Gardimant vochten langhe tegen malcander ende ten lesten sloech Roelant den ruese een grote wonde in sinen hals also dat hi neder ter aerden viel ende doen stac hem Roelant voort die kele af. Coninck Karel, Ogier ende die ander heren dit siende quamen aengereden ende hebben al die heidenen verslagen. Doen gaf

[p. 345]

coninc Karel Aymijn beyde die casteelen met die steden ter tijt toe dat Malegijs weder quam. Ende coninck Karel is met sijn heeren ghereyst nae Parijs danckende God almachtich vander victorien die hy hem verleent hadde.