Den lust-hof van Rethorica

Waer inne verhael ghedaen wordt, vande beschrijvinghen ende t’samen-comsten der Hollantscher Cameren vanden Reden-rijckers, binnen Leyden gheschiedt, den 26 Mey, des Iaers 1596. ende de volgende daghen, met het gene aldaer ghedaen, ende verhandelt is

[p. 145]

Liedeken,

Op de wijse: Hoort ghy Dochters gracieuse, &c.

Alle die hier in weelden leeft,
Tot Charitate wilt u pooghen,
Ghedenckt den ghever, diet al geeft,
Dats onsen Godt, niet om verhooghen:
Hy stelt u claer dit woort voor ooghen,
Wie hier geeft den Armen, leent zijnen Godt,
Diet can vergelden met dat hoochste lodt.

Dus vrienden volght der Liefden aert,

En wilt den Armen goet bewijsen:
Troost die bedroeft zijn en beswaert,
Schenckt vry die dorst, en wilt oock spijsen
Die daer hongert: Soo sal u prijsen
Godt, wiens genade altijdt open staet,
Voor die in noot den Armen compt te baet.

Hebt ghy ter werelt goedt of schat,

Wilt u herte daer niet aenhangen:
Maer helpt die crancke leden mat,
Die besocht zijn in zwaer verstrangen:
Oft mit crancksinnicheyt bevangen,
En oock die zijn met Gods ghifte begaeft,
Soo hebt ghy Christum met u goet gelaeft.

[p. 146]

 

Als ghy dus uyt der Liefden vloet,

 

Ghebruyckt u goet, voor groot en cleene,

 

Weet dat ghijt niet den menschen doet,

 

Maer Christus selve int ghemeene,

 

Die u duer zijn goedtheyt alleene,

 

Dit hier seer rijckelick vergelden sal:

 

Maer inde Hemelen noch boven al.

 

 

 

Prince.

 

Princelicke Princieren ghy,

 

Daer Liefd' is t'fondament vol eeren,

 

Die in reynder manieren vry

 

Soo volghen naer dat Woordt des Heeren,

 

Vrueght sal door dueght in haer vermeeren:

 

Ia huer licht sal lichten voor elcx aenschijn,

 

Die hier soo In Liefden groeyende zijn.

In Liefden Groyende.

L. D. Boos.