laten gaen op haer gelove. ende datmen u trantsoen sonde. ic salt u sweeren bi uwen god ende den mijnen. dat ict u sal doen hebben binnen. X. daghen oft eer. Als die heren dat hoorden so seide etsijtes. ortsa demofoen door die trouwe die ghi my deedt in armenien myn landt blijf ic u borge. Heyndric ende alle die heeren waren wel te vreden. ende demofoen swoer daer op sinen god ende der kerstenen god dat hi etsijtes quijten soude Doen waren hem die drie gevanghen ghedaen dat hijse met hem nemen soude also hi dede. ende si namen orlof aen de heren ende vrouwen. ende si streken onder hem viven ter poorten wt. Die kersten heeren deden ghereetschap maken om den coninc van capadocien te doopen. dat seer costeliken ghedaen was. ende hi was ghenoemt constant nae constantinobele. daer was groot genoechte bedreven. Die coninc evac was sijn peteren. ende die coninc lodewijc ende heyndric Sijn peten waren ysonia ende zelyadone die alle verblijt waren dat sulcke twee machtighe coninghen kersten waren gheworden. ende bedreven alderhande genoechten. Demofoen amynijus sijn ghecomen metten coninghen int heyr. Die soudaen ende die ander heren hebbense vernomen ende hietense willecome. ende si vraechden hem hoe si ghevaren hadden. ende hoe si wt quamen ende waer dander bleven. Die coninc van lubien seide. dat sal u broeder wel verclaren hoe dat ons rantsoen ghestelt is. ende wat wi doen moeten. Die soudaen seyde broeder demofoen segt op. laet horen hoe hebdijt ghemaect dat ghi hebt vercreghen dese prijsonieren wten prijsone. Demofoen seide broeder daer moeten si ghenoch voor doen. want elc moet gheven binnen. X. dagen drie mijlioen gouts. drie witte valcken. XIJ. witte genetten VI. dromedarijsen. ende hier heb ic voor ghesworen als man van trouwen. dat te senden binnen. X. daghen ende voort en moghen si teghen dese heren niet meer steken. dit ist verbont. Die soudaen waende dul te werden dat hem die kerstenen desen schimpe ende smaet deden Mer dies niet te min men sandt
om die valcken. ende om die genetten. ende dromedarijsen. ende men vergaderde dat gout. ende die drye coninghen reysden selve daer omme toe huys. ende als si te huys quamen so sonden si dat goudt int heyr aen demofoen valcken genetten dromedarijsen also si belooft hadden Die soudaen en speet niet so seer tgout noch dander ghiften. en dede dat si hem niet helpen en mochten. mer haer lieden volc bleef bi den soudaen. ende hi ghinc ordineren omme der griecxschen princen strijt ende velt te leveren. Terwijlen dat si dit aldus ordineerden so was heyndric van lymborch brugom ghemaect van eresebia die keyserinne die hi trouwede met grooter eeren ende weerden in sinte soffijen kercke ende al daer so was hi in die kercke gecroont gheweldich keyser van griecken ende van constantinobelen Die bisschopen van den lande die brochten hem sinen keyserliken schilt aen den hals. Die coninc lodewijc van vrancrijc gorde hem sijn keyserlijc sweert aen sijnder siden. ende tract wter scheede ende gaft hem in die hant ende hi seyde. hoort keyserlic pijlaer. so dat sweert snijt aen beyde siden. so suldy scherpe iusticie doen over die mesdadighe. ende bevrijen dat kersten ghelove. ende weder staen die sarasijnsche honden. Etsijtes die coninc van armenien hinc hem omme sinen keyserliken mantele tot eenen teeken dat hy tdecsel was vant gheheel landt. ende sinen mantele openen soude ende daer mede bedecken die wet van kerstenrijcke. Die grave van athenen etsijtes vader spien hem sijn vergulden sporen aen. die welcke beteekenen wijsen raedt. dats dat hi met sijn ouders altoos te rade gaen soude. ende alle dinck wijsseliken versinnen eer hi yet bestaen soude. Evac die coninc van arragoen die brachte hem die keyserlike crone die die bisschopen namen. ende si steldense heyndric van lymborch op sijn hooft. als diese verdient hadde mit feyten van wapenen ende seiden. her keyser so die crone u hooft verchiert so sidy schuldich te verschieren cloosters ende kercken. want ghi nu een pijlaer sijt der
heyligen kercken. ende een scherm schilt voort kersten ghelove Ende alle dese poenten die u verhaelt sijn suldy sweeren hier op desen ewangelyboec. dat ghy dat houwen sult ende voldoen als een keiser van eeren Heyndric van lymborch seyde. al dat ghene dat ghi mi verhaelt
Auteursrecht onbekend