Volksboek van Margarieta van Lymborch (1516)

Hoe heyndric /etsijtes/ lodewijc dese drie bereet waren om den camp te vechtene. ende hoe si die heeren ende vrouwen deden ter mueren ligghen om aen te siene die triumphe vanden campe.

Dat. XCVIIJ. capittel.

ALS hem den dach verbaerde so was heyndric van lymborch in die were. ende etsijtes die coninc derghelike. ende die coninc van vrancrijc lodewijc. elc was bereet om sijn partye te wederstane. Si baden die heeren ende die vrouwen dat si ter mueren gaen souden ende aensien dat ghevecht. ende dyt deden die kersten princen om dat si te badt souden ghemoet sijn int schouwen der liefster ligghende ter mueren. Aldus ghinghen si nae die poorte toe. ende namen orlof aen die heeren ende vrouwen. ende traden ter poorten wt. gemoet sijnde als leeuwen. Die drie coninghen waren ooc versien. ende si namen orlof aen den soudaen van babilonien. ende si ginghen ten crijte waert. Die soudaen met sinen broeder demofoen die quamen achter met haren edelen om te siene hoe den camp vergaen soude. het perck was ghestelt in drie plaetsen. dat waren drie percken. ende elc perc hadde vier crijtwaerders. twee vanden kerstenen. ende twee van den heydenen. dat waren vier aen elcken hoec eenen staende met een half lance in die hant. Als dese. VI. heren aldus aen quamen van elcke side drie. die kersten heren ghinghen elc bi sonder int perc. heyndric int ierste perck. etsijtes int tweeste perc. ende die coninc lodewijc int derde perc. Die coninc van lubien ginc tegen heyndric van lymborch Die coninc van capadocien ghinc tegen etsijtes. Die coninc van lubra teghen den coninc lodewijc. Doen dese heren aldus in crijt waren. die crijtwaerders gaven elc een gelike haetsi. daer si ierst souden mede beghinnen. dat was haer ierste wapene. Heyndric van limborch ghinc sinen man vroliken toe. dat een lust was diet aen sach. si speelden beide meesterlic metter haetsen. mer heyndric was des conincx van lubien meester. want heyndric sloech hem sijn haetse wter hant. so datse die crijtwaerders schieden. ende si gaven ele een sweert in die hant van eender lenegden. daer sloeghen si op malcanderen me nighen swaren slach. so dat een lust was diet aen sach. Ten eynde so sloech heyndric den coninck dat hi stont ende duselde. dat hem docht den hemel op sinen hals vallen Heyndric die sach sijn lief ter mueren ligghen so vele te meer curagien hadde hi teghen sinen viant. si gaven malcanderen menighen swaren slach. ten eynden brocht heyndric met sinen sweerde den coninc eenen so swaren slach dat hi viel in onmacht. ende heyndric souden doot gheslaghen hebben. mer die crijtwaerders schooten daer tusschen. Die twee kersten crytwaerders namen den coninc op als ghevanghen man. daer hi wel mede te vreden was. ende heyndric beval dat si hem presenteren souden des keysers dochter sijn lief. Die twee crijtwaerders ghinghen ende deden dat hem bevolen was Als eresebia dat sach datmen haer presenteerde den coninc van lubien was si seer blijde. ende si dede den coninc bi haer ter mueren comen om dat hi sien soude hoe dander twee souden varen. heyndric bleef noch daer buyten op tvelt Als die twee voldaen hadden. so ghinc etsijtes ende die coninc van capadocien te wercke. elc aen veerde die haetse nae costume. si sloeghen op malcanderen dattet tvier wt dat harnas spranc. Die coninc van capadocien was seer vroom ende met allen cloec. dat etsijtes ghenoch aen hem te doen hadde. mer hi sloech sijn oghen op margrieten van lymborch. so dat hi veel badt ghemoet wert. ende hy gaf den coninc eenen swaren slach dat hi hem den arm ontstucken

[p. 109]

sloech. ende hy viel ter aerden. Die erijtwaerders schoten tusschen hem beyden ende si namen den coninc op. die coninc riep ghenade sijns lijfs. Etsijtes dede hem gracie. ende sandt hem metten twee crijt waerders aen margrieten van limborch als ghevanghen man. Die crijtwaerders deden dat hem belast was ende si brochten den coninc bi margrieten die hem dede leyden in haer camer. om dat hi ghequetst was ende deden vermaken. Die soudaen van babilonien beet sinen breydel ende seide. het is des duvels werc. die kersten princen hebben die victorie. die coninc van capadocien is ooc verwonnen ende wech geleyt in die stadt als ghevanghen man Demofoen seyde. broeder wat seyde ic u ist so niet comen. wacht die coninc van lybra sal ooc so varen ghi sultet sien. Mettien sach demofoen op der mueren daer sijn lief ysonia lach dies hi hem verblijde. ende hy gaf haer een teeken metten hoofde nijgende te haer woert. Ysonia mercktet ende saecht. ende si loech weder op hem. ende etsijtes ende heyndric die stonden bi malcanderen om te sien hoe lodewijc die coninc varen soude teghen den coninc van lybra. die malcanderen vromeliken aen ghinghen metter haetsen dat wel gheduerde een vierendeel van eender uren. so dat si beide haer haetsen ontstucken sloeghen. ende aen veerden die sweerden. daer deen den anderen dapperliken mede touden ende sloeghen dat men sach comen ter aerden dat roode bloet aen beyde siden. Die coninc van lybra bracht eenen swaren slach op den coninc lodewijc. mer die coninc lodewijc ontradt dien slach ende hief sijn mes op. ende sloech den coninc van lybra op sijn hooft dat hi draeyde gelijc eenen top dat hi stont oft hi ghevallen soude hebben. Die coninc baerde sijn edelheyt ende lieten becomen. Doen seide die coninc van lybra ghi moecht wel sijn een vroom coninc. een edel man. want edelheyt hebdy aen mi bewesen. hadt ghi gewilt ghi hadt mi moghen dooden. ende door dat ic mercke u grote ghetrouwicheit ende u grote edelheyt so gheef ic my in uwen handen gevanghen behouden mijn lijf ende goet. Ooc sal ic ter liefden van u dat kersten ghelove aen veerden. ende alle mijn volc doen vertrecken van deser stadt Als dat die coninc lodewijc hoorde wert hi verblijt ende seyde. men sal u dan doopen ende ick sal selve u peteren sijn. Aldus was die coninc ghesonden aen zeliadone des conincx lodewijcx lief. ende haer ghepresenteert als prijsonier ende ghevanghen man. die danckelic van zelyadone ontfanghen was. Demofoen gaf heyndric een teeken als quansuys een groete. so dat die heeren van verre malcanderen aen riepen Die soudaen waende verwoeden dat hi also verloren hadde drie coninghen. ende te voren twee. dyt waren die vive vanden acht coninghen. Ende die twee crijt waerders quamen bi heyndric ende seyden hem. hoe dat die coninc van lybra beloofde kersten te werden. dyes waende hi ontsinnen ende verwoeden van quaetheden. Ter wijlen dat hi aldus tierde so sprac demofoen teghen heyndric ende etsijtes. ende demofoen badt heyndric dat hi hem ysonia seer grueten wilde. si beloofden hem si soudent doen. ende aldus schieden si vanden velde met grooter eeren die drie princen. Die maechden quamen ter poorten ende ontfingense met groter eeren ende weerden. ende leydense alle drie te hove. ende twee verwonnen coninghen mede. Als si te hove waren comen so ghinc mi daer bedriven alle ghenoechte. ende die coninc lodewijc seyde. ortsa ghy heeren ende ghi princen hier is die coninc van lybra die prysonier is. ende heeft gracie ende genade aen mi begeert voort is sijn meninghe ende sinen wille dat hi kersten werden wille ende sijn wet versmaden gheloovende aen iesus christus schepper hemelrijcx ende aertryex gheboren van eender maecht. dit sijn sijn woorden. Doen vraechde heyndric coninc ende heren van lybra is dit u begeeren is dit uwen wille dat ghy wilt kersten werden ende u wet versmaden. Die coninc antwoorde. ghi heeren ghi princen ic bidder omme. ende dat door die edelheyt die mi ghedaen is inden campe. Doen seyden si allen het sal u gheboeren. ende men sal alle dinc doen bereyden in sinte soffijen kercke daermen u doopen sal ende wi drie sullen u peters sijn. margrieta ende eresebia sullen sijn u peten. Die coninc was wel te vreden. ende men informeerden vast int kersten ghelove.