Volksboek van Margarieta van Lymborch (1516)

Hoe die coninch van arabijen wilde hebben sybilla die coninghinne van arragoen. ende hoe hi den coninc van arragoen ontsegghen doet.

Dat. LXXIIIJ. capittel.

ALDUS was etsijtes ende evac in lymborch daer si eerlic ghetracteert waren. ende binnen dier tijt dat si daer waren. so quam over zee die coninc van arabijen. ende hi woude hebben te wive die coninghinne van arragoen. Aldus so nam hi raet met sinen heren ameralen ende soudanen. die welcke seyden tot hem. siet heer coninc waer ic als ghi. ic souder seynden eenen bode ende doen hem die wete. oft hijse u senden wille met ghemake ende willich-

[p. 66]

liken. ofte wi sullen alle sijn landt bederven. ende dien raet dochte den coninc seer goet. ende hi riep sinen bode dat hi tot hem quame. Die bode die quam ende vraechde wat hem beliefde. hi seide bode gaet lopen in die stadt van arragoen. ende segt den coninck dat hy doe nae inhoudt des briefs. ende ist dat hi dat laet so sal ick al sijn landt afbarnen. ende sijn steden ende sloten bederven Die bode nam den brief ende hi seide here ick salt doen: ende hy liep lichtelic nae die hooft stadt van arragoen. daer hi niet verre af en was. ende hi liep so seer tot dat hi quam aen die stadt van arragoen. Als hi in die stadt quam so vraechde hy nae die sale ende pallays vanden coninc Doen wasser een ridder die hem daer leyde totten pallayse. Als hi aent pallays quam. so quam hem die coninc terus van arragoen teghen met sinen state ende met sijnder coninginne. Die bode die viel ter aerden. ende hy gruete den coninc nae sijnder talen. ende hi seide hem van sinen mamet apolijn ternogant ende belloen. Ende voort so vraechde die coninc terus van arragoen van waer dat hi quam ende wat nieuwe mare ende tijdinghe dat hi brochte. ende wat hi begheerde. Die bode seyde ic come van mijnen meester den coninc alant van arabien die u sendet desen brief. ende hi bevelt u dat ghy dinhoudt des briefs volbrengt. op die verboorte uwes lijfs. ende u landt dat hi te nieute doen sal. al dus oversiet den brief watter in staet ende gheeft mi een cort antwoorde wat ghi doen oft laten wilt. Als die coninc desen brief op brack ende las. so vandt hijer in hoe dat die onghelovige hont sijn vijf begeerde. als voor sijn amye oft sijn boel. Ende als sijn wijf die coninghinne dat hoorde was si seer onpacient ende onverduldich ende seyde. ick ware mi vele liever doot dan dat my een hont soude ghenaken. Die heeren ende princen vanden coninc van arragoen seyden. het waer groot iammer ende schade dat dat geboeren soude. dat een hont ghebruycken soude een also schoonen vrouwe. Als die coninc dat hoorde dat die heeren dat seyden so riep hi den bode ende hi seide. bode u meninghe die is wel verstaen ende ooc u conincx begeren. dat hem onghereet is. ende segt dan hont dat ic mijn wijf niet also en wil guijte sijn. Mer ist sijn begheerte om dat hi so heet is. men sal hem senden een souch ende daer mach hy sijn begheerte mede bedriven ende sijn ghenoechte. mer mijn wijf en is so niet te senden. Als dit die bode hoorde doe swoer hy bi mamet ende ontstack met thoorne ende seyde. het sal u allen leedt sijn. want sijn macht die sal u veel te swaer sijn. want hy is u naerder dan ghi meent wel met drie hondert duysent mannen. Aldus oversiet den last die u is nakende. ende ic ontsegghe u van des conincx weghen ten viere ende ten swerde. oft ghi en sendt hem die over schoone sybilla tot eender amyen. Doen seyde die coninck. gaet wech ende draecht dijnen heer dese tydinghe. als dat wi nae hem noch nae die sine niet en vraghen. ende maect u van hier ter poorten wt oft men hanget u aen eenen bast Als dat die bode hoorde maecte hy hem van daer met groter naersticheyt. ende hi liep lancx den weghe nae dat heyr toe daer die heeren waren. die hi vandt staende voor haer tente. die coninck stont alder vorst. ende daer nae sijn ameralen ende sijn soudanen. Die bode groete dan coninc van mamets weghen ende alle sijn heren nae der heydenen costumen ende ghewoenten. Die coninck hiet den bode willecome ende hi vraechde hem wat tijdinghe ende wat antwoorde brenghet ghi my ende hi seyde. sullen si mi die over schone coninghinne sybilla senden also ic hem over ghescreven hebbe. Die bode seide her coninc alant dies en hebben si noch ghenen wille. mer daer is seyt hy een grote souch die ruych ende schorft is. ende wilt ghi die hebben die salmen u senden. Ende om dies wil dat ic u verantwoorde ende voor u spreken dorste. daer om so wouden si mi hanghen aen eenen bast. maer die vrouwe en crijcht ghi alsoo niet. ten si sake dat ghijse haelt fortseliken met crachte ende met ghewelt. maer die souch was seyden si tuwen besten. Doen die coninc dat verstont swoor hi bi alle sijn goden. dat hijse fortseliken halen soude wie dat lief oft leedt waer. ende hy seyde tot sijn ondersaten tsa mijn soudanen ameralen soudaten mameloucken ghi edele barberiensche maeckt u bereet. ic wille voor die stadt

[p. 67]

mijn tenten slaen. ende wreken daer dat gheen dat hi mi ontbiet. soude ic een souch schoffieren tfy den vijleyn. dat sal ghewroken sijn met alle mijnder macht. ende ic sal die arrogoenschen also boosseliken castijen datter hem een ander aen spieghelen sal. Die soudanen ende ameralen die deden laden al haer gygaren ende busschen mit menigerhande instrumenten van orloghe. ende reysden nae dlant van arragoen daer sijt al verbranden ende doot sloeghen Ende darm volc en wist waer loopen. ende quamen in die stadt ende si claechdent den coninc die grote iammerlike fortse ende overdaet die si deden. Die coninc van arragoen dit horende en wist niet hoe dat hijt maken soude die heren rieden hem. dat hi in vrancrije senden soude om troost ende bistant. het welcke dat hi dede. ende sandt sinen bode aen den coninc van vrancrijc. Ende ter wijlen dat dese heydenen laghen voor die stadt. so nam etsijtes ende evac orlof aenden hertoghe van lymborch ende aen sijn vijf hem bedanckende der groter chieren ende der groter triumphen die hem lieden gedaen was Doen si aldus orlof namen so badt die hertoghe ende die hertoginne als si margrieten haer dochter sagen dat si haer doch seer groeten wilden ende ghebieden aen haer. Die ridders seyden si soudent gaerne doen. ende aldus schieden si van daer. ende si reysden nae parijs bi den coninc van vrancrijcke lodewijc. daer si eerlic ende wel ontfanghen waren met groter blijscap Die coninc lodewijc dede hem beyden grote chiere. alsmen costumeliken is in sulcken hoven van eeren. ende also sulcken ionghen princen wel toe behorende is.