Dat. LIIIJ. capittel.
DOEN heyndrick van lymborch langhen tijt tot melanen geweest hadde. onttrent drie ofte vier weken. so peynsde hi. dat hi sijn saken vorderen moste. ende margrieten sijn suster gaen soecken. Ende aldus ghine hi daer europa was ende seyde. schoon bloeme den tijt is hier ic moet vertrecken. ende soecken mijn suster margrieten. die ons ontdoelde inder iacht in die woestijn. ghelijc ic u int lancste wel vertrocken hebbe. Doen dat europa die maecht hoorde. so was si wter maten seer bedruct ende si seyde. o heyndric lief wildy mi ontvaren, ende ghi weet doch wel dat ghi mi seer bedruct laet. want ick bevrucht ben met uwen kinde. suldy mi dan noch ontvaren. Doen seyde heyndrick, o weerde bloeme ghi weet wel. dat mijn vader mi ghesonden hevet om mijn suster margrieten te soecken. ende haer thuys te brenghen. aldus sijt pacientich ende verduldich, ende stellet u herte te vreden. is belove u also gheringhe als ic, mijn suster margarieta ghevonden hebbe. so sal ick bi u comen ende u vertroosten nae mijnder macht Daer was een alten grooten drucke tusschen hem beyden. eer heyndric van haer schiet. ende aldus reet hy sijnder veerden ende lietse alleene. Heyndric rijdende lancx den weghe quam also verre tot dat hi quam int landt van calaberen. Daer die grave van prijsant een verrader was. die die hertoginne van calaberen beteghen hadde. als dat si haer mesdraghen hadde met haren camerlinck. Ende dat was wt haet ende wt nijt. om dat hi sinen wille van haer niet en conste vercrijghen. ende also versierde hi dese scandelike looghene op haer. ende haer camerlinck die wert daer om verbrant. ende dat tot sinen onrechte. Ende die hertoghe van calaberen die woude die hertoghinne ooc doen verbranden tonrechte in die stadt thaboor in calaberen. Heyndric van lymborch die quam ghereden voor die stadt van thaboor. ende hy vant daer staende een ridder claghende. ende metten handen wringhende. Heyndric van lymborch die vraechde den riddere. waer om dat hi claghende was ende waer om dat hi so
truerich stont. Die ridder seide o edel man. ic mach wel seer clagen. ic hebber reden toe. want daer is die hertoghe van calaberen. die wilt morghen verbranden laten sijn wijf die hertoginne. dat iammer ende schade is. Doen vraghede heyndric waer omme. wat heeft si mesdaen. Doen seyde die ridder daer is een verrader. ende heyt die grave van prijsant. ende die heeftse betegen met haren camerlinc. dat si haer mesdraghen heeft. ende daer die camerlinck om verbrant is. die op die doot nam die hi daer dede. dat hi noyt die vrouwe en bekende in oneerbaerheden, ende ic sach hem daer op sterven. Als heyndric dat hoorde seyde hi. ist also gheboert dat is een onrechtverdelike sake. ende seer deerlijc ende onnatuerlic. die hertoge en doet niet wel dat hi sulcken saken doet. ende die verraders ghelooft. ende ist also als ghy daer segt. ic sal die vrouwe can ic brenghen tot haerder groter onschult. iae believet gode van hemelrijcke. Doen seyde die ridder. condt ghi dat gedoen so suldi een werc van caritaten doen ende dese ridder die
Auteursrecht onbekend