Volksboek van Margarieta van Lymborch (1516)

Hoe die verradenisse geschiet was om heyndric van lymborch te dooden. vanden coninc van beemen. ende van den hertoge van loreynen. ende ander heren.

Dat. XLVI. capittel.

DOEN die coninc van beemen die tijdinghe brachte datmen heyndric leveren soude. doen ginghen si ordineren hoe si hem doden souden, die een wilden villen. die ander wilden braden. die derde sieden. ende die vierde wilden hem in cleynen stucken houwen. Aldus ordineerden elc sijn doot. ende dit hoorde arnout ende peynsde. en blijft hi niet doot in die hitte. hi soude hem verlossen ende helpen. also hi ooc sal eert eynde neemt Als si aldus te rade stonden. ende haer orden ghestelt was. verwachten si heyndric wter stadt comende met groten volcke ende die bisscop quam achter Heyndric en wiste nieuwers af. maer hi sloech vast in den hoop vanden vianden. Die bisscop reet weder in die stadt. ende alle sijn volc. ende lieten heyndric van lymborch alleen onder die vianden. Die hertoghe van loreynnen die schoten aen vander eender siden. ende die coninc van beemen vander ander siden ende si vinghen hem. heyndric die sach wel dat hi verraden was. ende hi en wist niet hoe. Daer ginghen si heyndric van lymborch binden aen eenen tentboom binnen der tenten met coorden ende met ketenen. ende si namen hem sijn wapen. ende lieten hem daer staen sonder eten ende sonder drincken al den dach ende

[p. 41]

al den nacht. den morgen quam aen. ende doen ginghen si noch eens ordineren om heyndric te doden. Doen seyde die coninc van beemen. men sal hem inden iersten raybraken. ende dan daer nae vierendelen. ende dan salmen in elc lant een stuc senden vanden heren die hi verslaghen heeft. ende dat hooft salmen op eenen stake setten. ende dit was den raet vanden coninc van beemen. Die heren waren des wel te vreden. ende seyden als wi gheten hebben nae middage so salt geschieden. aldus ginghen si tot haren logijse waert in haer tenten, ende dat heyr was doe al ghesceyden. mits dat pays was. ende elc trac nae sijn lant. behalven die heren die daer bleven om heyndric te dooden.