[13 = 10] Dat. XXX. capittel.
NU es tijt ende meer dan tijt dat ic gae by mijnen vader ende bidden hem een bede. want den tijt naect seer vanden ternoye. aldus so moet ic mi haesten Met desen woorden quam hem sijn vader int ghemoet die hy groete alsoot wel behoorlick was een kijnt sinen vader te doen. ende etsijtes die viel op sijn knyen ende badt sinen vader een bede. dat was om dat margrieta van limborch mede mochte reysen inden voorseyden ternoye. ende daer aensien die hoghe feeste ende die costelike triumphe diemen in des keysers hof bedriven sal. Die vader dit horende van sinen sone etsijtes gaffer consent toe. ende hi was dies wel te vreden ende seyde. o etsijtes sone behaelt nu eere ende prijs want twerter te doene. Etsijtes antwoorde. beminde vader in mi en sal gheen ghebrec sijn haer ter eeren die ic mede voeren sal. so sal ick daer thonen ende laten blijcken wat mijn cracht vermach. Die vader seyde sone ghi spreect wel. mer ghi moet laten dalen uwen tornighen moet van uwer moeder. al wilde si margrieten doen doden dat is haer nu leedt. aldus sone vergevet haer. o lieve vader god wilt haer vergheven ic vergheeft haer dese reyse. mer wachts haer voort daen. want haer werck was quaet een te doen doden willen dye haer noyt en mesdede. het was een valsche daet. Met dese woorden schieden si van malcanderen. ende etsijtes maeckte hem ghereet om te rijden ten ternoye. met margrieten ende met evac. ende met sinen vader.
Auteursrecht onbekend