Dat. XXVI. capittel.
GHI heeren mijns rijcx. ghi weet wel hoe dat ic voor mi genomen hebbe. dat ic in Constantinobele mijn stede wil doen houden eenen costeliken ternoy. om alle edelheyt te ghebruken ende te hanteren der wapenen aert. Dus wil ick ontbieden alle schilt boortighe mannen. die edel van af comste sijn. als dat si comen sullen tot eenen vernoemden daghe hier int lant van griecken. in mijn stadt hetende constantinobelen. daer ick houden wil een feeste van veertich daghen lanc. Ende stellen daer twee karbonckelen. den eenen om te winnen met ternoyen. den anderen om te winnen met triumphe vanden schonen vrouwen. Dese feeste wil ick doen beroepen. om dat ie soude kennen mijn edel mannen. Die heren seiden te samen. heer keyser ghi doet wel. ende ooc mede dat wert u een eewige eere dat ghi dese feeste voort stellende sijt. Daer op die keiser antwoorde voort. havere ende hoy is al te voren. voor al dat gaet ende comt Aldus mijn heraut ghi hebt ghehoort mijnen sin. onthouwet wel. ende gaet in alle landen onder mi gheleghen. ende gheeft dit ghebot te kennen. dat een yeghelijc come op sijn cierlieste. omme prijs te verdienen. Den achsten dach van Junio moet elc ter banen sijn. ende desen dach onthouwet wel. neemt daer sijn veertich bisanten van goude. ende maect goede ciere. Die heraut dancte den keiser seer. ende hi nam orlof ende ghinc hem maken te paerde. om te vollenbrenghen dat beveel des keysers. Die keiser ende sijn heren die ghinghen ordineren met eresebia des keysers dochter alle dinghen op teierlicsten, om alle heeren tontfanghen die totten ternuye comen souden. Ende men bereede dat perck alsoot daer toe dienende was. ende men maeckter ooc stellagen om maechden ende vrouwen daer op te setten, om te sien den triumphe vanden ternoyen.
Auteursrecht onbekend