Den Bybel met groter neersticheyt ghecorrigeert (Liesveltbijbel 1542)

Hier beghint dye derde Epistel van Sint Ian.

Die apostel vermaent Gayum dat hi blijue in sachtmoedicheyt ende hem van alle quade keere.

Dat .I. Capittel

1

⁺DEn ouden Gaio den beminden dyen ic lief hebbe inder waerheyt,

+ A vers 1

2

Mijn beminde, ic wensche in allen stucken, dat v wel gae, ende gesont sijt, gelijct dijnder siele wel gaet,

3

Ic ben seer verblijt, doen de broeders quamen, ende getuychden van dijnder waerheit gelijc ghi wandelt inder waerheyt,

4

Ic en heb gheen grooter vruechde, dan die, dat ic hoore mijn kinder inder waerheyt wandelen.

5

Mijn beminde ghi doet trouwelijck, wat ghi doet aenden broederen ende gasten,

6

⁺die uwer liefden getuych ghegeuen hebben voor die vergaderinge, ende ghy sult weldoen ist dat ghise weerdelijck voor God geleyt hebt,

+ B vers 6

7

want, om sijns naems wille sijn wi gereyst, ende hebben vanden heydenen niet gecomen,

8

daerom sullen wi sodanighen ontfanghen, op dat wy der waerheydt hulpen worden.

9

Ic hebbe die vergaderinge gescreuen, mer Diotrepes, dye onder hen wil den voorganc hebben, die en ontfanct ons nyet,

10

daerom, wanneer ic come, wil ick hem vermanen sijnder wercken die hi doet, ⁺ ende hi crijst met quaden woorden ouer ons, ende en laet hem aen dyen nyet genoegen, hy en ontfanckt dye broeders selue nyet, ende belet dyen dye dat doen willen, ende worptse wt der gemeynten.

+ C vers 10

11

⁺Mijn beminde, volcht nyet na den quaden, maer na den goeden, Wye wel doet, dye is van God, die quaet doet, die en siet Godt niet.

+ D vers 11

12

Demetrio wert getuygenisse van allen gegeuen, ende vander waerheydt selue, ende wi getuygen ooc, ende ghi weet, dat onse ghetuygenisse waer is,

13

Ic heb vele te schrijuen, maer ick en wil niet met inct ende pennen tot v scrijuen,

14

Ic hope v cortelijck te sien, so willen wi mondelick met malcanderen spreken,

15

Vrede si met v. Het groeten v die vrienden. Groet die vrienden met namen. Amen.