Den Bybel met groter neersticheyt ghecorrigeert (Liesveltbijbel 1542)

Hier beghint dye Epistel totten Hebreen.

Hier wort ghestelt die excellentheyt van Christo, dye welc ons die nyeuwe wet ghegeuen heeft.

Dat .I. Capittel.

1

⁺† NA dyen dat Godt voortijts menichmael ende minigerley wijse tot den vaderen door die Propheten gesproken heeft

+ A vers 1

2

soo heeft hi ten laetsten in desen daghen tot ons door den soon ghesproken,

3

den welcken hi tot eenen erfgename alre dinghen geset heeft, door welcken hi ooc die werelt gemaeckt heeft, die welck (want hi een schijnsel oft blinckinge sijnder heerlicheyt is, ende dat gelijcke oft dat gerechte beelt sijns wesens is, ende draecht alle dinghen metten woorden sijnder crachte, ende heeft die reyninghe onser sonden door hem seluen gemaect oft volbracht) heeft hi hem geset totter rechter hant der maiesteyt inder hoochte,

4

so vele beter gheworden, dan die Engelen als hi te mael vele eenen anderen naem hen heeft beerft *

5

⁺† Want tot welcken engel heeft hi oyt gheseyt, Ghy sijt mijn soon, ic heb v heden ghebaert? ⁺ Ende weder, ick sal hem een vader sijn, ende hi sal my een soon sijn.

+ B vers 5

+ Psal. ij Actuum xiiij.c

6

Voort daer hi den eersten gheboren sone in die werelt weder in leyt oft inbrenget, so seyt hi, Ende alle Engelen Gods sullen hem aenbidden.

7

Ende vanden Engelen seyt hi, Hy maect sijn engelen geesten, ende sijn dienaers vlammen des vuers,

8

Mer vanden sone Gods, dijnen stoel duert van eewicheit tot eewicheyt, dat scepter ws rijcx, is eenen oprechten scepter.

9

Ghi hebt die gherechticheit lief gehadt, ende die ongerechticheyt gehaet, daerom heuet v God v HERE gesalft ⁺ metter olie der bliscappen bouen uwe medeghesellen. ⁺

+ C vers 9

+ Psalm. xliiij

10

Ende ghi HERE hebt die aerde van beginsel ghefundeert, ende die hemelen sijn wercken uwer handen,

11

die selue sullen vergaen, mer ghi sult blijuen, ende sullen alle verouden als een cleet,

12

ende ghi sultse veranderen, als een gewaet, ende si sullen hen veranderen, mer ghi sijt dye selue, ende uwe iaren en sullen niet afnemen. ⁺ *

+ Psal. ci.

13

⁺Maer tot welcken Engel heeft hi oyt geseyt, Sidt tot mijnder rechterhant, tot dat ic uwe vianden tot een voetbanck uwer voeten legghe?

+ D vers 13

14

En sijn si niet altemael dienstbarige geesten wtgheseyndt te dienst, om die ghene die eruen sullen die salicheyt? ⁺

+ Psal. ci.