Den Bybel met groter neersticheyt ghecorrigeert (Liesveltbijbel 1542)

[p. *]

¶ Hier begint die tweede Epistel van sint Ian.

Sint Ian vermaent die wtuercoren, tgoet te aenueerden, ende tquaet te schouwen, ende set die maniere om te leeren scouwen hem excuserende vander cortheyt.

Dat .I. Capittel

1

⁺DIe oude der wtuercorender vrouwen ende haren kinderen, dye ic lief heb inder waerheyt, ende niet alleene ic, mer ooc alle die de waerheyt gekent hebben

+ A vers 1

2

om der waerheyt wille, die in ons blijft ende by ons sijn sal inder eewicheyt.

3

Ghenade barmherticheyt, vrede van Gode den vader, ende vanden HERE Ihesu Cristo, den sone des vaders inder waerheyt ende inder liefden.

4

Ic ben seer verblijt, dat ic geuonden hebbe onder v kinderen die daer inder waerheyt wandelen, gelijc wy een gebot vanden vader ontfangen hebben,

5

⁺Ende nv bidde ic v vrouwe, nyet als een nieuwe gebot en scrijue ict v, mer dat wi gehadt hebben van begin dat wi ons onder malcanderen lief hebben sullen,

+ B vers 5

6

Ende dat is die liefde dat wy wandelen na sijn gebot.

Dat is dat gebot gelijc ghi ghehoort hebt van beginsel, op dat wi daer in wandelen.

7

Want veel verleyders sijn inder werelt ghecomen, die nyet en belijden Iesum Cristum dat hy int vleesch gecomen is, Dese is dye verleyder ende die Antecrist,

8

⁺Siet voor v, dat ghy niet en verliest, dat ghi gewrocht hebt, mer vollen loon ontfanget,

+ C vers 8

9

Wye ouertreet ende en blijft niet inder leere Cristi, die en heeft geen Godt, Wie inder leere Cristi blijft, die heeft beyde den vader ende den sone.

10

Ist dat yemant tot v comet, ende en brenget dese leere nyet, dyen neemt nyet in v huys, ende groet hem ooc nyet,

11

Want wie hem groet, die heeft ghemeynschap met sinen quade wercken,

12

⁺Ick hadde v veel te scriuen, mer ic en wilt nyet door brieuen ende inct doen, Mer ick hope tot v te comen, ende mondelic met v te spreken, op dat v vruechde volcomen si. Het groeten v dye kinder dijnder susteren der wtuercorender Amen.

+ D vers 12