Den Bybel met groter neersticheyt ghecorrigeert (Liesveltbijbel 1542)

Die Apostel veruolgende op die liefde die wi behooren te hebben tegen onsen naesten, spreect voort van dye openbaringhe des woorts, ende van dat betrouwen in God.

Dat .v. Capittel

1

⁺WIe daer gelooft dat Iesus is Cristus, die is van God geboren, Ende wie daer lief heeft dyen, die hy ghebaert heeft, die heeft ooc lief dyen die van hem geboren is.

+ A vers 1

2

Daer aen bekennen wi, dat wy gods kinderen lief hebben, als wi God lief hebben, ende sijn geboden houden,

3

Want dat is die liefde Gods, dat wy sijn geboden houden, ende sijn geboden en sijn niet swaer.

4

† Want al dat van God geboren is, verwint die werelt, * ende ons gelooue is die victorie, die dye werelt verwonnen heeft.

5

Wie is die, die de werelt verwint, dan die daer ghelooft Dat Iesus Gods sone is?

6

⁺Deze is die daer coemt, met water ende bloet, Iesus Cristus niet met watere alleen, mer met water ende bloet, Ende die gheest ist, die daer tuyghet, dat dye geest die warachticheit is,

+ B vers 6

7

Want drie sijnder, die daer inden hemel getuyge geuen, Die vader, dat woort, ende die heylige geest. Ende dese drie sijn een,

8

Ende drye sijnder die daer getuyge geuen inder aerden, die geest, dat water ende dat bloet, ende die drie sijn een.

9

Ist dat wi der menschen tuygen ontfangen, Gods getuygenisse is groter, want Gods getuyghe is dat, dat hi ghetuycht heeft, van sinen sone,

10

Wie daer gelooft aenden sone Gods, die heeft Gods ghetuygenisse bi hem, Maer wye God niet en gelooft, die heeft hem tot een logenaer gemaect, want hi en heeft niet gelooft dat ghetuygenisse dat God ghetuycht heeft van sinen sone,

11

Ende dat is dat getuygenis dat ons God dat eewich leuen heuet ghegeuen, ende sulcx leuen is in sinen sone,

12

Wie den sone Gods heeft, die heeft dat leuen, wye den sone Gods niet en heeft, die en heeft dat leuen niet.

13

⁺Alsulcx hebbe ic v gescreuen, ghi die gelooft aen den name des soons Gods, op dat ghi weet dat ghi dat eewich leuen hebt, ende dat ghi gelooft aenden name des soons Gods,

+ C vers 13

14

Ende dat is dat betrouwen dat wi hebben tot hem, dat ist dat wi wat bidden nae sinen wille, so hoort hi ons,

15

Ende ist dat wy weten dat hi ons hoort wat wi bidden, So weten wy dat wy die bede hebben, die wi van hem gebeden hebben.

16

Ist dat yemant siet sinen broeder sondighen, een sonde niet totter doot, die sal bidden, ende hem gheuen dat leuen, dien die daer sondigen, niet totter doot, Daer is een sonde totter doot, daer voor en segge ic niet, dat yemant bidde,

17

⁺Alle ongherechticheyt is sonde, Ende het is sommige sonde totter doot.

+ D vers 17

18

† Wi weten, dat wie van God gheboren is, dye en sondicht niet, maer die gheboorte van God onthoudt hem, ende die boose vyant en sal hem nyet aen tasten,

19

Wi weten, dat wi van God sijn, ende dye gheheele werelt is ghesedt in boosheydt,

20

Maer wy weten dat die sone Gods ghecomen is, ende heeft ons eenen sin gegeuen, op dat wi souden bekennen den warachtigen, ende sijn inden warachtighen in sinen sone Iesu Christo, dese is die warachtige God, ende dat eewich leuen. *

21

Kinderkens hoet v voor den Afgoden Amen.