Den Bybel met groter neersticheyt ghecorrigeert (Liesveltbijbel 1542)

¶ Die Apostel leert die verkeeringhe die tusschen den ouders ende kinders behoort te sijn, ten eynde onderwijsende die Galaten in alle duechden generael.

Dat .vi. Capittel.

1

⁺ISt dat wi inden gheest leuen, so laet ons ooc inden geest wandelen,

+ A vers 1

2

Laet ons der ydelder glorien niet begeerich sijn, malcanderen niet ontrustende noch benijdende

3

Lieue broeders, ist dat een mensche van eeniger misdaet voorcomen wert, so onderwijst hem met saechtmoedighen geest, ghi die geestelijc sijt, Ende siet op v seluen, dat ghi oock nyet ghetempteert en wert,

4

Die eene draghe des anderen last, so sult ghi die wedt Cristi veruullen.

5

Maer ist dat hem yemant laet duncken, hi is wat, als hi doch niet en is, die bedriecht hem seluen,

6

⁺Een yegelijc proeue sijns selfs werck, ende also sal hi aen hem seluen glorie hebben ende niet aen eenen anderen,

+ B vers 6

7

want een yegelijc sal sinen last draghen.

8

Maer die met woorden onderwesen wort, dye deyle mede alderley goet, dien, die hem onderwijst,

9

En doelt niet. God en sal hem niet laten bespotten, want wat die mensche sayet, dat sal hy mayen,

10

Wye op dat vleesch sayet, die sal vanden vleessche dat verderuen mayen, mer wie op den geest saeyt, die sal vanden geest dat leuen maeyen,

11

Laet ons goet doen sonder verdriet, ⁺ Want tot sijnder tijt sullen wi ooc mayen sonder ophouden,

+ C vers 11

12

Als wi nv tijt hebben, so laet ons goet doen aen alle menschen, mer aldermeest aen die ghenooten des gheloofs. *

13

Siet met hoe veel woorden heb ick v gescreuen met eygender hant.

14

† Die daer willen wel ghelaten inden vleesche, die dwinghen v te besnijden, alleen op dat si niet metten cruys Cristi veruolcht en souden worden,

15

⁺Want ooc die selue die haer besnijden laten, en houden die wet niet, maer si willen dat ghi v besnijden laet, op dat si haer van uwen vleesche beroemen moghen.

+ D vers 15

16

† Maer het si verre van my te glorieren, dan alleen vanden cruys ons HEREN Iesu cristi, door welcke mi dye werelt gecruyst is, ende ic der werelt. *

17

Want in Cristo Iesu en gelt noch besnijdinge, noch onbesnijdinge, meer een ^a nieuwe creatuere.

a Nieuwe creatuere, is den nieuwen mensche herboren doort gelooue.

18

Ende hoe vele na dese regulen wandelen, ouer die si vrede ende bermherticheyt, ende ouer dye Israhels God,

19

Voort aen en make mi nyemant meer moede. Want ick drage die litteekenen des HEEREN Iesu in mijn lichaem,

20

Die ghenade des HEREN Ihesu Cristi si met uwen gheest, lieue broeders. Amen.

¶ Hier na volget die Epistel die Paulus sandt tot die van Ephesen.