Den Bybel met groter neersticheyt ghecorrigeert (Liesveltbijbel 1542)

Die Apostel betrect ende porret die van Galathen nyet te onderhouden tghene dat wettelic is, ende dat om tquaet tontgaen ende tgoet te vercrijghen. Voort onderscheyt hy die wercken des vleeschs ende des gheests.

Dat .v. Capittel

1

⁺SO blijft nv inder vryheit staende, daer mede ons Christus beurijt heeft, ende laet v niet wederom in dat knechtscappige iock knopen,

+ A vers 1

2

Siet, ic Paulus seg v, ist dat ghi v besnijden laet, so en is v Cristus niet nut.

3

Anderwerf getuyge ic eenen yegelijcken mensche, die hem besnijden laet, dat hi noch der geheelder wet sculdich is,

4

ende zijt afgeuallen van Cristo, wanneer ghi door dye wet rechtueerdich worden wilt, ende ghi hebt die genade gemist,

5

mer wi verwachten inden geest der hopingen dat wi door dat ghelooue rechtuerdich sijn,

6

Want in Cristo Iesu en gelt noch besnidinge noch onbesnidinge, mer dat geloue dat door die liefde werct,

7

⁺Ghi liept wel, wie heeft v belet der waerheit niet gehoorsaem te zijn?

+ B vers 7

8

En consenteert niemant. Die radinge en is niet van dyen die v geroepen heeft,

9

een weynich suer deechs, versuert dat gheheel deech. † Ic betrouwe mi tot v inden HERE, ghi en sult anders niet gesint sijn.

10

Wie v dwalende maect die sal sijn ordeel dragen, hi si wie hi wil,

11

Mer ic lieue broeders, ist dat ic die besnidinge noch preke, waerom lijde ic dan noch veruolginge? So hadde die verargernisse des cruyces opgehouden? *

12

Woude God dat si ooc wtgeroeyt worden in v verstooren,

13

⁺Maer ghi lieue broeders sijt totter vryheit geroepen, ⁺ mer siet toe, dat ghi die vriheit niet en geeft, tot ocsuyn des vleeschs, mer door die liefde diene die een den anderen,

+ C vers 13

+ Math. xxij.d

14

Want alle die wet wert in een woort veruult, in dien, Hebt uwen naesten lief als v seluen.

15

Maer ist dat ghi onder malcanderen bijtet ende etet, so siet toe, dat ghi onder malcanderen niet verteert en wort.

16

Maer ick segghe daer af, † Wandelt inden geest, so en sult ghi de lusten des vleeschs niet volbrengen,

17

want dat ^a vleesch gelust tegen den geest, ende de geest gelust tegen dat vleesch. Die selue sijn tegen malcanderen, dat ghi niet en doet wat ghi wilt,

a vlees is den heelen mensche ende ouden Adam, der sonden ende alle allendicheydt onderworpen Math. xxvi. Marci. xviij.

18

Ist dat ghi wandelt inden geest, so en sijt ghi niet onder die wet,

19

Want openbaer sijn die wercken des vleeschs, als ouerspel, hoererie, onreynicheit,

20

wellusticheit, afgoderie, touerie, viantscap, kijf, benijdinge, toornicheit, strijdinghen, tweedracht, secten, haet, moort, droncken drincken, ouertollige brasserien, ende dier gelijc, van welcken ic v hebbe te voren gheseyt, ende segt v noch te voren,

21

dat ghi die ghene die sulcx doen, die en sullen dat rijcke gods niet besitten,

22

Mer die vruchte des geests is liefde, vruechde, vrede, lancmoedicheyt vrientlicheit, goetheit, gelooue,

23

saechtmoedicheyt, cuysheit, welcke sulcke zijn, tegen dien en is die wet niet

[p. *]

24

Mer welcke Cristens sijn, die hebben dat vleesch gecruyst, metter lusten ende begeerten.