Den Bybel met groter neersticheyt ghecorrigeert (Liesveltbijbel 1542)

Die Apostel leert die Galaten die warachticheyt der kercken te houden te sine, ende na dat elc ledt daer aen hanget namaels tot goeden manieren vermanende.

Dat .iiij. Capittel

1

⁺IC segge, † Also lange als die erfgename een kint is, so en is onder hem ende eenen knecht geen onderscheyt, al oft hi al een heere is van alle goeden,

+ A vers 1

2

mer hi is onder mombers ende bescermers totten bestelden tijt des vaders *

3

Also ooc wi, doen wi kinderen waren, waren wi gheuanghen onder die wtwendige settinghe,

4

Mer doen die tijt veruult was sandt God sinen sone, die daer gheboren is van eenen wijue, ende onder die wet gedaen,

5

op dat hi die, die onder die wet waren verloste, ende wi die kintschap ontfingen,

6

Mer want ghi nv kinder sijt, so heeft God gesonden sinen geest in uwe herten, die roept Abba, lieue vader,

7

Also en sijn wij hier geen knechten maer, meer enckel kinderen, Sijnt dan kinderen, so sijt ghy ooc erfgenamen Gods door Christum. *

8

⁺Maer tot dier tijt, dat ghi God nyet en kendet, diendet ghi dien, die van natueren geen God en sijn,

+ B vers 8

9

mer nv ghi God bekent hebt (ia veel meer van God bekent sijt) hoe keerdi v dan omme weder tot die crancke ende ghebreckelike wet, den welcken ghi van nieus aen dienen wilt?

10

ghi hout dagen ende maenden, feesten, ende iaerfeesten,

11

ic sorge van v dat ic licht te vergeefs in v ghearbeyt hebbe,

12

Sijt toch gelijc ic, want ic ben gelijc ghi

13

† Lieue broeders, ic bid v, ghi en hebt mi geen leedt gedaen, Want ghi weet, dat ic in v ^a crancheit na den vleessce dat Euangelium gepredict hebbe, ter eerster reysen,

a crancheit, dat is verdriet. ij.co. xij.c.

14

ende mijn aenuechtinge, die ic lijde na den vleessche, en hebt ghi niet veracht noch versmaet, maer als een Engel Gods ontfinct ghi mi, iae als Iesum Cristum.

15

Hoe waert ghi die tijt so salich, Ic ben v getuyge, dat, waert dat het mogelic geweest waer, ghi haddet v ogen wtgetrocken, ende mi gegeuen,

16

ben ic dan nv also v viant geworden, dat ic v die waerheyt voorhoude?

17

⁺Si en begeeren v niet, maer si willen v van my afuallich maken, op dat ghi haer na volgen soudt.

+ C vers 17

18

Nauolghen met neersticheit is goet, wanneer dat altijt gheschiet om dat goet, ende niet alleene, wanneer ick teghenwoordich bi v ben.

19

Mijn lieue kinder die ic anderwerf met ancxte bare, tot dat Cristus in v een gestel crijge,

20

Ic woude dat ic nv bi v ware, ende mijn stemme verwandelen mochte, want ic werde beschaemt in v.

21

Segt mi, ghi die onder die wet wilt wesen, hebt ghi die wet niet gehoort.

22

† Want het staet ghescreuen, dat Abraham hadde twee sonen, een vander deernen, den anderen vander vryer,

23

Mer die vander deernen was, is na den vleessce geboren, mer die vander vryer, is door die beloften geboren.

24

Die woorden bedieden wat anders, ⁺ Want dese vrouwen sijn die twee testamenten. Dye eene vanden berge Sina, die tot knechtschap baert, ende dat is Agar,

+ ge. xxi a

25

Want Agar heet in Arabia den berch Sina, ende hi strect tot in Hierusalem, dat tot deser tijt is, ende en is niet vry met sinen kinderen. ⁺

+ Sa iij.c

26

⁺Mer dat Hierusalem dat daer bouen is, dat is dye vry is, die is onser alder ^b moeder,

+ D vers 26

b moeder, dat is de vergaderinge der gelouigen, die ghefigureert wordt door dye poorte Sion. Psalmo. lxxxviij es. liiij.a Lu. xxiij.d

27

Want het staet gescreuen, Sijt vrolic die daer niet en baert, ende breect wt ende roept, die daer niet vruchtbaer en sijt, want die eenige heeft veel meer kinder, dan die den man heeft

28

Mer wi lieue broeders, zijn na Ysaac, kinder der beloften

29

Mer gelijc tot dier tijt, die na den vleessche gheboren was, veruolchde dien, dye na den geest geboren was, also gatet ooc nv.

30

Mer wat seyt die scriftuere? Stoot wt die deerne met haren sone, want der deernen sone, en sal niet eruen met den sone der vryer

31

Hieromme lieue broeders, so en sijn wi nv niet der dienstdeernen kinder, mer der vryer.