Den Bybel met groter neersticheyt ghecorrigeert (Liesveltbijbel 1542)

Die Apostel straft die dwalinghe der Corinthen, dye welcke si hadden int ontfangen des heyligen Sacraments, ende in haer vergaderinge, Ende daer na leert hy die waerdicheydt des heyligen Sacraments, ende een goede bequame maniere om te ontfanghen.

Dat .xi. Capittel

1

⁺IC prijse v lieue broeders, dat ghi op mi gedenct in alle stucken, ende hout die settinge, gelijc ic v gegeuen hebbe.

+ A vers 1

2

Mer ic laet v weten dat Cristus is eens yegelicx mans hooft, mer des wijf hooft is die man, Cristus hooft is God,

3

Een yegelijc man die daer bidt oft propheteert ende heeft wat opt hooft die scheynt zijn hooft,

4

mer een wijf die daer bidt oft propheteert, met onbedecten hoofde, die sceynt haer hooft Want het is recht so vele als waerse gescoren,

5

Ende en wilt si haer niet decken, so snijtmen haer dat hayr af. Mer nv dat qualic staet, dat een wijf afgesneden hayr heeft, oft geschoren is, soo laet haer dat hooft bedecken.

6

Mer die man en sal dat hooft niet decken, want hy is Gods beelt ende heerlicheyt, Mer dat wijf is een eere des mans,

7

Want die man en is niet vanden wijue mer dat wijf is vanden manne,

8

Ende die man en is niet gescapen om des wijfs wille, ⁺ maer dat wijf om des mans wille

+ B vers 8

9

Daer om sal dat wijf een decsel op dat hooft hebben om der ^a Engelen wille,

a Door die engelen verstaet dye scriftuere, die dienaers ende officiers der ghemeynten gestelijc ende weerlick mala. ij. iij.

10

nochtans en is noch die man niet, sonder dat wijf, noch dat wijf sonder den man inden HERE,

11

Want also dat wijf vanden man also comt ooc die man door dat wijf, mer al van God

12

Ordeelt dit bi v seluen, oft wel staet, dat een wijf onbedect voor God bidde?

13

Oft leert v ooc niet dye nature, dattet den man een oneere is, ist dat hi lanc hayr toemaect?

14

ende den wiue een eere, ist dat si lanc hayr toemaect? Dat hayr is tot een decsel gegeuen.

15

Mer isser yemant onder v die lust te kiuen heeft, die sal weten dat wi die wijse niet en hebben, noch ooc die vergaderinghe Gods.

16

⁺Op dat ic mijn gebot doe, so prijse ic niet, dat ghi niet op beter wijse, mer op die quaetste wijse te samen comt,

+ C vers 16

17

Ten eersten, wanneer ghi te samen coemt inder vergaderinge, hoor ic datter tweedracht is onder v ende eens deels gelooue icx,

18

Want daer moesten twistingen onder v sijn, op dat die gene die beproeft sijn openbaer onder v werden.

19

† Wanneer ghi nv te samen coemt met malcanderen, so hout men daer niet des HEREN auontmael,

20

want een yegelic neemt te voren sijn eygen auontmael, onder den etene. Ende dye eene is hongerich, die ander is droncken,

21

Hebt ghy niet huysen daer ghi eten ende drincken moecht? Oft veracht ghi die vergaderinge Gods, ende bescaemt dye gene die niet en hebben. ⁺ Wat sal ic v seggen? Sal ick v prijsen? Hier inne en prijse ic v niet.

+ E vers 21

22

Ick hebt vanden HERE ontfangen, dat ic v gegeuen hebbe, want die HERE Iesus inder nacht doen hi verraden wert, nam dat broot

23

ende dancke, ende bract, ende sprac. Neemt etet, Dat is mijn lichaem dat voor v gebroken wert, dat doet tot mijnder ghedenckenissen.

24

Des seluen gelijc ooc den kelck nae den auontmael. Ende sprac, Desen kelc is een nyeu testament in mijnen bloede, ⁺ doet dat, so dicwils ghi drinct tot mijnder gedenckenissen.

+ F vers 24

25

Also dicwils ghi van desen broode eet, ende van desen kelc drinct, so sult ghi des HEREN doot vercondigen? Tot dat hi coemt,

26

Daerom, so wie onweerdich van desen broode eet, oft vanden kelc des HEEREN drinct, die is sculdich aen dat vleesch ende bloet des HEREN,

27

mer die mensce proeue hem seluen ende also ete hi vanden broode, ende drincke vanden kelcke

28

Want wie onwaerdich eet ende drinc, die eet ende drinct hem seluen dat oordeel daer mede, dat hi niet en onderscheyt dat lichaem des HEREN.

[p. *]

29

⁺Daeromme sijnder ooc so vele crancken ende ongesonden onder v, ende een groot deel slapen,

+ G vers 29

30

Want waert dat wi ons seluer ordeelden, so en worden wi niet geordeelt,

31

Als wi geordeelt werden, so werden wi vanden HERE berispt, op dat wi niet met deser werelt verdoemt en werden. *

32

Daerom mijn lieue broeders, als ghi te samen coemt te eten, so verbeyt die een den anderen,

33

Mer hongert yemant, die ete thuys, op dat ghi niet tot den ordeel te samen en caemt, Dat ander sal ick ordineren als ick come.