Den Bybel met groter neersticheyt ghecorrigeert (Liesveltbijbel 1542)

Die Apostel prijst hier int generael dit gratie Gods, declarerende die conditien der gratien die om niet gegeuen wort Gelijckende dat lichaem der kercken, tegen dat lichaem der natueren.

Dat .xij. Capittel

1

Van die geestelijcke gauen wil ic lieue broeders, dat ghi niet onwetende en sijt

2

† Ghi weet dat ghi Heydenen sijt gheweest, ende sijt ghegaen totten stommen afgoden, daer ghi toe geleyt sijt,

3

⁺Daerom doe ic v cont, dat nyemant Iesum en veruloect die door den geest spreect, ⁺ ende nyemant en can Iesum een HERE heeten, dan door den heyligen geest.

+ A vers 3

+ mar. xi.f

4

Het sijn menigerley gauen, mer het is een geest

5

ende het sijn menigerley diensten, mer het is een HERE,

6

ende daer sijn deelingen der werclicheden mer het is een God, die daer wercket alderley in allen menscen

7

In eenen yegelijcken openbaren hen die gauen des geests totten gemeynen profijte,

8

⁺Den eenen wert ghegheuen door den geest te spreken vander wijsheyt,

+ B vers 8

9

na den seluen geest, eenen anderen dat gelooue inden seluen geest, eenen anderen die gauen gesont te maken inden seluen geest,

10

eenen anderen wonder te doen, eenen anderen te propheteren, eenen anderen geesten te onderscheyden, ⁺ eenen anderen menigerley tongen, eenen anderen tonghen wt te legghen,

+ ro. xij.d.

11

Dit alle werct dye selue eenighe geest ende deylt eenen yegelijck het sijn toe, nae dyen hi wilt. *

12

Dyes gelijc als een lichaem is, ende heeft nochtans veele leden, mer alle die leden eens lichaems, hoe wel haerder vele sijn, so sijn si nochtans een lichaem. ⁺

+ eph. iiij.a

13

Also ooc Cristus, want wi sijn in eenen geest, alle tot eenen ^a lichaem gedoopt, wi sijn Ioden of griecken, knechten of vryen, ende zijn alle met eenen geest gedoopt, want ooc dat lichaem en is niet een lidt, maer vele,

a lichaem is hier, die kercke cristi, daer hy dat hooft af is. Col. i.d

14

Maer waert dat die voet sprake,

15

ic en ben geen hant, daerom en ben ic geen lidt des lichaems, sout daerom geen lidt des lichaems sijn?

16

Ende of dat oore sprake, ic en ben niet die ooge, daerom en ben ic geen lidt des lichaems, sout daerom geen lidt des lichaems sijn?

17

Waert dat dat geheel lichaem die ooge waer, waer bleef dat ghehoor, Ende waert dat dat geheel lichaem dat gehoor waer, waer bleef dat riecken.

18

Mer nv heeft God die leden geset, eenen yeghelijcken bisonder aent lichaem, gelijc hi gewilt heeft.

19

Mer waert dat alle leden een lidt waren, waer bleef dat lichaem?

20

⁺Mer nv sijn der leden vele, mer dat lichaem is een,

+ C vers 20

21

Dat ooge en can niet geseggen totter hant, ic en behoef v niet, ende wederom dat hooft totten voeten ic en behoeue v niet,

22

mer veel meer die leden des lichaems, die ons duncken die crancste te sine, die sijn die nootlicste,

23

ende die ons duncken die oneerlicste zijn, den seluen leggen wi die meeste eer aen, ende die ons qualic aenstaen, die verciertmen aldermeest.

24

Want die ons wel aenstaen, die en behoeuens niet. Mer God heuet dat lichaem also gematicht, ende den behoeuenden leden aldermeest eere gegeuen, op dat geen twistinge int lichaem en si

25

mer dat die leden voor malcanderen gelijc sorgen,

26

Ende ist dat een lidt lijdet, so lijden alle die leden mede, ende ist dat een lidt heerlic wert gehouden so verblijden haer alle die leden mede.

27

Maer ghi sijt dat lichaem Cristi, ende leden onder malcanderen,

28

⁺Ende God heeft geset in die vergaderinge, ten eersten die Apostelen, ten anderen die Propheten, ten derden op die leeraers, daer na die wonderdoenders, daer na die gauen gesont te maken? Hulperen regeerderen, menigerley tongen,

+ D vers 28

29

zijn si al Apostelen? Zijn si al propheten? Sijn si alle leeraren?, sijn si alle wonderdoenders

30

hebben si alle gauen gesont te maken? Spreken si alle met tongen? Connen si alle wtleggen? ⁺

+ eph. iiij.b

31

Staet nae den besten gauen, Ende ick wijse v noch eenen costelijckeren wech.