Den Bybel met groter neersticheyt ghecorrigeert (Liesveltbijbel 1542)

Die Apostel straft die ghene, dye welcke haer deelachtich maecten den Afgoden, ende hi leert in wat manieren datmen gebruyken sal, die dingen die den afgoden gheoffert werden.

Dat .x. Capittel

1

⁺IC wil dat ghi weet, lieue broeders, dat onse vaderen, sijn alle onder der wolcken geweest, ende sijn alle door die zee gegaen

+ A vers 1

2

ende sijn alle onder Moyses ghedoopt, inder wolcke ende inder zee,

3

ende hebben al eenderley geestelijcke spijse gegeten,

4

ende hebben alle eenderley geestelijken dranc gedroncken. Mer si droncken van den geestelijken steen, die daer na quam, welcke steen was Cristus. *

5

Mer aen haerder vele en heuet God geen goet behagen gehadt, want si sijn neder geslagen inder woestijnen.

[p. *]

6

⁺Dat is onse figuere geworden, op dat wi ons niet en laten gelusten des quaets, gelijc als die lust hadden

+ B vers 6

7

En weet ooc geen aenbeders der afgoden als die sommige geworden sijn als gescreuen staet Dat volck sette hem nedere te eten, ende te drincken, ende stont op te spelen,

8

Ooc en laet ons geen oncuysheyt doen, gelijc somige onder hem oncuysheyt bedreuen, ende vielen op eenen dach drientwintich duysent,

9

Laet ons ooc Cristum niet tempteren gelijc somige van dien, dye hem getempteert hebben ende worden van slangen vernielt.

10

En murmureert ooc niet gelijc haerder somige murmureerden, ende worden te niet gemaect door den verderuer

11

Alle dit gesciede hem in figuren Mer het is gescreuen tot onser vermaningen, ⁺ op welcke dat eynde der werelt gecomen is,

+ C vers 11

12

Also, dat wie hem laet duncken dat hi staet, mach wel toe sien dat hi niet en valle

13

V en heeft noch geen dan menscelike temptatie betreden, Want Godt getrouwe is, die v niet en laet tempteren ouer v vermogen, mer maect neffens die temptatie een wtcomen dat ghi cont verdraghen. *

14

† Daerom mijn liefste, vliet van den dienst der afgoden.

15

⁺Als met den wijsen spreke ic, ordeelt ghi wat ic segge,

+ D vers 15

16

Den kelc der benedijngen welcken wi benedien, is die niet die gemeynscap des bloets Cristi? Ende dat broot dat wi breken, is dat niet die gemeynscap des lijfs Cristi?

17

Want onser vele sijn een broot ende een lijf, die wile wi alle eens broots deelachtich zijn * Siet aen Israel na den vleesce,

18

die welcke die offer eten, sijn die niet in die gemeynscap des outaers?

19

⁺Wat sal ic dan nv seggen? Sal ic seggen dat die afgoden wat sijn? Oft dat den afgoden offer wat si? Mer dat segge ic, dat die heydenen, wat si offeren dat offeren si den duyuel, ende niet God,

+ E vers 19

20

Nv en wil ic niet dat ghi inder Duyuelen, ghemeynschap sijn sult Ghi en cont niet gelijc drincken des HEREN kelc ende des duuels kelc

21

Ghi en cont niet gelijc deelachtich zijn des HEREN tafel, ende des duyuels tafel,

22

Oft willen wi den HERE tergen? Sijn wi stercker dan si?

23

Ic heb voor waer alles macht, mer het en betert niet al,

24

Niemant en soecke wat dat zijn is, mer een yegelijc dat eens anders is

25

Al wat int ^a vleeschuys vercocht wort, dat etet ende en vraecht niet op dat ghi die conscientien verscoont

a By vleeshuys, verstaet die apostel alle plaetse daermen spijse vercoopt psa xxiij

26

Want die aerde is des HEREN, ende wat daer in is

27

Mer ist dat v yemant van den ongelouigen te gaste noot ende ghi wilt daer gaen, so eet al wat v voor geset wort ende en vraecht niet op dat ghi die conscientien verscoont

28

Mer ist dat yemant tot v sal seggen, dat is afgoden offer, ⁺ so en eet niet om des wille, die dat te kennen gegeuen heeft, op dat ghi die conscientien beurijt (dye aerde is des HEREN ende wat daer in is)

+ F vers 28

29

Mer ic segge van conscientien niet v selfs, mer des anderen, Want waer om soude ic mijn vrijheyt laten oordeelen van eens anders conscientie

30

⁺Want ist dat ict met dancsegginge geniete, wat sal ic dan ghelastert werden voor dien, daer ic v voor dancke

+ G vers 30

31

Weder ghi eet oft drinct, ⁺ oft wat ghi doet, soo doet dat al tot Gods prijse,

+ Col. iij

32

Sijt sonder aenstotinge beyde den Griecken ende den Ioden, ende der kercken Gods,

33

gelijc als ic ooc eenen yegelijcken in allen dingen mi behagelic make, ende en soecke niet dat mijne mer dat velen profitelic is, op dat si salich worden, Sijt mijne nauolgers, gelijc als ic Cristi