Den Bybel met groter neersticheyt ghecorrigeert (Liesveltbijbel 1542)

Die Apostel trect ende leyt die van Corinthen tot die volmaectheit der duechden, doet een exempel van hem seluen ende door die ghene die inde bane loopen

Dat .ix. Capittel

1

⁺BEn ic niet een Apostel? Ben ic niet vry? Heb ic niet onsen HERE Iesum Cristum gesien? Sijt ghi niet mijn werc inden HERE?

+ A vers 1

2

Ben ick den anderen niet een Apostel, so ben ic nochtans v Apostel Want die segel mijns Apostels ambachts sijt ghi inden HERE,

3

Wanneer men mi vraget, so antwoorde ic also,

4

Hebben wi niet machte te eten ende te drincken,

5

Hebben wi ooc niet macht een suster een wijf met ons al om te leyden, ghelijck die ander Apostelen ende dye broeders des HEREN, ende Cephas,

6

Of hebben alleen ic ende Barnabas niet macht dat te doen,

7

wie reyst eenigen tijt op sinen eygen loon, of wie plant eenen wijngeert berch, ende en eet niet van sijnder vruchten? Of wie weidet een cudde ende en eet niet van dat melc der cudden?

8

Spreec ic dat op menscen wijse? Seit dat ooc dye wet niet?

9

Want inder wet Mosi staet gescreuen, ghi en sult den ossen den ^a muyl niet toe stoppen, die daer dat coren wt tredet, Sorcht god voor die ossen?

a Byder ossen muyl oft mont verstaet die apostel den dienst des predicants, den welcken men sinen dienst, ende arbeyet lonen sal pro. x. R. xv.f

10

oft seyt hi niet alle dinc om onsen wille. Want het is ymmer om onsen wille gescreuen, Want wie daer ploeget, sal op hopinge ploeghen, ende die daer dorsscet sal op hopinge dorsscen, dat hi des geens hopinge deelachtich werde,

11

Ist dat wi v dat geestelic hebben gesayt ist een groot dinc oft wi v vleescelic maeyen?

12

Mer ist dat ander deser macht aen v deelachtich sijn, waerom niet veel meer wy?

Mer wi en hebben sulcken macht niet gebruyckt mer wi verdragen alderley, dat wi niet den Euangelio van Cristo een hindernisse maken,

13

Weet ghi niet dat die daer wercken inden tempel, die generen hen op den tempel? ⁺ Ende die den outaer dienen, genieten des outaers

+ C vers 13

14

Also heeft die HERE beuolen, dat die dat Euangelium vercondigen, sullen ooc van dat Euangelio leuen Mer ic en hebbe dyes geen gebruyct.

15

Ic en scrijue ooc niet daerom van dyen, dat met mi also gehouden soude worden, Het waer mi lieuer dat ic storue, dan dat yemant mi mijnen roem te nyeute soude maken.

16

Want dat ick dat Euangelium preecke, en darf ic mi niet beroemen, Want ic moet dat doen, ende wee mi ist dat ic dat Euangelium niet en preecke,

17

doe ict geerne, so salt mi geloont werden, mer doe ict noode, so is mi nochtans dat ambacht beuolen, ⁺ Waerom salt mi nv dan geloont werden?

+ D vers 17

18

Namelic daerom, dat ic preke dat Euangelium, ende doe dat selue vry om niet op dat ic mijnder vriheit niet en misbruycke in prekens ambacht.

19

Want hoe wel ic vry ben van yegelijcken, heb ic nochtans mi seluen een yegelic tot eenen knecht ghemaect, op dat ic haerder vele gewinnen soude,

20

ende den Ioden ben ic geworden als een Iode, op dat ic die Ioden winnen soude, dyen die ^a onder die wet sijn, ben ic gheworden als onder die wet, op dat ic die onder die wet zijn wonne,

a Onder dye wet sijn is wt vreesen der punitien die wercken der wet doen, oft op hope des loons ga. iij.b.

21

ende dyen die sonder die wet sijn, ben ic als sonder die wet gewroden, hoe wel ic nochtans niet sonder Gods wet en ben, mer ic ben inder wet Cristi, op dat ic die sonder wet sijn winnen soude,

22

Den crancken ben ic geworden als cranc, op dat ic die crancken winnen soude, Ic ben een yegelic alderley geworden, op dat ic geheelic, ia zommige salich soude maken,

23

Mer ic doet al om des Euangelium wille, op dat ic sijnder gemeynschap deelachtich werde.

24

† En weet ghi niet? Dat die gene, die na prijs ^b loopen, die lopen alle, mer een vercrijcht den prijs, Loopet nv also dat ghijt begrijpt,

b Loopen, dat is hier volstandich int gheloue voortgaen. ga. v.a.

25

Een yegelijc die daer vecht, onthout hem van alle dinc, ende die also, dat si een verganckelike croone souden ontfangen, mer wi een onuerganckelike,

26

Mer ic lope also, niet als opt onsekere Ic en vechte also niet, als die in ^c die lucht slaet, mer ic temme mijn lijf ende bedwinge hem, op dat ic nyet den anderen preke, ende selue verworpelic werde

c Dye locht slaen, is in ydelheyt voort gaen Ie. xiiij b