Den Bybel met groter neersticheyt ghecorrigeert (Liesveltbijbel 1542)

Die Apostel bidt voor die Ioden, bewijsende dat dye rechtueerdicheyt, welcke waerdich maect totten eewighen leuen, alleen is bi die wet ende tgelooue Iesu Christi.

Dat .x. Capittel.

1

⁺LIeue breders mijns herten wensch is, ende bidde ooc God voor Israel dat si salich worden.

+ A vers 1

2

Want ic geue hen daer in getuyghenisse, dat si staen nae dye liefde Gods, mer niet met verstande,

3

want si en bekennen die gerechticheyt niet die voor God gelt, ende soecken haer eygen gerechticheyt op te rechten, Ende sijn also der gerechticheyt die voor God gelt niedt onderdanich,

4

want Cristus is deynde der wet, daer aen rechtuerdich wort alle die aen hem gelooft.

5

⁺Moses scrijft wel vander gerechticheyt die wt der wet coemt, so wat mensche die dat doet, dye salder in leuen.

+ B vers 5

6

Mer die gerechticheyt wten geloue die spreket aldus. En segt niet in v herte. Wie wil opten hemel climmen? dat en is niet anders, dan Cristum weder af halen.

7

Oft wie wil neder climmen in die ^a diepte Dat en is niet anders dan Cristum vanden dooden te halen. Mer wat seyde die scriftuere,

a Diepte, dat is in de helle Ion. ij.b

8

dat woort is v na, namelic in uwen mont, ende in v herte.

9

† Dit is dat woort des gheloofs, dat wi preken. Want ist dat ghi met uwen mont belijdt Iesum, dat hi die HERE is, ende gelooft metter herten, dat hem God vanden dooden verwect heeft, so suldi salich worden,

10

Want ist datmen van herten gelooft, soo wertmen rechtuerdich, ende ist datmen metten mont bekent, so wertmen salich,

11

want die scriftuere seyt. ⁺ Wie in hem gelooft, die en sal niet bescaemt worden.

+ C vers 11

12

Daer en is geen ondersceyt, Tis altemale een HERE, rijc ouer alle die hem aenroepen,

13

want so wie den name des HEREN aenroept, die sal salich worden.

14

Mer hoe sullen si aenroepen, in dien si niet en geloouen? Hoe sullen si gelouen, daer si niet af gehoort en hebben? Ende hoe sullen si hooren sonder predicant?

15

Ende hoe sullen si preken, ten si dat si gesonden werden. Ge-lijc als gescreuen staet. Hoe lieflic sijn die voeten vanden ghenen, die den vrede vercondigen, ende dat goet vercondigen.

16

Mer si en sijn niet alle der Euangelien gehoorsaem. Want Esaias spreect. HERE wie heuet onse predicatie gelooft?

17

daerom coemt gelooue wt die predicatie, die predicatie doort woort Gods

18

Mer ic segge, hebben sijt niet ghehoort. Voorwaer haer geluyt is nv in allen landen wtgegaen, ⁺ ende hare woorden in alle die werelt. *

+ D vers 18

19

Maer ic segge, heeft Israel niet bekent.Ten eersten spreect Moses. Ic sal v doen nauolgen, door een volc dat mijn volc niet en is, ende door een onuerstandich volc, wil ic v vertoonen.

20

Ende Esaias is stout ende spreect. Ic ben gheuonden vanden genen die mi niet gesocht en hebben, ende ic ben verschenen den ghenen die na mi niet geuraecht en hebben,

21

Tot Israel spreect hi. Den geheelen dach heb ic mijn handt wtghestrect tot dat volc, dat hem niet en laet segghen, ende tegen mi is.