Den Bybel met groter neersticheyt ghecorrigeert (Liesveltbijbel 1542)

¶ Hoe Iesus een mensche dye blint gheboren was verlichte, ende sprack ic ben in een oordeel ghecomen in deser werelt, op dat die blinde siende, ende die siende verblinde.

Dat .ix. Capittel.

1

⁺† ENde Iesus ginc voorby ende sach aen eenen die blint geboren was.

+ A vers 1

2

Ende zijn discipulen vraechden hem ende seyden, Meester, wye heeft ghesondicht?

3

dese oft sijn ouders, dat hy blint is gheboren. Ihesus ant-

[afbeelding]

woorde, Noch dese en heeft ghesondicht, noch zijn ouders, maer op dat dye wercken Gods openbaer aen hem souden worden,

4

Ick moet dye wercken des gheens wercken, dye my ghesonden heeft, alsoo langhe alst dach is, Dye nacht coemt, dat nyemandt en mach wercken.

5

Alsoo langhe als ic in die werelt ben so ben ic een licht der werelt.

6

⁺Doen hy dat gheseyt hadde, spooch hy opter aerden, ende maecte slijck wt dien speecsele, ende smeerde dat slijck op des blinden ooghen, ende seyde tot hem

+ B vers 6

7

Gaet henen totten water Siloha (dat is verduytst) ghaet, ende wascht v, Doen ghinck hi daer henen ende quam siende.

8

Dye ghebueren ende die hem te voren ghesien hadden, om dat hy een bedeler was, seyden. En is dese nyedt, die daer sadt ende badt?

9

Die somighe seyden, hi ist, Dandere, hi is hem ghelijc, mer hi selue seyde, Ick bent.

10

Doen seyden si tot hem, Hoe zijn v uwe ooghen op ghedaen? Hy antwoorde ende seyde, die mensche dye Ihesus hiet, dye maecte slijck ende smeerde mijn ooghen ende seyde.

11

Gaet henen totten dijck oft water Siloha, ende wast v, Ick ghinck henen ende wiesch my, ende ick wert siende. Doen seyden si hem,

12

⁺Waer is dye selue? Hy seyde ick en weets nyet.

+ C vers 12

13

Doen leyden si hem totten Pharizeen dye aldus langhe blint gheweest was.

14

Het was den Sabboth doen Ihesus dat slijck maecte ende zijn ooghen opende,

15

Doen vraechden si hem weder oock die Pharizeen hoe hi siende waer gheworden. Hy seyde tot haer, Hy leyde mi slijck op mijnen ooghen, ende ick wiesch mi ende ben nv siende.

16

Doen seyden die sommige vanden Pharizeen, die mensche en is niet van God, om dat hi den Sabbath niet en hout. Maer die ander seyden Hoe mach een sondich mensche sulcke teekenen ghedoen? Ende daer was een tweedracht onder haer.

17

Sy seyden weder totten blinden, Wat segt ghy van hem, heeft hi v ooghen open ghedaen? Hy seyde, Het is een Propheet.

18

Die Ioden en gheloofden nyedt van hem dat hi blint gheweest ende siende gheworden was, ⁺ tot dat si die ouders des gheens die siende was gheworden, riepen ende seyden,

+ D vers 18

19

Is dat v sone, die ghi segt dat hy blindt gheboren is? Hoe is hy dan nv siende?

20

Sijn ouders antwoorden ende seiden, Wi weten dat dese onse sone is, ende dat hi blint gheboren is,

21

maer hoe hi nv siende is, dat en weten wi nyedt, oft wye hem sijn ooghen opgedaen heeft, dat en weten wy oock niet, Hi is seluer out genoech, vraget hem, laet hem selfs voor hem seluen spreken.

22

Dit seyden sijn ouders om dat si die Ioden vreesden, Want die Ioden hadden ouerdraghen, waert dat yemant hem voor Cristum bekende oft belede, dat die selue inden ban ghedaen soude worden.

23

Daerom seyden zijn ouders, hy

[p. *]

is out ghenoech, vraghet hem.

24

Doen riepen si ten anderen mael den mensche die blindt gheweest was ende seyden, Gheeft Gode den prijs. Wi weten dat dese mensche een sondaer is.

25

⁺Hy antwoorde ende seyde, Is hy een sondaer dat en weet ic nyet, een dinck weet ick wel, dat ic blint was ende ben nv siende.

+ E vers 25

26

Doen seyden si weder tot hem Wat dede hi v? Hoe dede hi v ooghen op?

27

Hi antwoorde haer, Ic hebt v nv gheseyt, ende ghy hebbet ghehoort, wat wilt ghijt weder hooren? wildy oock zijn discipulen worden,

28

Doen vloecten si hem ende seyden, Sijt ghi zijn discipel, wy zijn discipulen Moysi,

29

wi weten dat God met Moysi ghesproken heeft. Maer desen en weten wi nyet van waer hi is.

30

⁺Die mensche antwoorde, ende seyde, dat is een wonderlic dinck, dat ghi nyet en weet van waer hy is, ende hy heeft mijn ooghen open ghedaen,

+ F vers 30

31

want wy weten dat God dye sondaers nyet en verhoort, maer soo wye God vreesende is, dye doet sinen wille, dye hoort hy.

32

Vander werelt aen en ist nyet gehoort, dat yemant eenen gheboren blinde die ooghen op gedaen heeft.

33

En waer dese nyet van Gode, hi en const dat nyet doen,

34

Sy antwoorden ende seyden tot hem, Ghi zijt geheel in sonden geboren ende ghi leert ons. Ende si stieten hem wt.

35

Het quam voor Ihesum dat si hem wtghestooten hadden, ende doen hi hem vant, seyde hi tot hem Gheloofdy aenden sone Gods?

36

Hy antwoorde ende seyde, HERE wye ist, op dat ick in hem gheloouen mach?

37

⁺Ihesus seyde tot hem, Ghy hebt hem ghesien, ende die met v spreect, die ist.

+ G vers 37

38

Hi seyde, HERE, ick gelooue, ende badt hem aen. *

39

Ende Iesus sprack Ick ben tot een oordeel op dese werelt ghecomen, op dat dye ghene, die daer nyet en sien, siende werden, ende dye daer sien blint werden.

40

Ende dat hoorden somighe der Pharizeen die bi hem waren, ende seyden tot hem, sijn wi dan ooc blint?

41

Iesus seide tot haer, waert ghi blint so en hadt ghy gheen sonde. Maer nv ghi segt, wi sijn siende, so blijuen uwe sonden.