Den Bybel met groter neersticheyt ghecorrigeert (Liesveltbijbel 1542)

¶ Hoe die drie Wijsen met ghiften wt Orienten quamen. Hoe Ioseph met Iesus ende Maria in Egipten vloot. Hoe die onnosele kinderkens ghedoot werden, Ende hoe Iesus wederkeerde wt Egypten.

Dat .ij. Capittel.

[afbeelding]

1

⁺† DOen Iesus geboren was te Bethleem int Iootsche lant,

+ A vers 1

2

inden tijden des Conincx Herodis, siet, doen quamen die Wijse wt Oosten tot Hierusalem, ⁺ seggende, Waer is hi die gheboren Coninc der Ioden? wy hebben sijn sterre gesien int Oosten, ende wi sijn gecomen om hem te aenbidden.

+ Dit euangelie bewijst genoech dat dese Wijse geen coninghen noch princen en waren, maer als Strabo seit so warent heydesce leeraers leerende den heydenen godlike leeringen, gelijc Moyses den Ioden, ende waren priesters in persen

3

Ende Herodes die coninck dit hoorende, wert verstoort, ende met hem die geheele stadt van Ierusalem,

4

Ende liet vergaderen alle die hooghe Priesters ende scriftgeleerden des volcx, ende ondersocht van haer, waer Cristus gheboren soude worden. Ende si spraken tot hem,

5

Tot Bethleem int Iootsche landt. Want also is ghescreuen door den Propheet,

6

Ende ghi Bethleem int Iootsche landt, in gheender manieren en sijt ghy dye minste onder dye Princen van Iuda, want wt v sal mi voortcomen een Hertoghe, die daer ouer mijn volck van Israel ^b regeren sal.

b Regeren, dats heerscappen door leeringe ende goede exempelen ouer dat volck Ac. xx.f i.Ti. v a daer hy vanden weduwen spreect

7

Doen liet Herodes heymelijck dese Wijsen tot hem roepen, ende vraechde haer neerstelijcken, wanneer haer dye sterre geopenbaert hadde,

8

Ende hi beual haer tot Bethleem te reysen, ende sprac. Gaet derwaerts, ende soect dat kint neerstelijc, ende als ghi dat geuonden hebt, so latet mi weten, op dat ic ooc comen mach, ende aenbiddent

[p. *]

9

Ende na dat si den Coninck gehoort hadden, so sijn si ghereyst, Ende siet, die sterre die si int oosten gesien hadden, ghinck voor haer, tot dat si quam staen bouen die plaetse daert kint was.

10

Ende doen si die sterre saghen, so sijn si seer verblijt, ende ghingen in dat huys, ⁺ ende vonden dat kint met Maria sijn moeder, ende vielen nedere, ende hebben dat kint aenghebeden,

+ B vers 10

11

ende haer schatten gheopent, ende hebben hem gheoffert gauen, gout, wieroock, ende myrre.

12

Ende God beual haer inden droom, dat si tot Herodes niet weder en souden keeren, ende si sijn door eenen anderen wech weder in haer lant ghekeert. *

13

Ende na dat si wech ghereyst waren, † Siet, soo heeft die engel des HEREN geopenbaert Ioseph inden droom, segghende, Staet op ende neemt dat kint ende sijn moeder, ende vliet in Egypten, ende blijft aldaer tot dat ict v segghe, Want het is op handen, dat Herodes dat kint soecken sal, om te dooden,

14

⁺Ende hy ghewect sijnde, heeft met hem ghenomen dat kint ende sijn moeder, byder nacht, ⁺ ende vloodt in Egypten,

+ C vers 14

+ ozee. xi a Numeri xxiiij.d.

15

ende heeft daer alsoo langhe ghebleuen tot nae der doot Herodis, op dat veruult soude worden dat vanden HERE ghesproken was, door den Propheet, segghende, Wt Egypten heb ick mijnen sone gheroepen.

16

Doen Herodes sach dat hi vanden wijsen bedroghen was, wert hy wter maten gram, ende sant sijn dienaers wt, ende liet dooden al die kinderen dye te Bethleem, ende daer ontrent in dye landen rondtsom ligghende waren, alle die .ij. iaren, oft min dan twee iaren oudt waren, Naden tijt die hi neerstelijc wten Wijsen verstaen hadde.

17

Doen was veruult dat gesproken heeft gheweest vanden Propheet Ieremias, ⁺ die daer spreect.

+ Hie. iij g

18

Op die geberchten in Rhama is gehoort geweest gheschrey, vele claghens, weenens ende huylens, Rachel beweenende haer kinderen, en heeft haer niet willen laten troosten, want si niet en sijn. *

19

⁺† Ende na dat Herodes ghestoruen was, siet, so openbaerde die Enghel des HEEREN Ioseph inden droom, daer hi in Egypten was,

+ D vers 19

20

segghende, Staet op, ende nemet tot v dat kindt ende sijn moedere, ende reyst int lant van Israel, Want si ghestoruen sijn dye den kinde na sijn leuen stonden.

21

Ende Ioseph stont op ende nam dat kint ende sijn moeder tot hem, ende is ghecomen int lant van Israel,

22

doen Ioseph verhoorde dat Archelaus int Iootsche landt Coninck was in sijns vaders Herodes plaetse, soo heeft hy gheureest derwaerts te reysen, ende inden droom ontfinck hi een beuel van God, ende hi is ghereyst in die eynden des Galileetschen lants,

23

Ende daer comende, ⁺ soo heeft hy ghewoont in dye stadt dye ghenaemt is Nazareth, Op dat veruult soude worden dat door die Propheten ghesproken was, want hy Nazareus ghenaemt sal worden. *

+ Iudicum. xiij.b.