Den Bybel met groter neersticheyt ghecorrigeert (Liesveltbijbel 1542)

¶ Antiochus ende Lysyas bereyden haer teghen dye Ioden, Iudas vergadert dat volc ende ghebiedt God aen te roepen, hy treckt voor Modin daer hy eenen grooten slach heeft teghen sine vyanden.

Dat .xiij. Capittel.

1

ENde inden hondersten, ende negen en veertichsten iare, bekende Iudas dat Antiochus Eupator, met eender menichte teghent Iootsche lant quam,

2

ende met hem Lisias die procureur, ende Prouoost der saecken, ⁺ hebbende met hem hondert ende thien duysent voetganghers, ende ooc vijfduysent reysenaers, vierentwintich elephanten, ende driehondert waghenen met crommen sprieten.

+ A vers 2

3

Menelaus mengde hem daer ooc mede, ende met groter bedriechlicheyt badt hi Antiochum, niet voor des lants salicheyt, maer hopende datmen hem tot eenen hooftman stellen soude,

4

Maer die Coninck der coningen, verwecte dat ghemoet Antiochi, tegen den godloosen man, Ende Lisias hem ingheuende, dat dese die sake alle des quaets was, so beual hi, ghelijc si dat voor een ghewoonte hebben, hem te vangene, ende in die selue plaetse te dooden.

5

In die selue plaetse was eenen thoren, van vijftijch ellen, hebbende al omme eenen asch hoop. Dese hadde een afsien nederwaers,

6

Daer na dede hy desen verwaten Menelaum in die asschen worpen, ende si dreuen hem al ter doot waert.

7

Ende met sulcker wet gebuerdet den ouertreder der wet te steruen

8

ende Menelaum ter aerden niet gegeuen te worden ende dat waerlijck, rechtueerdelijc ghenoech, Want om dat hi vele misdaden bedreuen hadde, tegen den outaer Gods, welcx vier ende asschen heylich was, is hi inder asschen doot verdoemt,

9

Maer die coninck

[p. *]

quam met ongetoomden ghedachte, hem den Ioden schalcker te thoonen dan sijn vader,

10

Welck Iudas bekent hebbende, gheboot hi den volcke dat si den HEERE nacht ende dach aenroepen souden, dat hi hen nv ooc (ghelijc altijts) helpen soude, want si hen ontsaghen der wet ende des lants, ende den heylighen tempel berooft te werden,

11

ende dat hy tvolck (welck nv onlancx sinen adem weder verhaelt heeft) niet weder en soude laten onderworpen werden, den blasphemighen natien.

12

⁺Als si dit alte gader deden, ende si drie daghen ghestadelic ter aerden neder gestrect vanden HEERE, ontfermherticheyt met weenen, ende vasten baden, so vermaendese Iudas dat si hen bereyden souden,

+ D vers 12

13

Hi dacht metten ouders, eer die coninc theyr totten Iootschen lande brocht, ende eer hi die stadt inname, wt te gaen ende den ordeel des HEEREN den wtganck der saecken te beuelen,

14

Aldus Gode der werelt schepper dye macht alre dingen gheuende, ende dye sine vermanende dat si sterckelijck strijden souden, ende totter doot voor die wetten, voor den tempel, voor die stadt, voor dat landt, ende borghers vromelijcken staen souden,

15

also stelde hi sijn heyr voor Modin. Ende den zijnen een teeken der victorien Gods ghegheuen hebbende, Dye alder sterckste ionghen wtghecoren hebbende, so aenghinc hi des snachts, den coninclijcken legher, ende sloech inden heyrlegher doot veerthien duysent mannen ende den alder meesten Eliphant, metten ghenen die daer op gheseten waren,

16

Ende hy veruulde der vyanden legher, metten hoochsten ontsich ende verscrickinghe. Ende als si haer dingen voorspoedelijc gescict hadden,

17

so toghen si wech.

Maer het is gheschiet als den dach op ghinck, midts dat hem des HEREN bescermenisse hielp

18

⁺Maer die coninc den smaec der stouticheyt der Ioden ontfaen hebbende, arbeyde hi met allen liste die swaerheyt der plaetsen te bestormen,

+ E vers 18

19

ende bracht sijn heyr te Bethsura, welcke der Ioden vaste beschermenisse was, maer hi wert geiaecht, ende gheschent.

20

Maer Iudas sant den ghenen die daer binnen waren noodtdruft.

21

Rodochus een vanden Iootschen heyre, bootscapte den vyanden die verholentheydt, die welcke ghesocht sijnde, gheuaen ende besloten is.

22

Die coninck hadde sprake metten ghenen die in Bethsuris waren, ende hi gaf die rechter hant, ende ontfincse, ende tooch wech ende streedt teghen Iudam, ende hi is van Iudas verwonnen.

23

Maer doen hi bekende dat Philips, dyen si als een stadthouder in sijn afwesen, te Antiochien ghelaten hadde, hem afgeuallen was, so is hi verbaest van herten, ende hi gaf hem den Ioden ouer, ende swoer henluyden te doen, van allen dat welck hen recht ende goet dochte, ende versoent sijnde, offerde hy offerhande, Hy eerde den tempel,

24

ende heeften begaeft, ende hi sette ghiften, ende hi omhelsede Machabeus, ende maecte hem hertoge ende prince van Ptholomaiden aen, tot Gerrenegen toe.

25

Maer als hi tot Ptholomaiden quam, so nament die Ptholomensen swaerlijcken, die ouercominghe der vrientscappen, sorghende, dat misschien dat verbont soude breken.

26

Doen ghinc Lysias opten rechter stoel, ende leyde die redenen wt, ende stilde dat volcke, ende hy keerde weder tot Antiochien, Ende in dier manieren so ghinck des Conincx reysinghe ende wedercoemste voort.