Den Bybel met groter neersticheyt ghecorrigeert (Liesveltbijbel 1542)
(2010)–Anoniem Liesveltbijbel–¶ Na die vereeninghe so bedrijuen Thimotheus, ende Apollonius ende noch andere een verraderie, Mer Iudas Machabeus sterct hem teghen haerlieden, ende straftse, hi nam Caspin in met die ander steden. | |
1Ga naar margenoot+ALs dit verbont gemaect was, so tooch Lisias totten coninc, maer die Ioden gauen hen totten ackerwerck, Maer die ander waren blijuen sitten, | |
2Timotheus ende Apolonius Gemee sone ende ooc Ieronimus, ende die houeerdige Demophon, ende Nicanor, een hooftman in Cypres, en lietense niet in stilheyt, noch in rust leuen, | |
3Die Ioppiten hadden aldusdanighen quaden feyten bedreuen Si baden den Ioden die bi haer woonden, dat si met huysurouwen ende kinderen in die scepen souden gaen die si bereyt hadden, als ofter gheen vyantscappen tusschen henlieden geweest en hadde. | |
4Aldus na de ghemeyne besluytinghe ende ordinantie der stadt, hen ooc te wille sijnde, ende om des vreedts wille, van gheenen dinghen quaet vermoedende, als si in de diepte waren voorgegaen, so en lieten sijer niet min dan twee hondert verdrincken. | |
5Als Iudas vernam dat dese wreetheyt aen de menschen sijns volcx was ghedaen, so beual hi den mannen die met hem waren, | |
6ende God den rechtueerdighen rechter aengheroepen hebbende, so quam hi teghen die vermoorders sijnder broeders, oock aenstack hi snachts heymelijck die hauene, ende verbrande die schepen, mer die vanden viere ontulucht waren, die verdede hi metten swaerde. | |
7Ende doen hi dese dinghen aldus ghedaen hadde so ginc hi wech, Ga naar margenoot+ als oft hi weder keeren soude, ende alle die Ioppiten wt wortelen, | |
8Maer doen hi vernam dat die Iamniters desgelijcx wilden doen den Ioden die met hen woonden, | |
9so ouerquam hi den Iamniters snachts, ende aenstack die hauen metten schepen, also dat dat licht des viers te Iherusalem verscheen, van tweehondert ende veertich stadien. | |
10Ende als si neghen stadien van daer waren ghegaen dat si tot Thimotheum souden reysen, so streden teghen hen vijfduysent mannen van Arabien, ende vijfhondert reysenaers. Ga naar margenoot+ Ende doen den strijdt machtich wert, | |
11ende met Gods hulpe, Iudas gheluckich vergaen was, die ander ouergebleuen van Arabien verwonnen sijnde, begeerden van Iuda datmen hen gheleyde soude gheuen, belouende dat si haer sommighe weylanden souden gheuen, ende hen in anderen saken profijtelijc sijn. | |
12Iudas meynde dat si hen in vele dinghen nudt souden sijn, so beloofden hi vrede, ende die rechte handen ontfaen hebbende, ghinghen si tot haren tenten. | |
13Ende Iudas aenhinc ooc een vaste stadt met brugghen ende mueren omsedt, die bewoont wert van scharen der ghemengder heydenen ghenaemt Casphin. | |
14Maer die daer binnen waren, betrouwende in haer vasticheyt der mueren, ende in dye ghereetscap der prouanden, deden booslic, Iudam tergende met vloeckinghen, ende blasphemeerden, Ga naar margenoot+ ende spraken dat ontamelijc was. | |
15Machabeus aengeroepen hebbende den grooten prince der werelt, die inden tijden van Iosua, Iherico sonder oorloochs ghetuych, ende sonder gheschutten, neder werpende, beliep die mueren fellijc, | |
16ende die stadt door den wille des HEREN ghewonnen hebbende, soo dede hi ontallijcke dootslaghen, alsoo dat die byligghende staende zee, dye twee stadien breedt was, scheen te vloeyen vanden bloede der ghedooder. | |
17Ga naar margenoot+Van daer toghen si seuen hondert ende vijftich stadien, ende quamen in Taracha, tot dyen Ioden diemen Tibeanei hiet. | |
18Ende si en creghen Thimotheum in dier plaetsen niet, ende gheene saecke daer volbracht hebbende, quam hi weder, ende liet die stercte in een alder vaste plaetse. | |
19Met Dosithea ende Sosipater, die met Machabeo hooftmannen waren, sloeghen si die ghene die van Thimotheo in die stercte ghelaten waren, thien duysent mannen. | |
20Ende Machabeus stelde in ordinantie om hem ses duysent mannen, ende ghestelt sijnde bi rotten, tooch hi voort teghen Thimo- | |
[pagina *]
| |
theum die met hem hadde, hondert ende vijuentwintich duysent voetknechten, ende tweeduysent ende vijfhondert reysenaers. | |
21Ende doen Thimotheus vernam Iudas toecoemste, so seynde hi voor die wijuen ende kinderen ende die andere ghereetschap totten slote, gheheeten Carnion, want het was onuerwijnlijck, ende swaer daer toe te comen, om die enghicheyt der plaetsen | |
22Ende als Iudas eerste heyr verscheen, so quam den vyanden vreese in, wt der tegenwoordicheyt Gods, die alle dinghen aenschout, | |
23ende si worden vluchtich, deen vanden anderen, alsoo dat si meer vanden haren neder gheworpen worden, ende metten slaghen haerder eyghender swaerden ghecrenct worden. Ende Iudas dede crachtighe neersticheyt om die godlose te straffen, ende hi wierp wt hen dertich duysent mannen neder. | |
24Maer Thimotheus selue viel in die handen Dosithei, ende Sofipatris, ende hi begeerde met veel ghebeden, datmen hem leuende soude laten gaen, om dat hijer vele wt der Ioden ouders, ende broeders gheuanghen hadde, dye met sijnder doot bedroghen souden werden. | |
25Ende als hi seker ghelooue ghegheuen hadden, dat hijse weder seynden soude, so hem ghesedt was, soo lieten si hem onghequetst gaen, om der broeders wille. | |
26Iudas is weder getrocken van Carnion, gedoot hebbende vijfentwintich duysent mannen, | |
27Ga naar margenoot+Na deser vluchte ende doodtslach, soo verlegherde hi sijn heyr tot Ephron waert in een vaste stadt, in welcke een meuichte der verscheyden heydenen woonden, ende vrome ionghen voor die mueren staende, ende weerden hen neerstelijck. In dese stadt waren veel behendighe gheschutten, ende daer was gereetscap der gheschutten. | |
28Maer als si den almachtighen God aengheroepen hadden, die met sijnder machten, dye crachten der vyanden breect, so wonnen si die stadt, ende wt dien die daer binnen waren, werpen si vijuentwintich duysent neder. | |
29Van daer so ghinghen si tot der Sciten stadt, die ses hondert stadien van Ierusalem was, | |
30Ende als die Ioden die bi die Scytopoliten waren, tsamen getuychden, dat si goedertierlijc ghehandelt waren, ooc inden tijden der onsalicheyt, dat si beleefdelijck met hen deden, hen dancsegghende | |
31ende ooc vermanende dat si ooc voortaen goedertieren te haren gheslachte souden sijn, soo quamen si te Hierusalem, als den hoochtijdelijcken dach den welcken aenstaende was. | |
32Ende na den vijftichsten dach, diemen Sinxen heet, togen si wech teghen Gorgiam, der Edomeen prouoost, | |
33Ende hi tooch wt met drie duysent voetknechten ende vier hondert reysenaers. | |
34Ende als si streden, so gheuielt datter luttel Edomeen vielen, | |
35Mer Dositeus van Bachinorem, een reyseger, een sterck man vinck Gorgiam, ende als dat een ridder van Tracen sach, dat hi hem leuende wilde vangen, soo viel hi tot hem in, ende hieu Gorgiam sijn schouder af, ende also ontuluchte Gorgias in Maresa. | |
36Ende als die ghene die met Esdrin partie waren, langhe gestreden hadden, ende vermoeyt waren, so aenriep Iudas den HERE, tot eenen hulper der vermoeyden | |
37ende eenen leydere des oorloochs te werdene, beginnende met manlijcker stemmen, ende met lofsanghen dye roepinghe verhooghende, soo iaechde hi Gorgias ruyters die vlucht aen. | |
38Ende Iudas verghaderde sijn heyr, ende quam in die stadt Odollem, Ende als den seuensten dach ouer quam, so reynichden si hen na die ghewoonte, ende in die selue plaetse hielden si den Sabbath. | |
39Ende des anderen daechs quam Iudas metten sinen op die voorseyde plaetse, op dat hi die lichamen der verslaghender wech soude nemen, ende dat hijse metten ouders in die vaderlijcke grauen soude setten. | |
40Ende si vonden onder der verslaghen Ioden iuweelen vander afgoden giften, die bi Iamniam waren, van welcken die wet den Ioden verbiet. Aldus wordet hen allen openbare, dat si om deser saken wil verslaghen waren. | |
41Hieromme ghebenedijden si alle des HEREN rechtuerdige oordeel, die die verborghentheden openbaer hadde ghemaect, | |
42Ende also totten ghebeden ghekeert, baden si dat die misdaet die daer gheschiet was vergheuen soude worden. Ende die alder stercke Iudas vermaende tvolck dat si hen voor sulcke misdaet hoeden wilden, want si voor haren ooghen sagen, hoe dat dese om sulcke misdaet verslaghen waren. | |
43Also vergaderde Iudas van eenen yeghelijcken ghiften, dat hi te samen creech twelf duysent dragma siluers, die sandt hy te Ierusalem, om daer geoffert te werden tot eenen offer voor die misdaet der dooden, wel ende duechdelijc vander verrijsenisse denckende, | |
44Want en hoopte hi niet, dat die verslaghene verrijsen souden, soo soudt ouertollich ende ydel schijnen, voor dye dooden te bidden. | |
45Ende want hi mercte dat die gene die met goddiensticheyt die slapinghe ontfaen hadden, die alder beste ghenade souden hebben opgheleydt | |
46Hieromme is die denckinghe, voor dye gestoruen te bidden, dat si van haren sonden ontbonden werden, salich ende heylich. |
|