Den Bybel met groter neersticheyt ghecorrigeert (Liesveltbijbel 1542)

¶ Vanden Prophete Elia, vanden duechdelijcken Coninck Ezechia, ende den propheet Esaia

Dat .xlviij. Capittel

1

⁺ENde die Propheet Elias stont op als een vier, ende sijn woort bernde als een fackel.

+ A vers 1

2

Die den honger onder hen brocht, ende die hem veruolgeden met haerder nijdicheit, sijn luttel geworden,

3

want si en mochten die geboden des HEREN niet verdragen, mits des HEREN woort hielt hi den hemel, ende hi worp driemael dat vier der aerden van hem.

4

Also is Elias heerlic gemaect in sinen wonderlicheden. Ende wie mach hem beroemen zijns gelijc te zijn.

5

Die inden woorde des HEREN Gods, den dooden weder dede comen vander hellen,

6

die de coningen neder werp totter verderffenisse, hi brack haer macht lichtelijc, ende die heerlike van haren stoele.

7

Die in Zion dat oordeel hoorde, ende in Horeb die ordeelen der wraken,

8

Hi propheteert den coningen die boete, ende maect die propheten na hem.

9

Hi is op genomen inden storm des viers, inden wagen der vieriger paerden.

10

Die ingescreuen is inden ordele der tijden die gramschap des HEREN te versaechten, des vaders herte te versoenen totten sone, ende weder op te stellen Iacobs geslachte.

11

Wel dien die v sagen, ende inder vrientscap verciert sijn, want wi leuen alleen dit leuen,

12

mer na der doot en sal onsen name alsodanich niet sijn.

13

⁺Elias die inden storm bedect is, ⁺ ende in Elizeo is sinen geest veruult. In sinen dagen en heeft hi den princen niet ontsien, ende nyemant en verwan hem met machte

+ B vers 13

+ iij.reg. xix iiij.reg. ij

14

noch geen woort en ghinc hem te bouen, ende sijn doode lichaem propheteerde.

15

In sinen leuen maecte hi wondere, ende in sine doot wrachte hi wonderlicheden.

16

In allen desen en bewees dat volc geen beteringe,

17

ende en ginc niet af van sine sonden, tot dat si van haren lande verworpen sijn, ende sijn verstroyt in allen landen, ende daer is seer luttel volcx ouergebleuen, ende eenen prince in Dauids huys.

18

Sommige van hen deden dat Gode behaechde, Maer die ander deden veel sonden.

19

Ezechias bewaerde die stadt ende leyde dat water te midden in die stadt, ende groef die rootse met yser, ende timmerde eenen put aent water.

20

⁺In sine dagen ginc Senacherib op, ende seynde Rapsacen, ende hi hief sine hant op tegen hen, ende stack sijn hant wt in Zion, ende hi is houerdich geworden midts sijn macht.

+ C vers 20

21

Doen zijn haer herten ende haer handen beweecht ende si haden smerte, als barende wiuen.

22

Ende si aenriepen den ontfermhertigen HERE, Ende haer handen wtstreckende, hieuen sise op, ende die heylige HERE God hoorde haestelic haer stemme.

23

Hi en gedachte haerder sonden niet noch hi en gafse den vianden niet, mer hi suuerdese door die hant des heyligen propheten Esaie.

24

⁺Hi werp die heyrlegers der Assyriers ter neder, ende die Engel des HEREN vernieldese.

+ D vers 24

25

Want Ezechias dede dat Gode behaechde, ende hi ghinc sterckelijc inden wech Dauid sijns vaders, den welcken hem beual Esaias die grote propheet, ende getrou in Gods aenschouwen

26

In sinen dagen ginc die sonne achterwaerts, ende verlengde den coninck sijn leuen. In groten gheeste sach hi die laetste, ende hi vertroostede de roudragende in Zion tot inder eewicheit toe, Hi toonde toecomende ende heymelike dingen eerse gheschieden.