Den Bybel met groter neersticheyt ghecorrigeert (Liesveltbijbel 1542)

Van Antichristus, ende van die verlossinge der Babilonischer geuanckenissen, Ende die destructie Hierusalems, ende vanden laetsten dach

Dat .xij. Capittel

1

⁺ENde die Coninc sal doen wat hem ghelust Ende hi sal hem verheffen ende oprechten teghen al tghene dat God is, Ende hi sal grouwelijcken tegen den God alder Goden spreken, Ende het sal hem ghelucken, ter tijt toe dat die gramscap wt is, Want het is besloten, hoe langhe dattet dueren sal,

+ A vers 1

2

Ende den God sijnder Voorvaders en sal hi niet achten, Hi en sal noch der vrouwen liefde noch eenigen God achten, Want hi sal hem tegen alle beyde tsamen op heffen

3

Maer sinen eyghenen God Maosim sal hi eeren Want hi sal eenen God, daer sine vooruaders niet af geweten en hebben, eeren met, gout, siluer, edel ghesteenten, ende schoone cleynodien,

4

Ende hi sal den genen, die hem dat Maosim helpen stercken, met den vreemden Godt, die hy vercoren heeft groote eere doen, Ende haer tot Heeren maken ouer groot goet ende haer dat lant te loon wtdeelen.

5

Ende int eynde sal die coninck int Suyden met hem stooten, ende die coninc tegent noorden sal hem ooc tegen hem stellen, met wagens, ruyters, ende veel scepen.

6

Ende hi sal in die landen vallen, ende verderuen, ende door trecken, Ende hi sal in dat lustige weerde lant comen, ende vele sullen daer verslagen worden, Mer dese sullen sijnder hant ontulieden, Edom, Moab, ende die vorsten der kinderen Ammon

7

ende hi sal sine macht in die landen seynden, Ende Egipten en sal hem niet ontulieden mogen

8

Mer hi sal door sine heyrcracht heerscappen ouer die gulden ende siluere scatten, ende ouer alle die cleynodsen Egipti, Libie, ende der Moren

9

Maer een gecrijchs vant Oosten ende Tnoorden sal hem veruaren, Ende hi sal met grooter verbolhentheyt wt trecken, op dat hi daer vele verderue ende te niedt brenghe,

10

Ende hi sal die tenten van sinen palleyse opslaen tusschen twee zeen, ⁺ om den weerden heylighen berch tot dattet met hem een eynde worde, Ende niemant en sal hem helpen.

+ B vers 10

11

Ter seluer tijt sal die grote Prince Michael, die voor dijn volc staet, hem opheffen, Want daer sal een alsulcke bedroefde tijt sijn, als oyt gheweest is, sint dat die menscen gheweest sijn, tot op die teghenwoordige tijt toe Ter seluer tijt sal dijn volc bescermt worden, Ia alle die in dat boec ghescreuen sijn,

12

Ende vele die onder der aerden liggen en slapen, die sullen wacker worden, Die sommige tot dat eewige leuen, Ende sommige tot eewiger versmaetheit, ⁺ ende scande,

+ Apo. ij.

13

mer die Leeraers oft wijse, die dandere geleert hebben, die sullen blincken, als des hemels claerheyt Ende die ghene dyer daer vele tot der gerechticheyt gewesen hebben, die sullen ghelijc die sterren scijnen altijt ende eewelijck. ⁺

+ Math. xxiiij

14

Ende ghi O Daniel, verbercht dese woorden, ende besegelt dit scrift tot op die laetste tijt, So sullender vele ouer comen, ende groot verstant vinden.

15

Ende ick Daniel sach ende siet, Daer stonden twee

[p. *]

andere, Deene aen desen oeuer des waters, Dander aen genen oeuer.

16

Ende hi sprack tot den ghenen in die lijnen cleederen, die bouen aent water stont, wanneer salt dan een eynde sijn? met sulcke wonderlijcke wercken?

17

Ende ic aenhoorde den man in dat lijnwaet gecleedt, die bouen aen dat water stont Ende hi hief op zijn rechte ende slincke hant ten hemel, ende swoer bi den genen die eewelijc leeft, dattet een tijt ende sommige tijden een halue tijt dueren sal, Ende als die verstroyinge des heyligen volcx een eynde heeft dan sal sulcx al gescieden.

18

Ende ic hoordet, mer ic en verstonts niet, Doen sprack ic mijn Here, Hoe salt daer na verghaen?

19

ende hi seyde, Gaet henen Daniel, Want dese woorden sullen besloten, ende besegelt bliuen, tot op die laetste tijt,

20

ende vele sullen ghereynicht, ghesuyuert ende bewaert wordet, Ende die godlose sullen een godloos wesen handelen, Ende die godlosen en sullens niet achten, ende soo vele als haerder sijn die en sullens nyet verstaen Mer die verstandige sullent achten, die selue sullent verstaen,

21

ende van die tijt aen, als dat dagelicx offer af gedaen, ende den woesten grouwel daer opgerecht wort So sullen dusent, twee hondert, ende tnegentich dagen verloopen,

22

Wel den genen die daer verwacht, ende dye duysent, drie hondert, ende vijfendertich daghen verreyct,

23

Mer ghi Daniel gaet henen, tot dattet eynde coemt, Ende rust, Ende dat ghi op staet in dijn deel.

¶ Het derthiende ende veerthiende Capittel by den Hebreen int Canon nyet gerekent die soeckt recht voor die Machabeen.

Hier na volget die Propheet Hosea