Den Bybel met groter neersticheyt ghecorrigeert (Liesveltbijbel 1542)

¶ Die Propheet Hosea.

[afbeelding]

God die HERE verthoont den Prophete Hosea onder een gelijckenisse dat Die Ioden verstooten, ende die Heydenen te houwelijcke met God versaemt sullen worden

Dat .I. Capittel.

1

DIt is des HEREN woort, ⁺ dat gesciet is tot Hosea, den sone Beheri, ter tijt Vsie, Iotham, Ahas, ende Hiskia der coningen Iuda Ende ter tijdt Ierobeams, des soons Ioas, des conincx Israels.

+ iiij.Re. x a. iiij.Reg. xv. xvi.

2

Ende doen die HEERE begonst te spreken met Hosea, so sprack hi tot mi Gaet henen, ende neemt een ^a hoere tot eenen wijue, Ende maeckt kinderen bi haer Want dat lant loopt vanden HERE nae dye hoererie,.

a Dye scriftueren noemtse een hoere niet datse haers lichaems een hoere was maer het was een heydensce vrouwe die God ende haren schepper niedt en kende, maer eerde die afgoden, ende die Ioden hieten in die scrift ouerspeelders als si den afgoden dienden oft vreemden versierden Godsdienst gebruycten. psalmo. lxxij.d. Esa. viij Ie. v.f

3

Ende hi ginc henen, ende nam Gomer die dochter Diblaim, die welcke beurucht wert met kinde, ende baerde hem eenen sone,

4

Ende hi sprac tot hem, Noemt hem Iesrahel, Want binnen corte tijt wil ic die bloet sculden Iesraels versoecken, ouer dat huys Iehu Ende ic wil met dat Conincrijck Israhels een eynde maken,

5

Ter seluer tijt wil ick den boghe Israhels in stucken breken int dal Iesrehel.

6

Ende si werdt noch eens berucht, Ende baerde een dochter, ende hi sprack tot hem, Noemtse Lorihamo, Want ick en wil des huys Israhels niet meer ontfermen, Maer ick wilse wtroyen,

7

Nochtans wil ic dat huys Iuda ontfermen, Ende wil hem helpen door den HERE haren God, Nochtans en wil ic haer niet helpen door bogen, sweerden, strijden, noch door peerden ende ruyters

8

Ende als si Lorihamo ghespeent hadde, so werdt si weder beurucht, ende baerde eenen sone,

9

Ende hy sprack, Noemt hem LoAmi, Want (dats gheseyt) Ghi en sijt mijn volc niet, Daeromme en wil ic ooc uwe God niet sijn