Den Bybel met groter neersticheyt ghecorrigeert (Liesveltbijbel 1542)

Een claghe ouer Pharao, ende dat volc Egipti.

Dat .xxxij. Capittel.

1

⁺ENde het gheschyede inden twaelfsten iare opten eersten dach der twaelfster maendt, dat des HEREN woordt tot my gheschyede, ende sprac.

+ A vers 1

2

Du menschen kindt, Heft aen een clage ouer Pharao den coninck in Egipten, ende segt tot hem,

3

Du bist gelijck als een leeuwe onder die heydenen, ende gelijc als eenen zeedraec oft waluisch, ghi sprinct in uwe waterstroomen, ghy maect dye wateren met dijne voeten droeuich, ende dine riuieren maectstu onclaer.

4

Also spreect dye HERE God, Ick wil mijn net ouer v wtwerpen, door eenen grooten hoope volcx, die v sullen in mijn garen oft nette iaghen.

5

Ende ick wil v opt lant trecken, ende opt veldt werpen, alsoo dat alle voghelen des hemels op v sitten sullen. Ende alle dye dieren der aerden van v sat werden.

6

Ende wil dijn aesch op die bergen werpen, ende met dijnre hoochten dye dalen vullen.

7

Dat lant daer ghi in swemmet, dat wil ick met dijnen bloede root maken al tot in dye bergen toe, dat die beken van dy vol werden.

8

Ende als ghy nv gansch wech zijt, so wil ick den hemel bedecken ende zijn sterren verduysteren. Ende die sonne met wolcken ouertrecken. Ende die mane en sal niet scijnen. Alle die lichten des hemels wil ick ouer v laten verduysteren, Ende ick wil een duysternisse in dinen lande maken, spreect dye HERE God,

9

Daer toe wil ick v vele menschen tot eenen veruaerlijcken exempel maken, als ic die Heydenen dine plaghen laet weten, ende vele landen, dye ghi niet en kennet,

10

Vele volckeren sullen haer van v verwonderen. Ende haren coninghen sal van v grouwelen, als ick mijn sweert ouer haer laet blincken. Ende si sullen botteliken verscrict worden, dat haer dat herte ende moet ontsincken sal, van dinen val.

11

⁺Want also spreect die HERE God, dat sweerdt des Conincx tot Babel dat sal v raecken,

+ B vers 11

12

Ende ick wil dijn volc verslaen door dat sweert der Ruesen, ende stercker, ende door alderley Tyrannen der Heydenen dye sullen die heerlicheyt Egipti verheeren ende alle dijn volck te niet brengen,

13

Ende ick wil alle dijne dieren verdoen, aen die grote wateren, also dat haer geender menschen voeten, noch gheender beesten clauwen onclaer maken en sullen,

14

Dan wil ic uwe wateren claer maken, also dat oock uwe stroomen vlieten sullen gelijc als olye, spreect dye HERE God,

15

als ick dat landt Egipti verwoest ende al dat inden lande is, eensaem ghemaeckt, ende alle dye daer in woonen, verslagen hebbe, op dat si weten dat ic die HERE ben,

16

dat sal den iammer sijn, dye men mach beclaghen. Ia vele dochteren der heydenen sullen sulcken een claghe maken ouer Egypten, Ende alle haer volc samen beclagen spreect die HERE God.

17

Ende inden twaelfsten iaer, opten vijftienden dach der seluer maendt, geschiede des HEEREN woort tot my, ende sprac

18

Du menschen kindt. Beweent dat volc in Egypten, ende stootet metten dochteren der stercker heydenen henen af onder der aerden, tot den genen die in die cuyle varen,

19

Waer is nv dine opgheblasentheyt Hier onder, ende legt v bi dye onbesnedene,

20

Sy sullen vergaen onder die verslaghen sijn metten sweerde. Dat sweert is al rechts gheuat, ende ghetogen, ouer haer gansche volck,

21

Die stercke Ruesen met haer medehulpers die alle hier onder gheuaren sijn, ende ligghen hyer onder die onbesnedenen, ende verslaghen metten sweerde, dye sullen daer van spreken inder hellen.

22

Aldaer leghet Assur met alle sinen volcke rontomme begrauen, die verslagen, ende metten sweerde vergaen sijn,

23

Haer grachten sijn diep in de cuylen. Ende sijn volc leget rontomme ouer al begrauen, ⁺ dye alle verslagen ende metten sweerde vergaen sijn, daer haer die geheele werelt voor ontsach.

+ C vers 23

24

Daer leghet ooc Elam met alle sine hoopen rontomme begrauen, Die alle verslagen, ende metten sweerde gheuallen zijn, ende sijn hier onder geuaren, als die onbesneden, onder der aerden. Waer voor haer oock die ganssche werelt vreesde, Ende si moeten haer schande dragen met den ghenen, die in dye grauen varen.

25

Men heeftse onder die verslaghen geleyt, met allen haren hoopen, ende si ligghen rontomme begrauen, Ende si zijn alle als die onbesneden, ende die verslagen metten sweerde, voor den welcken haer ooc die ganssche werelt ontsien moeste. Ende si moeten hare scande dragen, met den ghenen die in die cuyle varen, ende onder die verslagene blijuen

26

Aldaer is oock Mesech ende Tubal, met alle haren hoopen rontomme begrauen, dye alle onbesneden

[p. *]

ende metten swaerde verslaghen sijn, door dye welcke haer die geheele werelt vreesen moeste.

27

Ende alle die andere Ruesen die onder die onbesnedene verslagen sijn, Ende met haerder crijschweere ter hellen gheuaren sijn, ende hebben hare swaerden onder haer hoofden moeten legghen, Ende hare misdaet is op haer ghebeente ghecomen, welcke nochtans Ruesen waren, ontsien inder gansche werelt, die moesten also liggen.

28

Daeromme moetstu ooc vrylicken onder die onbesnedene tot puluere in stucken gheslaghen worden, Ende liggen onder die verslagene metten sweerde.

29

Daer leydt Edom met sinen Coninghen, ende alle sine vorsten, ende die verslaghene metten swaerde, ende onder die onbesneden, metten anderen, die inden graue ende helle varen, dye nochtans machtich gheweest sijn,

30

Iae alle dye Vorsten van Tnoorden die moeten derwaerts met alle Zidoniers, dye metten verslagene henen afgheuaren sijn, Ende haer veruaerlike gewelt is tschanden gheworden, ende si moeten ligghen onder die onbesneden, ende onder die ghene, die metten swaerde verslaghen sijn, Ende hare schande draghen, metten ghenen, die in die helle gheuaren sijn.

31

Dese sal Pharao sien, ende hem selfs vertroosten met alle sinen volcke, dye onder hem metten swaerde verslaghen sijn, ende met sinen ganschen heyr, spreeckt die HERE God,

32

Want die geheele werelt sal haer ooc eens voor mi ontsien, dat Pharao ende alle sijn menichte sal ligghen onder die onbesnedene, ende die metten swaerde verslaghen sijn seyt die HERE God.