Den Bybel met groter neersticheyt ghecorrigeert (Liesveltbijbel 1542)

¶ Die gherechticheit onser wercken wort hier neder geleget Ende gheleert dat alleen onse salicheyt aen die ghenade ende bermherticheyt Gods staet, Dat officie der neersticheyt ende ghetrouwicheydt eens Propheten wordt onder die ghelijckenisse eens wachters bediet ende te verstaen ghegeuen, Die Propheet breect den Ioden haren valschen hope.

Dat .xxxiij. Capittel

1

⁺ENde des HEREN woort gheschiede tot mi, ende sprac.

+ A vers 1

2

Du menschen kint, Predict teghen dijn volck, ende segt tot haer, Wanneer ic een sweert ouer een landt brenghe, dan neemt dat volc inden lande onder haer eenen man, ende maect hem tot eenen wachter,

3

Ende als hi dat sweert siet comen ouer dat lant, so blaest hi die trompette, ende waerschout dat volc.

4

So wie nv den clanc der trompetten hoorde, ende en woude hem nyet hoeden, ende dat sweert quame ende name hem wech, des seluen ^a bloet sy op sijn eyghen hooft,

a bloet, dats sonde.

5

Want hi heeft der trompetten gheclanc ghehoort, ende hi en hoede hem nochtans niet, Daeromme si sijn bloet op hem, Maer ist dat hi hem hoet, sal hi sijn leuen behouden.

6

Maer in dien die wachter saech dat sweert comen ende en blies die trompette niet, noch en waerschoude sijn volc niet, ende dat sweert quame, ende name sommighe wech, Die selue souden om haerder sonden wille wech ghenomen worden, Maer sijn bloet wil ick van des wachters hant eysschen.

7

Ende du menschen kint, Ic hebbe v tot eenen ⁺ wachter ghesedt ouer dat huys Israhels, ⁺ als ghi wat wt mijnen monde hoorde, dat ghijt haer van mijnen weghen waerschouwen soudt.

+ Een propheet is een wachter.

+ B vers 7

8

Als ic nv totten godloosen segge Ghi godloose moet den doot steruen, Ende ghy en segt hem sulcx niet, op dat hem dye godloose hoede van sinen godloosen wesen, Soo sal effen wel die godloose om zijns godloosens wesens wille steruen, Mer zijn bloet wil ic van dijnder hant eysschen.

9

Maer in dien ghy den godloosen van sinen wegen waerschout, op dat hi hem daer van bekeere, Ende dat hy hem niet en wil van sinen wesen bekeeren, soo sal hi om sijnder sonden wil ster-uen, Ende ghi hebt uwe siele verlost.

10

Daeromme du menschen kint, segt den huyse Israels, O huys Israel, ghi segt alsoo. Onse sonden ende misdaden ligghen op ons, dat wy daer onder vergaen Hoe connen wi dan gheleuen?

11

So segt tot haer, So waerlic als ic leue, spreect die HERE God, Ick en hebbe gheen behaghen aen den doot des godloosen, Maer dat hem die godloose bekeere van sinen wegen, ende leue, Daeromme bekeert v doch nv, van uwen boosen weghen, Waeromme wilt ghi doch steruen? O ghi vanden huyse Israels?

12

Ende du menschen kint, segt tot dijnen volcke, Wanneer een gerechte quaet doet, ⁺ Soo en salt hem niet helpen dat hi gerecht geweest is. Ende als een godlose oprecht wort, ⁺ so en sal hem niet schaden dat hi godloos geweest is. Daerom en can die oprechte niet gheleuen als hi sondicht.

+ Matth. xxiiij. Ro. xij.

+ C vers 12

13

Want in dien ic totten gherechten sprake, Hi sal leuen, ende hi verlaet hem op sijn gerechticheyt, ende doet quaet, So en sal alle sijn gherechticheyt niet aengesien worden, Mer hi sal steruen in sijn boosheyt, die hi doet.

14

Ende wanneer ic tot eenen godloosen sprake, Hi sal steruen, ende hi bekeert hem van sijnder sonde, ende doet dat recht ende goet is,

15

Alsoo dat dye godloose dat pant weder gheuet, Ende hi betaelt dat hi gherooft heeft, ende wandelt na dat woort des leuens, dat hy gheen boosheyt en doet, soo sal hy leuen, ende niet steruen,

16

Ende alle sine sonden die hi gedaen heeft, die sullen vergheuen sijn, Want hy nv doet, dat recht ende goet is, Daeromme sal hi leuen.

17

Nochtans spreect dijn volck, Die HERE en oordeelt nyedt recht, Hoe wel nochtans si veel meer onrechts hebben,

18

Want in dien die gherechte hem keeret van sijnder gherechticheyt, ende doet quaet, So sal hi met rechts daeromme steruen.

19

Ende in dien die godlose hem bekeert van sine godloose wegen, ende doet dat recht ende goet is, So sal hy ymmer billicx leuen.

20

Noch segt ghi, Die HERE en ordeelt niet recht, In dyen ic nochtans eenen yegeliken van v, O ghi vanden huyse Israel na sine weghen oordeele.

21

Ende het gheschiede inden twelfsten iare, van onse geuangenissen, opten vijfsten dach der thiender maent, doen quam tot mi een die ontuloden was van Hierusalem, ende seyde.

22

Die stadt is geslagen, ende die hant des HEREN was ouer my, des auonts (eer die ontlopene quam) ende dede my mijnen mont op, tot dat hi tot mi quam des morgens. Ende hi dede mi mijnen mont op, also dat ic niet meer gheswijghen en conde.

23

Ende des HEREN woort gheschiede tot my, ende sprack,

24

Du menschen kint, Die inwoonders des woesten lants Israel segghen alsoo. Abraham was een eenich man, ende heeft dit landt in ghehadt, Maer onse is vele. Daeromme hebben wy dit landt te besitten met veel meerder recht.

25

Ende daeromme segt tot haer, Also seyt die HEERE God. Bloet hebt ghi verslonden, Ende uwe ooghen totten Beelden op gheheuen, ⁺ Ende bloedt hebt ghi ghestort, ende meent ghi dat landt te besitten?

+ Leu. xx Deut. x

26

Iae ghi vaert altoos voort met moorden, ende oeffent grouwelen, Ende deene schent den anderen sijn wijf, Ende meent ghy dit lant te besitten?

27

Daerom spreect tot haer, Alsoo spreect die HERE God, So waerlic als ick leue, Alle die inder woestijnen woonen, die sullen metten sweerde vergaen. Ende so wat opten velde is, dat wil ic den beesten te verslinden gheuen.

28

⁺Ende die in stercke vaste plaetsen ende holen sijn, dye sullen vander pestilentie steruen, Want ick wil dat landt gheheel verwoesten, ende sijnder houaerdije ende macht een

+ D vers 28

[p. *]

eynde maken, dattet geberchte Israels so woest worde datter niemant door gegaen en can.

29

Ende si sullen leeren dat ic die HERE ben, als ic dat lant gansch verwoest hebbe, om alle haerder grouwelen wille die si bedrijuen.

30

Ende du menschen kint, Dijn volc spreect tegen v herwaerts ende ghins, op die straten ende voor dye doren, Ende een yegelic seyt totten anderen, Lieue coemt, ende laet ons hooren wat die HERE seyt.

31

Ende si sullen tot v comen gelijc als een groot volc, ende voor v neder sitten, als mijn volc, ende sullen dijne woorden hooren, ende daer niet nae doen, Mer met haren mont doen si, recht als waren si bernende ontsteken, ende effen wel leuen si nae haerder giericheit. Ende siet,

32

Ghi moet haer liedeken sijn, dat si gheerne singhen ende spelen sullen,

33

Also sullen si dijne woorden hooren, ende daer niet na doen,

34

Maer alst coemt, datter comen sal, Siet, so sullen si weten, dat een Propheet onder haer gheweest is.