Den Bybel met groter neersticheyt ghecorrigeert (Liesveltbijbel 1542)

Teghen Pharao den coninc in Egipten.

Dat .xxxi. Capittel.

1

⁺ENde het gheschyede inden elfsten iare opten eersten dach der derder maendt, dat des HEREN woordt tot my gheschiede, ende sprac,

+ A vers 1

2

Du menschen kint, Segt tot Pharao den Egipschen coninck, ende tot alle zijn volck, Hoe groot meent ghy dan dat ghy sijt.

3

Syet Assur was ghelijc als eenen Cederboom opten berch Libanon, schoon van tacken, ende die van loof, ende seer hooch also dat sinen top onder die grote dicke tacken stont zeer hooch verheuen. Hi hadde veel waters waerom hi hooch wert, ende veel water aderen alsoe dat hi stercke wert,

4

ront om sinen stamme ginghen waterstromen, Sine water grachten liet hi wtloopen, tot alle boomen inden velde,

5

Ende daerom is hi hooger geworden, dan alle dye boomen opten velde, ende hy creech veel ende langhe tacken, Want hi hadde waters genoech hem wt te breeden,

6

Alle dye voghels des hemels nestelden op sine tacken, Ende onder sine meyen creghen alle dye dieren des velts ionghen. Ende onder sine scaduwe woonden alle volckeren.

7

Hi hadde schoone grote, ende lange tacken, want sine wortelen hadden veel waters.

8

Ende gheenen Cederboom en was hem oock ghelijck. Inden Lusthof Goods en was gheenen Denneboom, dye hem in sine tacken ghelijcken mochte, Dye platani, ende mandelboomen en waren niet bi sine tacken te gelijcken, Ia hi was also scoone als eenighen boomen

[p. *]

inden houe oft paradijse Gods,

9

Also schoone hadde ick hem gemaect dat hi so veel tacken creech, dat hem alle die boomen inden Paradise oft lusthoue Gods benijden

10

⁺Daeromme spreect die HERE God also, Want hy hem hooch verheuen heeft, dat sinen top stont onder groote, hooge, dicke tacken, Ia tot in dye wolcken gestrect, Ende hy zijn herte verhief, om dat hi soo hooch was.

+ B vers 10

11

Daeromme gaf ic hem den machtichsten onder dye heydenen in dye handen, ⁺ dat hy met hem soude omme gaen, ende ooc verdrijuen, gelijck als hy verdient hadde, met sinen godlosen wesen,

+ i.Reg. ij Luce. i prouer. xxix.

12

op dat hem die vreemden souden wtroyen, te weten, Die Tyrannen der heydenen, ende hem verderuen, Ia dat sine tacken op alle bergen, ende alle dalen ligghen moeten. Ende sine meyen sullen gebroken worden, aen alle beken des lants

13

Dan sullen alle volckeren opter aerden van sine schaduwe aftrecken moeten, ende hem verlaten. Alle dat gheuogelte des hemels, sal na sinen val op hem sitten,

14

ende alle die wilde dieren des velts, sullen in sine afgehouwen tacken logeren, op dat voortaen geenen boom aenden wateren hem verheffe van zijnder hoochte dat sinen toppe onder grote, hooge, dicke tacken staet Ende sinen toppe niet tot aen die wolcken wt en strecke Ende dat geenen boom aenden water hem en verheffe teghen den anderen. Want si moeten alle onder die aerde ende den doot ouerghegeuen worden, gelijc als ander menschen die in die grachten varen.

15

Also spreect dye HERE God, Ter tijt doen hy hier onder in dye helle of kuyle voer, ⁺ doen maecte ic een clage, dat hem die diepten bedecten, ende sine waterstroomen stille staen moesten, ende die grote wateren niet ghelopen en conden Ende ick maecte, dat Lybanus om sinen wille droeuich was, Ende alle die boomen opten velde verdorden van sinent weghen.

+ C vers 15

16

Ic veruaerde die heydenen dat si beefden doen si hem hoorden vallen. Doen ick hem hier onder stiet, ter hellen, met den ghenen dye in die cuylen varen. Alle die lustighe boomen opter der aerden die gonnent hem wel,

17

Die edelste ende beste op den Lybanon. Ende alle die aen dat water stonden, want si moesten oock met hem hier onder ter hellen, tot die verslagen metten sweerde, die voortijts onder die scaduwe zijns arms gewoont hebben onder die Heydenen.

18

Hoe groot meent ghi dan dat ghi O Pharao zijt met dijn opgheblasenheyt ende heerlicheyt onder dye lustighe boomen? Want ghi moet met die lustige boomen onder dye aerde henen wech varen, ende onder die onbesneden ligghen, dye metten swaerde verslagen zijn. Alsoo salt v o Pharao gaen, met alle dijnen volcke, spreect die HERE God.