Den Bybel met groter neersticheyt ghecorrigeert (Liesveltbijbel 1542)

Een ghemeen berispinghe, inden welcken der Ioden schalcheyt ende ondancbaerheyt beswaert wert, Ende de godlike goetheit ende lancmoedicheyt, dat hi die godloose schalcken soo langhe spaert.

Dat .xx. Capittel

1

⁺ENde het gheschiede inden seuenden iare, inden thienden daghe der vijfster maent, doen quamen somige wt vanden Outsten Israels den HERE te vragen, ende si stelden haer voor mi neder,

+ A vers 1

2

Doen gheschiede des HEREN woort tot mi, ende sprack. Du menschen kint, Segt den outsten Israels, ende spreect tot haer. Also spreect die HERE God.

3

Sijt ghi comen om mi te vragen? So waerlic als ic leue, ic en wil v geen antwoort geuen, seyt die HEERE Godt,

4

Mer wilt ghise straffen du menschen kint? Soe mogestu haer also straffen. Bewijst haer die gruwelen haerder vooruaderen, ende segt tot haer.

5

Also seyt die HERE God, Ter tijt doen ic Israel vercoos, verhief ic mijne hant tot dat saedt des huys Iacobs, ende ic gaf mi haer te kennen in Egipten lant, Ia ic verhief mijn hant tot haer ende sprac. Ic ben die HERE uwe God,

6

Ic verhief ter seluer tijt mijn hant, dat icse leyde wt Egypten lant, in een lant dat ick haer voorsien hadde, dat met melcke ende honich vloeyde, een edel lant bi alle landen,

7

Ende segt tot haer Een yegelic werpe wech die grouwelen van sinen oogen Ende en besmet v niet aen die beelden Egypti, Want ic ben die HERE uwe God.

8

Mer si waren mi ongehoorsaem, ende en wouden mi niet hooren, ende haerder gheen en worp die grouwelen wech voor sinen oogen, ende si en verlieten die beelden Egipti niet, doen dacht ic mijn verbolgentheyt ouer haer wt te scudden, ende mijnen ganschen thoorne ouer haer te laten gaen in Egipten lant.

9

Mer ic liet om mijns naems wille, op dat hi niet ontheylicht en soude worden bi den heydenen, onder den welcken si waren, ende voor den welcken ic mi haer hadde te kennen gegeuen dat icse wt Egypten lant leyden soude.

10

Ende doen icse wt Egypten lant gheleyt hadde, ende in die woestijne gebracht,

11

doen leerde ic haer mine geboden ende rechten, Waer door dat dye mensche leuet, diese onderhout.

12

Ic gaf haer ooc mijnen Sabbath tot een teeken tusschen mi ende haer, op dat si leeren souden, dat ic die HERE si, die haer heylicht,

13

Mer dat huys Israels was mi ongehoorsaem, ooc inder woestijne, ende si en leefden niet na mijne geboden, ende si verachteden mijne rechten, door welcken die mensce leuet diese hout, Ende si ontheylichden mijnen Sabbath groteliken. Doen gedacht ic mijn gramscap ouer haer wt te schudden inder woestijne, ende haer gansschelijck te verdoen,

14

Maer ic liet om mijns naems wille, op dat hi niet ontheylicht en worde voor die heidenen, voor den welcken icse wtgeleyt hadde.

15

Ende ic hief mijn hant ooc op tegen haer in de woestijne, also dat icse niet en woude brenghen in dat lant dat ic haer gegeuen hadde, daer melc ende honich vloeyde, een edel lant voor alle landen,

16

Daeromme dat sy mijne rechten verachtet, ende na mijne geboden niet geleeft, ende mijnen Sabbath ontheylicht hadden, Want si wandelden na die beelden ende goykens haerder herten,

17

Mer mijne ^a ooge spaerde haer, dat icse niet en verderfde, noch gansschelic en vernielde inder woestijne

a ooghe dats mijn oordeel ofte vonnisse

18

Ende ic sprac tot hare kinderen inder woestijne Ghi en sult na uwer vooruaderen geboden niet leuen, ende haer rechten niet houden, ende aen hare beelden v nyet veronreynigen,

19

Want ic ben dye HERE uwe God,

[p. *]

Na mijn geboden sult ghi leuen, ende mijne gherechten sult ghi houden, ende daer na doen,

20

Ende mijne Sabbaten sult ghi heiligen, op dat si sijn een teeken tusscen mi ende v, daer mede dat ghi weten moget, dat ic die HEERE uwe God si.

21

Mer die kinderen waren mi ooc wederspannich, Si en leefden na mijne geboden niet, Si en hielden ooc mine gerechten niet, dat si daer na hadden gedaen, door welcke die mensce leuet, die die selue onderhout, Ende si ontheylichden mijne Sabbathen.

22

⁺Doen dacht ic mijn gramscap ouer haer wt te storten, ende mijnen geheelen toorne ouer haer te laten gaen, inder woestijnen. Maer ic keerde mijn hant ende liet dat om mijns naems wille, op dat hy niet ontheylicht en soude worden bi den heydenen, Voor den welcken icse wtgeleyt hadde.

+ B vers 22

23

Ic hief ooc mijn hant op inder woestijnen tegen haer, dat icse verstroyde onder die heydenen, ende veriaechde in die landen,

24

Daeromme dat si mijne geboden niet gehouden, ende mijne rechten veracht, ende mijne Sabbathen ontheylicht hadden, ende nae dye Beelden haerder voorvaders sagen, ⁺

+ Exo. xx deu. xiij.

25

Summa, Ick maectet also, dat haren Godsdienst haer niet en batede, ende hare leere haer niet en halp,

26

ende verworpse met haren offer, doen si alle eerste gheboorten door tvier verbernden, waer mede icse bedroefde, ende si leerden dat ick die HERE ben.

27

Daeromme spreect du menschen kint, met den huise Israels, ende segt tot haer. Also seyt de HEERE God, Vwe vaders hebben mi noch meer ghelastert ende getort, Want doen icse in dat lant gebracht hadde ouer welcken ic mijn hant opgeheuen hadde, dat ickt haer geuen soude.

28

So waer si eenen hueuel, oft dicken boom sagen, aldaer offerden si hare offeren, ende si brachten derwaerts hare onsalige gauen, Ende si roocten aldaer haren soeten ruecke, ende goten aldaer haren dranckoffer.

29

Maer ic sprac tot haer, Wat sal doch van dye Hoochten comen? derwaerts ghi dus gaet? Ende also heetse noch heden op desen dach die Hoochte.

30

⁺Daeromme segt totten huyse Israels, Also seit de HERE God. Ghi besmet v inden wegen uwer vaderen,

+ C vers 30

31

ende bedrijft hoererije met hare grouwelen, ende beulect v aen uwe Goykens ende beelden, den welcken ghi uwe gauen offert, ende uwe sonen ende dochteren door tvier verbernt, tot op desen tegenwoordigen dach toe, Ende ic soude v vanden huyse Israels antwoort gheuen? So waerlic als ic leue, spreect de HEERE God, Ic en wil v geen antwoort geuen,

32

Daer en bouen, tgene dat ghi denct. Wi willen doen gelijc die Heydenen, ende gelijc ander lieden, inden landen, hout ende steen aenbeden, dat sal v missen.

33

So waerlic als ic leue, seyt de HEERE God ⁺ Ic wil ouer v regneren met een stercke hant, ende wtgestrecten arme, ende met wtgestorte gramschappe,

+ exo. xiij. nu. xiiij. Hebr. iij.

34

Ende ic wil v den volckeren voeren, ende wt die landen derwaerts ghi verstroyt sijt, versamen, met een stercke hant, ende met eenen wtgestrecten arme, ende met wtghestorte gramscappe,

35

ende ic wil v brengen in die woestijne der volckeren, ende aldaer met v rechten, van aengesicht tot aengesicht,

36

gelijc ic met uwen vaderen inder woestijnen bi Egypten gerecht hebbe, Effen also wil ick ooc met v rechten, seyt die HERE God,

37

Ick wil v weder onder die roede brenghen, ende v in dye banden des verbonts bedwinghen,

38

Ende ic wil die afuallige ende die tegen mi ouergetreden hebben onder v wt vagen Ia wt den lande daer ghi nv in woont, wil icse leyden, ende int lant Israels niet laten, op dat ghy leeren sout, dat ic die HERE ben.

39

Daeromme ghi vanden huyse Israels, spreect dye HERE God, want ghi ymmer niet en wilt hooren, so gaet henen, ende diene een yeghelijck sine Beelden, ⁺ Mer laet mijnen heyligen name voortaen ongeschent met uwen offeren ende Beelden,

+ D vers 39

40

Want also seyt de HERE God. Op mijnen heyligen berch, opten hooghen berch Israels, aldaer sal mi dat ganssce huys Israels, ende alle die inden lande sijn dienen. Aldaer sullen si mi aengenaem sijn, Ende aldaer wil ic uwe Hefoffer ende eerstelingen uwer offeren eysschen, met alle den ghenen dat ghi mi heylicht,

41

ghi sult mi aengenaem sijn metten soeten ruecke, Als ic v wt den volckeren brengen, ende wt die landen vergaderen sal, derwaerts ghi verstroyt sijt, Ende ic sal in v geheylicht worden voor dye heydenen.

42

Ende ghi sult leeren dat ic die HERE ben, als ic v int lant Israels gebracht hebbe, in dat lant, waer ouer ic mijn hant ophief, dat ic uwen vaderen geuen soude

43

Aldaer sult ghi gedencken op uwe wegen, ende op al uwe wercken, daer ghi in besmet sijt, ende ghi sult een mishagen hebben ouer alle uwe boosheyt, die ghi gedaen hebt.

44

Ende ghi sult beuinden dat ic de HEERE si, Als ic met v handele om mijns naems wiile, ende niet na uwe boose wegen, ende scadelijcke wercken. Du huys Israels spreect die HERE God.