Den Bybel met groter neersticheyt ghecorrigeert (Liesveltbijbel 1542)

¶ God beueelt den propheet tegen dat suyden te propheteren, Ende den volcke te vercondigen, wat straffinghe dat die Babiloonsche coninc ten derden male ouer haer, Ende die Ammoniten brengen sal

Dat .xxi. Capittel

1

⁺ENde des HEREN woort gheschiede tot mi, ende sprac.

+ A vers 1

2

Du menschen soon keert dijn aensicht tegen Theman, oft suyden, ende spreect teghen den suyden, ende propheteert tegen dat wout inden velde tegen dat suyden. Ende spreect tot die wildernisse suytwaerts, Hoort dat woort des HEREN, Also spreect die HERE God.

3

Siet, ic wil in v een vier ontsteken, dat sal beyde groene ende die dorre boomen verslinden, alsoo datmen sijn vlamme niet en sal connen gelesschen, Mer al dat hem vanden suyden tegen dat Noorden strect dat sal verbrant worden,

4

Ende alle vleesch sal sien, dat ict die HEERE aengestooct hebbe, ende dat nyemant lesschen en sal mogen. Ende ic sprac. Ach HERE God Si seggen van mi, Dese spreect enckel bedecte woorden ende fabulen.

5

Ende des HEEREN woort gesciede tot mi, ende sprac,

6

du menschen kint, stelt v aensicht teghen Hierusalem, ende spreect tegen die Heylichdommen, ende propheteert tegen dat lant Israels, Ende segt totten lande Israels. Also seyt die HERE God,

7

Siet ic wil aen v, Ic wil mijn sweert wter scheeden trecken, ende ic wil beyde die gerechte ende die ongherechte van v wtroeyen,

8

Aengesien dat ic dan v beyde, die gerechte ende die ongerechte wtroye, so sal mijn sweert wt der scheeden varen ouer alle vleesch vanden suyden aen totten Noorden toe,

9

Ende alle vleesch sal vernemen, ⁺ dat ic die HEERE mijn sweert heb wt sijnder sceeden ghetoghen, ende ten sal nyet weder ingesteken worden.

+ B vers 9

10

Ende du menschen soon, sucht tot dat v die lenden wee doen, Ia bitterlijcken sult ghi suchten, dat sijt sien

11

Ende als si tot v seggen sullen, Waeromme versucht ghi also, So sult ghi seggen, Om des gheroeps ende der tijdingen wille, die daer coemt, voor welcke alle herten versagen, ende alle handen sincken, alder lieden moet vallet ende alle knien gelijc als water beuen sullen. Siet, Het coemt, ende het sal gescieden seyt die HEERE God.

12

Ende des HEREN woort gheschiede tot mi, ende

[p. *]

sprac.

13

Du menschen soon, Propheteert, ende segt. Also spreect die HERE God, Dat sweert, ia dat sweert is gescerpt ende geslepen, Het ist gescerpt dattet slaen sal,

14

het is geslepen, ende gheuaecht, dattet glistert, O hoe vrolijcken wouden wi sijn, als hi alle boomen tot roeden maecte ouer die boose kinderen,

15

Maer hi heuet een sweert te bruyneren gegeuen datment vatten mach, Het is gescherpt ende geuaecht, datment den doetslager in die hant gheue.

16

O du menschen kint, schreyt ende huylt, Want het gaet ouer mijn volc, ende ouer alle regenten in Israel, die totten sweerde met mijnen volcken vergadert sijn. Daeromme slaet op dine dgyen.

17

Want hy heeftse dicwils gecastijt, wat heuet geholpen? Die roede der booser kinderen en helpet niet, spreect die HERE God.

18

⁺Ende du menschen kint, Propheteert, ende slaet dine handen te samen, Want dat sweert sal gedubbeleert, Ia gedrieuoudicht comen, Een moortsweert, een sweert van veel dootslagen, dwelck haer ooc raken sal inde cameren, derwaerts si vlieden

+ C vers 18

19

Ic wil dat sweert laten clincken, also dat die herten versaghen, ende haerder veel vallen sullen aen allen haren poorten. Ach hoe blincket, ende het is om te houwen ende te slaen geuat. Ende seggen,

20

hout daer in, beyde ter rechter siden ende ter slincker, so wat voor v is.

21

Dan wil ic mijn handen tsamen slaen van blijscappen, Ende mijn verborgentheyt laten gaen, Ic die HERE hebt geseyt.

22

Ende des HEREN woort gesciede tot my, ende sprac.

23

Du menschen kint, Maect twee weghen, door welcke comen sal dat sweert des conincx tot Babel, Beyde die straten sullen wt eenen lande gaen, Ende stelt een teeken aenden wech totter stadt derwaerts dattet wise.

24

Ende maect den wech dattet sweert come tot Rabbath der kinderen Ammon, Ende in Iuda, totter stercker stadt Hierusalem,

25

Want die coninck tot Babilonien sal hem opten tweewech stellen, voor aen beyde die straten, dat hi die Waerseggers vrage, ende metten pijlen om dat lodt werpe, sinen afgod vrage, ende die leuere besie.

26

Ende die waersegginghe sal op die rechte side tot Hierusalem wijsen, Dat hi bocken ende rammen laet aenuoeren, ende gaten maken, ende dat hise met eenen grooten alarme ende moort ouerualle, ende dat hy bocken voeren soude tegen die poorten, ende dat hi aldaer wallen, scantsen, ende bolwerc make.

27

Maer si sullen alsulcke waersegginge valsch ende ydel houden, Al sweert die waersegger haer, alsoo hooch als hi wil, Maer hi sal der misdaet gedencken, dat hi die stadt gewinne.

28

Daeromme spreect de HERE God also, Om dat uwer gedacht wort van uwer misdaets wegen, ende uwe ongehoorsaemheyt gheopenbaert is, alsoo datmen uwe sonden siet in alle uwe wercken, Iae daeromme dat uwer ghedacht wort, sult ghy met ghewelt gheuanghen worden.

29

Ende du Vorste Israels, ghi die verdoemt ende veroordeelt sijt, Den dach is comen, dat die misdaet een eynde nemen sal.

30

Also seyt die HERE God, Doet wech den bisscops hoet, ende set af die croone, Want noch den mijtre, noch die croone en sal blijuen, Mer die hem verheuen heeft, die sal vernedert worden, Ende die hem vernedert, die sal verheuen worden.

31

Ick wil die croone tot niet, tot niet, tot niet maken, tot dat hi come, diese hebben sal, dien wil icse geuen.

32

⁺Ende du menschen kint, Propheteert ende segt, Also spreect die HERE God, vanden kinderen Ammon, ende van haren lasteren, Ende segt, Dat sweert, dat sweert is getogen, dattet doot slaen soude, Het is gheuaecht dattet vermoorden soude,

+ D vers 32

33

Ende het bliuet om dat ghi v valsche gesichten ende visioenen seggen laet, ende logenen predict, Waer mede ghi ooc ouergegeuen sult worden onder die verslagen godlosen, der welcker dach quam, doen die misdaet totten eynde gecomen was,

34

ende oft al weder in die scheede gesteken wort, So wil ic v nochtans oordeelen in die plaetse, daer ghi geschapen, ende inden lande daer ghi geboren sijt,

35

ende wil mijnen thoorne ouer v wt storten, Ic wil dat vier mijnder gramscappen ouer v opblasen, ende ic wil v ouerleueren dien lieden, die haer des bernens ende verderuens wel verstaen,

36

Ghi moet den viere een spijse worden, ende v bloet moet inden lande gestort worden, Ende men sal dijnder niet meer ghedencken, Want ic die HERE hebt gesproken.