Den Bybel met groter neersticheyt ghecorrigeert (Liesveltbijbel 1542)

Ieremias scrijft die prekinghen in een boeck, Ende hy belooft sinen volcke vrolijcke dinghen, Een medelijdende claghe ouer Ierusalem ende dat volcke.

Hier mocht men beghinnen die ander helft Ieremie, wandt die groote beloften sijn teghen dye voorgaende dreyghinghen, Ende si luyden, oft si nader gheuanghenissen gheschiet waren.

Dat .xxx. Capittel

1

⁺DIt is dat woort dat gheschiede tot Iheremiam,

+ A vers 1

2

Also spreect die HERE God Israels, Scrijft v alle dese woorden in eenen boecke, die ic tot v spreke,

3

Want siet, Die tijt comt, spreect dye HERE dat ic die geuangenisse mijns volcx, beyde Israhel ende Iuda, wenden wille spreect die HERE. Ende ic wilse weder brenghen in dat lant, dat ic uwen vooruaderen ghegeuen hebbe, dat si dat besitten sullen.

4

Maer dit sijn die woorden, welcke die HEERE spreect van Israhel ende Iuda,

5

want also spreect die HERE. Het is doch waer, Het ghaet ymmer iammerlijck. Daer is enckel vreese ende onurede,

6

Maer vraecht doch ende besiet, oft oock eens mans persoon kinderen baren mach. Hoe gatet dan toe? dat ic alle die mannen sie, haer handen op die lendenen slaen, ghelijck die wijuen inder kints nooden? Wie heeft oyt gesien dat een man kinderen baerde? Lieue vraecht doch daer na, ende vernemet, Iae haerder alder aensichten sijn gansch verbleect,

7

Och des daechs dye soo groot is, dat sijns gelijc geenen geweest en is, ende het is een tijt des ancxts in Iacob, nochtans sal hy daer wt verlost worden.

8

⁺Want ic wil op die selue tijt spreect dye HERE der heyrscharen, sijn iock van dijnen halse ontstucken breken, ende dijnen bant in tween schoren, ende wil dat hi niet meer daer onder den vreemden dienen en sal,

+ B vers 8

9

Mer den HEERE sinen God ende Dauid sinen Coninck, welcken ick hen verwecken wil.

10

Daerom en versaecht v niet. O mijn knecht Iacob, spreket die HERE, ende en veruaert v nyet Israel. Want siet, ick wil v oock van verre landen, ende dijn zaedt wt den lande haerder gheuanghenissen helpen, Ia dat Iacob sal weder comen, ende in vreden leuen ende genoech hebben sal. Ende nyemant en sal hem veruaren,

11

Want ick ben bi v, seyt die HERE, dat ic v helpe, Want ick wil met alle Heydenen een eynde maken, onder welcken ick v verstroyt hebbe. Mer met v en wil ick gheen eynde maken, Nochtans wil ic v castijen, maer met bescheydenheit, op dat ghi v niet onschuldich en kent.

12

⁺Want also spreect die HEERE, Dijn schande is te groote, ende dijne wonden sijn te boosch.

+ C vers 12

13

Nyemant en isser, die dijne saecke handele (oft bescerme) oft die dijne wonden verbonde, waeromme ghy oock niet ghesont en wort.

14

Alle dijne liefhebbers vergheten dijns, ende en vraghen na v niet. Ick hebbe v gheslaghen, recht oft ic eenen vyant hadde gheslaghen, ende hebbe v rouwelijcken ghestraft, om dijnre grooter misdaden wille,

15

Want dijne sonden hebben sterckelic die ouerhant ghenomen. Waeromme beweenstu dijne schaden? Ic hebbe selfs een medelijden met dijne smerten, Maer om der menichten wille dijnre misdaden ende sonden hebbe ick dit ghedaen.

16

Daeromme alle die ghene die v verslonden hebben, die sullen verslonden worden, ende alle die v benauwet hebben, die sullen in die geuanckenisse geleyt worden. Ende alle die v verwoest hebben, dye sullen verwoest worden, ende alle dye v berooft, ende gheplundert hebben, die sullen berooft worden,

17

Want ick wil v weder ghesont maken, ende dijne wonden heelen, seyt die HEERE, Daeromme dat si v die verstootene heeten, O Syon, na der welcker nyemant en vraghet.

18

Want also spreect die HERE, Siet, ⁺ ick wil dye gheuanghenisse des huys Iacobs weder op richten, ende wil haerder woninghen ghonstich sijn. Dye stadt sal op haer oude hooftstadt ghetymmert worden, ende den tempel sal staen als hy behoort te staen.

+ D vers 18

19

Ende van daer sal wtgaen lof ende vruechde. Want ick wilse vermeerderen ende nyet verminderen Ick wilse groot maken ende nyedt vercleenen,

20

Haer kinderen sullen sijn ghelijck te voren, ende haer ghemeente sal voor mi blijuen, Want ic wilse besoecken alle diese plaghen,

21

Maer hare gheweldighen (ende Vorsten) sullen wt haer seluen gheboren worden Ende haer heeren van haer seluen comen, Ende ick wilse voor mi laten comen dat si mi offeren, Want wie gheeft anders sijn herte dat hi gheerne tot mi come? seyt die HERE,

22

Ende ghi sult mijn volc sijn, ende ick wil v God sijn.

23

Siet, Den thoorne des HEREN sal comen, gelijck een groot onwedere, ende ghelijck eenen grouwelijcken draeywint, sal hi den godlosen op den coppe vallen.

24

Wandt den grammen thoorne des HEEREN en sal niet aflaten, tot dat hy ghedaen ende volbracht hebbe zijns herten voornemen, dat selue sult ghi inder nacomender tijt wel verstaen.