Den Bybel met groter neersticheyt ghecorrigeert (Liesveltbijbel 1542)

Eenen brief dyen Hieremias den geuangenen tot Babylonien seynt, inden welcken hy haer heet huysen timmeren, planten, ende andere menschelijcke wercken te oefenen. Ende die geuanghenisse met alder ootmoedicheydt te lijden, want si lange dueren sal. Hoe dat dye ghestraft worden, die daer teghen leeren.

Dat .xxix. Capittel.

1

⁺DIt is een Copie des briefs dye Hieremias die propheet geseyndt hadde van hierusalem totten geuangenen, den outsten (oft raedtsheeren) ende den priesteren, den propheten, ende allen den volcke, die welcke NebucadNezar van Hierusalem tot Babel gheuoerdt hadde,

+ A vers 1

2

na dyen dat die coninck Iechonias, ende dye Coninginne metten Camerlinghen ende den Vorsten Iuda ende Hierusalem metten timmerlieden, ende smeden Hierusalems wech waren,

3

welcken brief gedragen hebben, Eleosa, dye sone Zaphan, ende Gamaria, dye sone Hilkia, ⁺ dye Zedekias dye Coninc Iuda sandt tot Babel tot NebucadNezar den Coninc tot Babel.

Ende den brief luyde also.

+ B vers 3

4

Aldus spreect die HEERE der heyrscaren God Israels, tot allen geuangen die ick van Hierusalem hebbe laten wech voeren tot Babel,

5

Timmert huysen daer ghy inne woonen moecht. Plant wijngaerden, daer van ghi dye vruchten eten moecht.

6

Neemt wiuen, ende windt sonen ende dochteren. Geeft uwen sonen wijuen ende uwen dochteren mannen, dat si sonen ende dochteren crijghen. Vermeerdert v seluen, dat uwer seer veel worden.

7

Syet aen der stadt weluaert, daer ghi in gheuangen sijt. Ende biddet den HERE voor haer. Wandt alst haer wel gaet, so gatet v oock wel.

8

Want also spreect die HERE der heyrscharen Godt Israels, en laet v uwe propheten ende waerseggers, die bi v sijn niet bedrieghen, Ende en ghelooft uwen droomers niet, die v droomen.

9

Want si propheteren v luegenen in mijnen name, Ic en hebse niet ghesonden spreect die HERE.

10

Alsoo spreeckt die HERE, Wanneer tot Babel die tseuentich iaer veruult sijn, so wil ic v thuys voeren ende ic wil v wt mijnder goedertierenheydt weder tot deser plaetsen brenghen.

11

Wandt ick weet wel, wat ic ouer v voorghenomen hebbe, spreeckt die HERE, Te weten mijn voornemen is des vredes ende des leedts dat ick geue dat eynde, dat welcke ghy verwachtet.

12

Ghi sult mi aenroepen, ende ghi sult gaen, ende mi bidden ende ic sal v verhooren

13

Ghi sult my soecken ende ooc vinden Want als ghi my van gansser herten sult soecken, so wil ic my van v laten vinden, spreect dye HERE,

14

ende sal v wt der geuangenissen verlossen, ende v vergaderen wt allen volcken, ende van allen plaetsen, derwaerts ic v verstroyt hebbe, seyt die HERE. ⁺ Ende ick wil v wederomme tot deser plaetsen brenghen, van daer ic v hebbe laten wech voeren.

+ C vers 14

15

Maer ghy meendt, dat dye HERE tot Babilonien propheten verweckt heeft,

16

Daeromme seydt dye HERE also vanden coninghen, dye op Dauids stoele sitten, ende van alle den volcke, dat inder stadt woont, te weten van uwen broederen, die met v niet inder gheuanghenissen getogen en zijn.

17

Ia also spreect die HERE der heyrscaren, Siet, Ick wil ouer haer seynden sweert, hongher, ende pestilencie,

18

ende ick wilse maken gelijck als die quade vijghen, daermen dye walghinge af crighet, onder den eten. Ende ick wilse metten sweerde hongher, ende pestilencie veruolghen. Ende ick en wilse in gheen Conincrijcke op aerden laten blijuen Iae dat si tot eenen vloeck ende grouwele, tot eenen spot ende schande ouer alle volck worden sullen, daer henen dat ickse verstroyt hebbe.

19

Daeromme dat si mijnen woorden niedt ghehoorsaem en sijn, spreect die HEERE, dye ick door mijne knechten dye propheten daghelijckx ghesonden hebbe, Vroech ende tijdts ghenoech ben ick op ghestaen, ende heb dye tot haer ghesonden, Maer si en hebben nyet willen hooren (oft volghen) spreect die HERE.

20

Maer alle ghy gheuanghen, dye ick tot Babel ghesonden hebbe, ende van Hierusalem hebbe laten trecken, Hoort dat woordt des HEEREN.

21

Aldus seydt die HEERE der heyrscharen, die Godt Israhels, teghen Achba, den sone Kolaia, ende teghen Zedekiam den sone Maasie, dye v in mijnen name lueghenen propheteren. Siet ick wil v gheuen in die handen NebucadNezars des Babylonischen Coninckx, dye salse dooden voor uwen ooghen,

22

datmen wt den seluen eenen vloeck maken sal onder alle geuanghen wt Iuda, die tot Babel sijn, datse segghen sullen Dye HERE moet v doen, ghelijck als dye coninck van Babel Zedekiam ende Achba, op dat vier braden liet,

23

Om datse in Israhel schandelijcken ghesondicht (oft een dwaesheydt bedreuen) hadden, ende deden met haerder naesten ghetroude wijuen ouerspel, ende predicten lueghenen in mijnen name, dat ick haer nyedt beuolen en hadde, dat selue laet ic v oock weten, ende betuygen, seyt die HERE.

24

⁺Ende van Semaia dye Nehalamite sulstu alsoe segghen Aldus spreeckt die HERE der heyrscharen, ⁺ God Israhels,

+ D vers 24

+ iij.re. ij. ij.para. xxiij.

25

Daeromme dat ghi brieuen (onder dijnen name gheseghelt) ghesonden hebt tot alle den volcke, dat tot Hierusalem is, ende tot Zephoniam, den sone Maseia, den ouersten priestere, ende tot allen den priesters geseynt hebt, segghende.

26

Dye HERE heeft v tot eenen priester ghesedt, in dye plaedtse des priesters Iehoiada, op dat ghy dye ouerste soudt sijn inden huyse des HEREN ouer alle waersegghers (dulle ende besetene) dat ghijse inder gheuanghenissen (of inden stoc) soudt leggen,

27

Waeromme en straft ghi dan niedt Hieremiam van Anathoth? dye v propheteert?

28

Ia ooc daeromme dat hi tot ons tot Babylonien ghesonden heeft, ende laten segghen, Dattet noch langhe (met ons) dueren sal, dat wy huysen souden tymmeren, daer wy inne woonen mochten, ende dat wy houen souden planten, dat wy der vruchten ghenieteden,

29

Want Zephanias die priester heeft denseluen brief gelesen, ende Ieremiam den prophete liet hijt hooren.

30

Doen gheschiede dat woordt des HEREN tot Hieremiam, ende seyde

31

Sendet henen tot allen geuangenen, Ende laedt haer segghen, Also spreect die HEERE ouer Semeia van Nehalam, daeromme dat v Semeias propheteert, ende dat ic hem niet gesonden en hebbe, ende doet dat ghi op luegenen betrouwet,

32

Daeromme spreect die HEREE alsoo, Siet, ick wille Semaiam den Neelemite versoecken (oft straffen) ende zijn zaet, dat nyemandt vanden sinen onder dit volck bliuen en sal. Ende en sal dye goedertierenheit

[p. *]

niet sien, die ick mijnen volcke doen sal, spreeckt dye HERE, Wandt hi heeft valschelijcken teghen den HERE ghepredict.