Den Bybel met groter neersticheyt ghecorrigeert (Liesveltbijbel 1542)

¶ Dat .xi. Capittel.

1

⁺LAet v broot ouer dat water varen, soo sult ghijt vinden na langhen tijt,

+ A vers 1

2

deelt wt onder seuen ende onder achte, want ghi en weet niet wat ongeluc opter aerden comen sal.

3

Als die wolcken vol sijn, so gheuen si reghen op die aerde. Ende als den boom valt, hy valle zuytwaerts oft noortwaerts, op welcke plaetse hi valt, daer sal hi ligghen,

4

wie op den wint achtet, die en saeydt niet, ende wie op die wolcken siet, dye en maeyt niet.

5

Ghelijc als ghi den wech des windts niet en weet, ende hoe die gebeenten in smoeders lichaem vol worden, also en condt ghi Gods wercken ooc niet gheweten, dat ghi doet ouer al.

6

⁺Vroech zaeyt v zaet, ende uwe hant en late tsauonts niet af, want ghi en weet niet, oft dit of dat wel geraken sal ende oft beyde wel geraecte, soo wert des te beter,

+ B vers 6

7

dat licht is soete, ende den ooghen lieflic die sonne te sien.

8

Al ist dat een mensche langhe leeft, ende en is nyet vrolic in allen dinghen, so gedenct hi doch alleen des quader daghen, dat haerder so vele is, want allet dat hem ghemoet is, dat is ydel.