Den Bybel met groter neersticheyt ghecorrigeert (Liesveltbijbel 1542)

¶ In desen twee nauolgenden Capittelen sijn vele profijtelike leeringhen ende wijse sproken, welcke alle man wel behoort te aenmercken ende tonthouden.

Dat .x. Capittel.

1

⁺DAer is een ongeluc dat ic sach onder der sonnen, te wetene, onuerstant dat onder den machtigen gemeyne is.

+ A vers 1

2

Dat een sotte sittet in grooter waerdicheit, ende die rijcken hier beneden sitten.

3

Ic sach knechten op rijpaerden, ende princen te voet gaen, gelijc knechten.

4

Maer wie een cuyle maect die sal seluer daer inne vallen. Ende wie den tuyn breect, dyen sal een slange steken,

5

wie steenen wech wentelt, die sal daer moeyte mede hebben, ende wie hout clieft, die sal daer af ghequetst worden.

6

⁺Ist dat een ysere plomp werdt, ende aen die wate ongeslepen blijft, so moetment met macht weder scherpen.

+ B vers 6

7

Alsoo volget ooc wijsheyt der naersticheyt.

8

Een clappaert en is niet beter, dan een slange, die ombesworen steect.

9

Die woorden wt den monde eens wijsen sijn gracieus, Mer der sotten lippen verslinden den seluen,

10

dat beginsel sijnder woorden is sotheyt, ende dat eynde is schadelijcke dwaesheit.

11

⁺Een sotte maect veel woorden, want die mensche en wetet niet wat geweest is. Ende wie wil hem seggen wat nae hem sijn sal. Den arbeyt der sotter wort hem suer, Want men niet en weet in die stadt te gaen.

+ C vers 11

12

Wee v landt, dies Coninck een kint is, ende dyes princen vroech eten.

13

Wel v lant, wiens coninc edel is ende dies princen ter rechter tijt eten, ter stercheydt ende niet ter lust,

14

⁺want door luyheyt sincken die balcken, ende door versumelijcke handen, wert dat huys druypende, dat doet.

+ D vers 14

15

Si maken broot tot eenen lachen ende den wijn moet den leuende verbliden, Ende dat gelt moet hen alle te weghe brenghen.

16

En vloect den coninc niet in v herte, ende en vloect den rijcken niet in v slaepcamere, Want dye vogelen des hemels voeren die stemme. Ende die vederen hebben, segghent nae.