Den Bybel met groter neersticheyt ghecorrigeert (Liesveltbijbel 1542)

Dat .xxi. Capittel.

1

⁺DEs conincx herte is in die hant des HEREN gelijc waterbeken, ende hi neycht dat, werwaerts hi wilt.

+ A vers 1

2

Elcken behaecht sinen wech beste, mer die HERE drijft die herten.

3

Doen gherechticheyt ende oordeele, ⁺ is den HERE lieuer dan offerhande.

+ Pr. xlix i.re. xv c

4

Houaerdige ooghen ende stouten moet, ende die keersse der goelooser is sonde.

5

Die opsetten eens neerstighen brenghen oueruloedicheyt, Maer wie alte iachtich is heeft gebreck.

6

Die schatten vergadert met quader tonghen, dye faelgeren, ende vallen onder die, die den doot soecken.

7

Die roouen der godlooser salse veruaren, want si en wilden niet doen wat recht was.

8

Eens vreemden wech is verkeert, mer wie reyn is, dies werck is recht.

9

Het is beter woonen inden hoecke onder dat dack, dan bi eene kijfachtige vrouwe in eenen wijden huyse.

10

⁺ Die siele des godloosen wenschet arch, Ende en is den naesten nyet vrienthout.

+ B vers 10

11

Als dye spottere gestraft wort, so worden die onwetende wijse, ende alsomen eenen wijsen onderwijst, so neemt hi bescheydenheyt ane.

12

Dye gherechtige onderwijst dat huys des godloosen, Maer die godloose houden hen totten archsten.

13

Die sine oore verstoppet voor dat crijsschen des armen, dye sal ooc roepen ende niet verhoort worden.

14

Een heymelike gaue stillet die gramschap, ende een geschencke inden schoot die druystige verbolgentheyt.

15

Het is den gherechtigen een blijschap te doen dat recht is, Maer een vreese den quaetdoenders.

16

⁺Een mensche dye vanden wech der voorsienicheyt dolet, die sal blijuen inder dooden ghemeynte.

+ C vers 16

17

Wie gheerne vrolick is, sal ghebreck lijden, Ende wie wijn ende olye bemint en wort niet rijck.

18

Die godloose moet voor den gherechten ghegheuen worden, ⁺, ende die verachters voor die oprechten.

+ ecc. xxi c

19

Het is beter woonen in woesten lande, Dan bi eenen kijfachtighen ende toornighen wijue.

20

Inden huyse des wijsen is eenen edelen schat, ende olye, Mer een sotte slaet door.

21

Wie der gerechticheyt ende goetheit na volcht, Die vindet dat leuen, gherechticheyt ende eere.

22

Een wijse winnet een stadt der machtiger, Ende hare macht gaet onder van sekerheyt.

23

Wye sinen mont ende tonghe bewaert, Die bewaert sine siele van benautheyt.

24

Dye stout ende vermeten is, heet een spotter, Die toornicheit, ende stoutheyt bewijset.

25

Dat wenschen des luyen doodet hem, want sine handen en wilden niet doen.

26

⁺Hi wenschet wel daghelicx, ⁺ Maer die gherechte geeft ende en verhoudet niet.

+ D vers 26

+ pro. iiij.a

27

Der godlooser offerhande is een vereynsen, Want si worden in sonden geoffert.

28

Een luegenachtige getuyge sal vergaen, mer die hem gheseggen laet, die mach ooc alle wege spreken.

29

Die godlose vaerter metten hoofde door, mer wie oprechtich is, dies wech wort geuordert.

30

Het en helpt geen wijsheyt, geen verstant, geen conste, tegen den HERE

31

Paerden worden wel totten strijtdaghe bereit, maer God moet die victorie gheuen.