Den Bybel met groter neersticheyt ghecorrigeert (Liesveltbijbel 1542)

Dat .xxij. Capittel

[p. *]

1

⁺DAt goede gheruchte is costelijcker dan groote rijcdom. ⁺ Ende een gonst beter dan siluer ende gout,

+ A vers 1

+ Prouer. xxxij.

2

Rijcke ende armen sijn onder malcanderen, Die HERE heeftse alle ghemaect.

3

Die loose siet dat ongeluc ende verbercht hem, Dye onwijse gaen door wech ende worden beschadiget.

4

Waer des HEEREN vreese is in allendicheyt, daer is rijcdom, eere ende leuen

5

Spiessen ende stricken sijn opten wech des verkeerden, Mer die hem daer af veruerret, bewaert sine siele.

6

Onderwijset men den ionghelinc sinen wech, So en gaet hi daer niet af, als hi oudt wort.

7

Die rijcke heerschapt ouer die armen, Ende so wye ontleent, die is des leenders knecht.

8

⁺Dye onrecht saeyt, die sal moeyte maeyen, Ende sal door dye roede sijnder plaghen bedoruen worden.

+ B vers 8

9

Een goede oge wort geseegent, Dat hy sine broot den armen gheeft.

10

Drijft den spotter wt, so gaet den twist wech, So houdet op kijf ende smaet.

11

Wie gheerne reyn van herten is, ende gracieus van lippen, dies vrient is die coninck.

12

Die oogen des HEEREN bewaren die kennisse Maer die woorden des verachters verkeert hi.

13

Die trage seyt, daer buyten is een leeuwe, Ic mochte verworcht worden opter straten.

14

Der hoeren mont is eenen diepen putte, Wien dye HERE ongenadich is, die vallet daer inne.

15

Dwaesheit steect den iongelinc in sijn herte, ⁺ Maer die roede der castijdinge salse verre van hem drijuen.

+ C vers 15

16

Wye den armen onrecht doet, dat sijn goets vele soude worden, dye sal ooc eenen rijcken gheuen ende ghebrec hebben

17

Mijn kint, neycht uwe ooren, ende hoort die woorden der wisen, ende neemt mijne conste ter herten,

18

Want het sal v saechte doen, ist dat ghijse bi v hout, Ende sullen met malcanderen di wel af gaen wt uwen lippen.

19

Op dat uwen hope si opten HERE, Ic moete v sulcx dagelicx vermanen.

20

En heb ict v niet menichfuldelic voor ghescreuen. Door raet ende kennisse.

21

Dat ic v soude thoonen een seker fundament der waerheyt, Op dat ghi sout connen gheantwoorden met waerheyt den ghenen die v seynden. En berooft den armen niet, al is hi arm,

22

⁺Ende en verdruct den behoeuenden niet inder poorten,

+ D vers 22

23

Want die HERE sal haer sake oordeelen, ende sal wech trecken, die die sielen wech trecken.

24

En versellet v nyet metten toornigen man, ende en hout v niet bi eenen rasenden man.

25

Ghy mocht sine wegen leeren, ende uwer sielen verargeringe ontfaen.

26

En sijt niet bi dye ghene die haer hant verachten, ende voor schult borghe worden.

27

Want ist dat ghijt niet en hebt te betalen, soo salmen v uwe bedde onder v wech nemen.

28

En drijft niet te rugge die voorledene palen, dye uwe vaders gemaect hebben.

29

Siet ghy eenen man rasch in sinen wercke, die sal voor die coninghen staen ende en sal niet voor die onedele staen.