Den Bybel met groter neersticheyt ghecorrigeert (Liesveltbijbel 1542)

¶ Van dat rijcke des conincx Osie, ende wat hi ghetymmert heuet, Ende hoe hi lazarich wert, als hi hem des roockens onderwant, dat alleen den priester toebehoorde te doene.

Dat .xxvi. Capittel.

1

⁺DOen nam dat geheele volc Iuda, ⁺ Vsia die .xvi. iaer out was, ende maecten hem tot eenen coninc, in sijns vaders Amasia stede,

+ A vers 1

+ Dat rijc van Meden begint ende Arbatus een dienaer van Sardanopolus verwint, ende verslaet Sardanopolum sinen here, ende brengt die hoocheit van Assirien, op dat rijck van Meden, ende hy was dye eerste coninc van Meden, Die propheten Ozeas, Iohel Amos ende Abdias propheteerden in deser tijdt, als dye wereldt ghestaen had .iiij. duysendt ccc. ende lxxxviij iaer voor cristus gheboorte viij. hondert ende xi. iaer.

2

Die selfde tymmerde Eloth, ende brachtse weder aen Iuda na dien dat die Coninck ontslapen was, met sinen vaderen.

3

Vsia was .xvi. iaer out, doen hi coninc wert, ende regneerde xxij. iaer te Ierusalem. Sine moeder hiet Iechalia, van Ierusalem,

4

ende dede dat den HERE wel behaechde, gelijc sijn vader Amasia gedaen hadde,

5

ende hi sochte God also lange als Zacharia leefde, die leeraer inden ghesichte Gods, also langhe als hi den HERE sochte liet hem God ghelucken.

6

⁺Want hi troc wt, ende street tegen dye Philisteen, ende brac die mueren tot Gath, ende die mueren tot Iabne, ende die mueren tot Asdod, ende tymmerde steden om Asdod, ende onder die Philisteen,

+ B vers 6

7

want God halp hem tegen die Philisteen, tegen die Arabers tegen dye tot Garbaal, ende tegen die Meuniten,

8

Ende die Ammoniten gauen Vsia ghiften, ende hi wert vermaert tot datmen coemt in Egypten, Want hi werdt altoos stercker ende stercker.

9

Ende Vsia timmerde torens te Ierusalem aen dye hoeckpoorte, ende aen die dalpoorte, ende aen anderen hoecken, ende beuestichdese,

10

hi timmerde oock sloten in die woestijne, ende groef veel putten, Want hi hadde veel vees, beyde inden broecke ende op den effenen lande, oock ackerlieden ende wijngaerdeniers, aenden berghen ende aen Charmel, Want hi hadde lust tot acker werck.

11

Ende Vsia hadde een macht totten strijt die int heir trocken van crijschknechten int ghetal gherekent, Ieiel des scrijuers, ende Maesia des Amptmans, onder die hant Hanania wt den ouersten des conincx.

12

⁺Ende dat ghetal der principaelster vaders onder den stercken oorloochs lieden, was .ij. duysent ende seshondert,

+ C vers 12

13

Ende onder haerder hant die heyrmacht .iij. hondert duysent ende seuen duysent, ende vijfhondert, totten strijt, bequaem in die heyrcracht te helpen, den coninc tegen sijn vianden.

14

Ende Vsia beschicte voor dat gantsce heyr, schilden deegens, helmetten, pantsiers, boghen, ende steenslingheren,

15

Ende hi maecte te Ierusalem bolwerck, oft borstgheweeren constelic, die op die torens ende hoecken sijn souden, om te schieten met pijlen, ende grooten steenen, Ende sijn geruchte ghinc verre wt, Om dat hem sonderlinge geholpen wert tot dat hi machtich was.

16

Ende doen hi machtich gheworden was, so verhief hem sijn herte tot sijnder verderffenisse, Want hi ontginc hem aenden HERE sinen God, ende ghinc inden tempel des HEREN om te roocken, op den roockoutaer,

17

Maer Asaria die priester ghinc hem nae, ende .lxxx. priesters met hem, redelike lieden,

18

ende stonden teghen Vsia den coninck, ende seyden tot hem, Het en behoort v Vsia niet te roocken den HERE, mer den priesteren Aarons kinderen, dye gheheylicht sijn om te roocken, ⁺ Gaet wt den Heylichdom, want ghi ontgaet v, ende het en sal v geen eere sijn, voor God den HERE.

+ D vers 18

19

Maer Vsia wert toornich, ⁺ ende hadde een wieroocx vat in die hant. Ende doen hi teghen die priesters murmureerde, so voer die malaetscheyt wt oft lazarie aen zijn voorhooft voor die priesteren inden huyse des HEREN, voor den rueckoutaer,

+ Dat rijc van Macedonien beghint hier, ende Macedon des eersten Conincx van Meden soon was dye eerste coninc van Macedonien, wt desen rijcke is Alexander magnus gesproten ende was voor cristus gheboorte vij.c. ende lxxxv. iaer inder wereldt oude .iiij duisendt cccc. ende xiiij iaer Die propheet Micha was in deser tijt

20

ende Azaria die opperste priester keerde dat hooft tot hem, ende alle priesters, ende siet, Doen was hi lasers voor sijn voorhooft, Ende si stieten hem van daer. Hy haestede hem ooc van selfs wt te gaen, want sine plaghe was vanden HERE,

21

Also was die coninck Vsia lazarus tot aen sijn doot, ende woonde in een vry huys lazaers, Want hi was verstoten vanden huyse des HEEREN, Iotham sijn sone regeerde sijns conincx huys, ende oordeelde dat volck inden huyse.

22

Wat meer van Vsia te seggen is, beyde dat eerste ende dat laetste, heeft bescreuen Iesaia die sone Amoz Ende Vsia ontsliep met sinen vaderen, ende si begroeuen hem bi sinen vaderen inden ackere, bi die begrauenis der coninghen, Want si spraken hi is Melaetsch, Ende Iotham sijn sone wert coninc in sijn stede.