Den Bybel met groter neersticheyt ghecorrigeert (Liesveltbijbel 1542)

¶ Van sommighen oorloghen die Dauid eerlijcken ghewan.

Dat .xxi. Capittel

1

⁺ENde doen dat iaer omme was, ⁺ ter tijt als die coninghen wt trocken, voerde Ioab die heyrcracht, ende verderft der kinderen Ammon lant, ende quam ende belegerde Rabba, Mer Dauid bleef te Ierusalem, Ende Ioab sloech Rabba ende bracse.

+ A vers 1

+ ij.re. xi a

2

Ende Dauid nam die croone haers conincx van sinen hoofde, ende vant daer aen een pont goudts swaer, ende edele ghesteenten, Ende si wert Dauid op sijn hooft geset,

3

Ooc voerde hi seer veel roofs wt der stadt. Mer dat volc dat daer inne was leyde hi wt, ende deelde dese met saghen, ende yseren haken, ende beytels. Alsoo dede Dauid allen den steden der kinderen Ammon, Ende Dauid trock metten volc weder te Hierusalem.

4

⁺Daer na verhief hem eenen strijt te Gaser tegen die Philisteen. ⁺ Doen ter tijt sloech Sibechai die Husathite Sibai, die wt den kinderen Rephaim was ende vernederde hem.

+ B vers 4

+ iiij.reg. xij

5

Ende daer verhief noch eenen strijt tegen die Philisteen, Doen sloech Elhanan die soon Iair, Lahemi den broeder Goliath den Gatither, welc eenen spies staf had als eenen weefboom,

6

Noch eens wert eenen strijt te Gath, daer was een groot man die hadde ses vingeren ende ses teenen, die maken vierentwintich. Ende hi was ooc van Rapha geboren, ende beschimpte Israel,

7

mer Ionathan die sone Simea des broeders Dauid sloech hem, Dese waren geboren van Rapha te Gath, ende vielen door die handen Dauid ende zijnder knechten.