Den Bybel met groter neersticheyt ghecorrigeert (Liesveltbijbel 1542)

Naeman hooftman des conincx in Siria wort vander melaetscheyt ghereynicht. Ende Gehasi die knecht Helisei wort melaetsch

Dat .v. Capittel

1

⁺† NAeman die velthooftman des conincx tot Sirien was een deghelijck man voor sinen here ende wel gesien, want door hem ghaf die HERE salicheydt in Syrien, ende hi was een machtich man ende malaetsche.

+ A vers 1

2

Die crijschlieden in Sirien waren wtgeuallen ende hadden een cleyn deerne wech geleit, wt den lande Israel, die was inden dienst des wijfs Naemans,

3

dye sprac tot haerder vrouwen, Och of mijn heere bi den prophete tot Samaria ware, die soude hem van sijnder malaetsheyt los maken.

4

Doe ghinc Naeman in tot sinen here, ende gaft hem te kennen, ende sprack Alsoo ende also heeft die deerne wt den lande Israel gesproken

5

Die coninc tot Sirien sprac, so reyst derwaerts. Ick wil den Coninc Israel eenen brief scrijuen.

Ende hi reysde derwaerts, ende nam met hem tien ponden siluers, ⁺ ende ses dusent gulden, ende thyen viercledeeren,

+ B vers 5

6

ende bracht den brief den coninc Israel, dye luyde also Als desen brief tot v comt, siet, so weet dat ick mijnen knecht Naeman tot v hebbe gesonden, dat ghi hem sijnder malaetscheit quijt maken sout.

7

Ende doe de Coninc Israel den brief las, schoorde hi sine cleederen ende sprac, ben ic dan God, dat ic dooden ende leuende can gemaken, dat hi tot mi seynt, dat ic den man van sijnder malaetscheit soude genezen, merct ende siet hoe hi tegen mi oorsake soect.

8

Doen dat Elisa die man Gods hoorde, dat die coninc sijn cleederen gescoort hadde, seinde hi tot hem, ende liet hem seggen. Waerom hebdi uwe cleederen gescoort? laet hem tot mi comen, dat hi seker worde ouer Israel dat een propheet in Israel is

9

⁺Also quam Naeman met paerden ende wagens, ende hi hielt voor die dore aen dat huys Elisa.

+ C vers 9

10

Doen seynde Elisa een bode tot hem, ende dede hem segghen, Gaet henen, ende wascht v seuen mael in die iordaen, so sal v vleesch weder ghesont ende reyn worden.

11

Doen wert Naeman gram, ende troc wech ende sprac. Ic meynde, hi

[p. *]

soude tot mi wt comen, ende herwaerts wt treden, ende den name des HEREN sijns Gods aenroepen, ende met sijnder hant ouer die plaetse strijcken, ende die malaetscheyt also afdoen.

12

⁺En sijn die wateren Amana ende Pharphar tot Damascum niet beter, dan alle die wateren in Israel, dat ic mi daer in wiessche ende rein worde?

+ D vers 12

13

ende keerde hem, ende hi troc wech, met gramscappen. Doe maecten hen sine knechten tot hem, ende spraken met hem seggende, Vadere, waert dat v die prophete wat groots hadde geheeten, en sout ghi dat niet doen Hoe vele te meer, nv hi tot v seyt, wasscet v so wort ghi reyn.

14

Doen daelde hi af, ende doopte hem seuenwerf in die Iordane, so die man Gods gesproken hadde, ⁺ ende sijn vleesch wert weder gesont als dat vleesch van een ionc knechtken ende reyn.

+ Luc. iiij.

15

Ende hi keerde weder totten man Gods met sinen geheelen heyr, ende doen hi in quam, ghinc hi voor hem ende sprac, Siet ic weet dat geen God in allen landen en is, ⁺ dan in Israel. *

Dus neemt nv die segheninge van uwen knecht

+ E vers 15

16

Mer hi seyde Also warachtelic als de HERE leeft voor dyen ic stae ic en neemts niet. Ende hi porde hem dat hijt nemen soude, maer hi en wilde niedt.

17

Doen sprac Naeman. En mocht dan uwen knecht niet eenen last van deser aerden gegeuen worden, so vele als twee muylen dragen? Want v knecht en wilt niedt meer anderen goden offeren, ende brantoffer doen, mer den HERE,

18

dat die HERE dijnen knecht daer inne ghenadich wilt sijn, mer ic aenbede inde huyse Rimmon, als mijne here int huys Rimmon gaet, om daer aen te beden, ende hi hem aen mijn hant lenet oft stunet.

19

Hi sprac tot hem, Reyst wech met vreden.

Ende als hy van hem wech gereyst was, een velt weechs opten landen,

20

so dacht Gehasi dye knape Elisa des mans Goods, ⁺ Syet, mijn here heeft desen Sirier Naemen gespaert, dat hi niet van hem en heeft genomen dat hi gebracht heeft, so warachtelic als die HERE leeft, ic wil hem na loopen, ende wat van hem nemen.

+ F vers 20

21

Also liep Gehasi Naeman nae, ende doen Naeman sach dat hi hem na liepe, spranc hi vanden wagen hem te gemoete, ende sprac Gaet het rechte toe.

22

Hi sprac, Ia, mer mijn here heeft mi gesonden, ende doet v segghen, siet, nv sijn twee knapen wt der propheten kinderen tot mi gecomen, vanden geberchte Ephraim gheeft hen een pont siluers, ende twee viercleederen.

23

Naeman sprac, heft aen, neemt twee ponden. Ende hi dwanc hem, ende bant twee ponden siluers in twee buydelen, ende twee viercleederen, ende gaft sinen twee knapen, die droegent voor hem henen.

24

Ende doe hi quam int duyster nam hijt van haren handen, ⁺ ende leydet besiden int huys, ende liet die mannen ghaen.

+ G vers 24

25

Ende doen si wech waren, tradt hi voor sinen here, Ende Elisa sprack tot hem. Van waer comt ghi Gehasi? Hi sprack, v knecht en heeft nyeuwers geweest.

26

Hi sprac tot hem. En wandelde niet mijn herte doen die man omkeerde van sinen wagen v te gemoete? Nv hebt ghi dat siluer ende die cleederen genomen op dat ghi olijfhouen, wijnbergen, scapen, runderen, knechten, ende maerten sout coopen.

27

Maer dye malaetscheyt. Naeman sal v aenhangen, ende uwen sade inder eewicheyt. Doen ghinc hi van hem wt malaetsch als snee.