Den Bybel met groter neersticheyt ghecorrigeert (Liesveltbijbel 1542)

Die aecxe oft bijle wert int water geuonden, Die coninc van Sirien strijdt tegen Israel, Ende als sine dienaers Heliseum vangen wouden doen werden si blint, Daer quam een groote dier tijt in Samaria

Dat .vi. Capittel.

1

⁺DIe kinderen der propheten spraken tot Elisa,

+ A vers 1

2

Siet die ruymte, daer wi voor v wooonen is ons te enghe, Laet ons aen die Iordane gaen, ende elcken aldaer houten halen, dat wi ons aldaer een stede tymmeren daer wi woonen. Hi sprack, gaet henen,

3

Ende een seyde, so heft aen, ende gaet met uwen knechten, Hy sprac, Ic wil mede gaen, Ende hi ghinck met hen

4

Ende doen si aen die Iordane quamen, hieuwen si hout af.

5

Ende als deene een hout velde, oft af hieu, so viel dat ysere int water, ende hi riep ende sprac, O wee mijn here ende het is ontleent.

6

Mer die man Gods sprac, Waer isset ontuallen? ende doen hy hem dye plaetse wijsde sneet hi een houte af ende stiet derwaerts, doen swemde dat ysere.

7

Ende hi sprac. Heffet op, Doe stack hi sijn hant wt ende namt.

8

Ende die coninc tot Sirien voerde een oorloghe tegen Israel, ende hielt eenen raet met sinen knechten ende sprac tot hen. Wi willen ons daer ende daer legheren.

9

⁺Mer die man Gods seynde totten coninck Israhel, ende dede hem seggen, Wacht v, dat ghi op die plaetse niet en trect. Want die Siriers rusten aldaer

+ B vers 9

10

Dus seynde dan die coninck Israhel tot dyer plaetsen, die hem die man Gods seyde, ende hy verwaerde hem ende wachte aldaer, ende en dede dat niedt eens of tweewerf alleene

11

Doen wert dat herte des conincx te Sirien gheturbeert, om dier saken wille, ende riep sine knechten ende sprac tot hen,

12

En wildy ghi mi dan niedt te kennen geuen. ⁺ Wie is wt den onsen totten coninck Israel geulucht. Doen sprac een van sinen knechten Niet also, mijn here coninc. Mer Elisa die prophete in Israel, seyt den coninck Israhel, allet wat ghi in uwe camer spreect, ⁺ daer uwen leger is Hi sprac,

+ C vers 12

+ ij.re xxv

13

soo gaet henen, ende besiet waer hi is, dat ic seynde, ende doen hem halen. Si gauen hem te kennen, ende spraken, Siet hi is tot Dothan.

14

Doen sant hi derwaerts peerden ende wagens, ende een grote macht, Ende als si byder nacht daer quamen omleyden si die stadt

15

Ende die dienaer des mans Gods, stont vroech op dat hi hem op soude maken, ende wt trecken, ende siet, doen lach een macht om die stadt, met peerden ende wagens Doe sprac sijn knape tot hem. ⁺ O wee mijn here, hoe willen wi nv doen? Hi sprac,

+ D vers 15

16

En vreest niet, want dier is meer die bi ons sijn, dan dier, die bi hen sijn.

17

Ende Elisa badt ende sprac, HERE, opent hem die oogen dat hi sie. Doen opende die HERE den knape sijn ooghen, dat hi sach, ende siet, doen was den berch vol vierigher peerden ende waghens rontomme Elisa,

18

ende doen si tot hem af quamen, badt Elisa ende sprack HERE, ⁺ slaet dit volc met blintheyt, ende hi sloechse als doen met blintheyt, nae den woorde Elisa,

+ ij.para. xxij.b

19

ende Elisa sprac tot hen, Dit en is den wech, noch die stadt niet, volcht mi na, ic wil v leyden totten man, dyen ghy soect, ende leydese tot Samaria.

20

Ende doen si tot Samaria quamen, sprack Elisa HERE opent desen die oogen, dat si sien ende dye HERE opende hen die oogen, dat si sagen, ende siet doen waren si midden in Samaria.

21

⁺Ende doense dye coninc Israel sach, sprac hi tot Elisa, mijne vader, sal icse slaen,

+ E vers 21

22

hi sprac, ghi en sultse niet slaen, dye welcke ghi met uwen sweerde, ende met uwen boge vangt dye slaet. Sedt hem broot ende water voor, dat si eten ende drincken, ende laetse tot haren here trecken,

23

doen wert eenen grote maeltijt bereit, ende doe si geten ende gedroncken hadden, liet hijse gaen, dat si tot haren Heere trocken.

[p. *]

Sint dier tijt en quamen die crijschlieden der Siriers niet meer in dat lant Israel

24

⁺Na desen geuielt, dat Benhadad die Coninc tot Sirien alle sijn heyr vergaderde, ende troc op ende belegerde Samaria, ende het was een groote dierte tot Samaria,

+ F vers 24

25

Mer si belegerden die stadt, tot dat eenen ezels hooft acht silueren penningen gout, ende een vierendeel Kad duyuens miste, vijf silueren penningen gout,

26

Ende doen die coninc Israel totter mueren ginc, so riep hem een vijf aen,

27

ende sprac, helpt mi mijn here coninc Hi sprac. En helpt v die HERE niet waer af sal ic v helpen vander dorschuloere oft vander wijnpersen, ⁺

+ ij.re. iiij b

28

ende die coninc sprac tot haer. Wat is v? Si sprac. Dit wijf sprac tot mi, geeft uwen sone, dat wi heden hem eten Morgen willen wi mijnen sone eten

29

Dus hebben wi mijnen sone gecooct ende geten, ende ic sprac tot haer des anderen daechs geeft uwen sone ouer, ende laten ons eten, mer si heeft haren soon versteken

30

Doen die coninc die woorden des wijfs hoorde, ⁺ scoorde hi sijn cleederen in dyen, ende hi ginc in totter mueren. Doen sach allet volc, dat hi eenen sack onder aen sijn lichaem aen hadde.

+ ij.regum xvi.a

31

Ende hi sprac, God doe mi dit ende dat, waer dat hooft Elisa des soons Saphat heden op hem staen sal.

32

Elisa sat in sijn huis, ende die ouders saten bi hem. Ende hi sandt eenen man voor hem wech. Mer eer dat die bode tot hem quam, sprac hi totten Ouders, Hebt ghi gesien hoe hi dit moortkint herwaerts heeft gesonden, dat hi mijn hooft af soude slaen. Siet toe als die bode hier coemt, dat ghi die duere toe sluyt ende clemt hem metter dueren, siet, dat ruyscen zijns heren voeten volcht hem na,

33

doen hi noch also met hen sprac, siet, doen quam die bode tot hem af ende sprac, siet sulc quaet coemt vanden HERE, wat sal ic meer vanden HERE verwachten