Den Bybel met groter neersticheyt ghecorrigeert (Liesveltbijbel 1542)

Van Ioram ende Iosaphat hoe die oorloochden. Ende wat haer Helizeus seyt.

Dat .iij. Capittel.

1

⁺IOram die sone Ahab wert coninc ouer Israel tot Samaria inden achtiensten iare Iosaphat des conincx Iuda, ende regneerde twaelf iaer,

+ A vers 1

2

ende dede dat den HERE qualic beuiel, Nochtans nyet gelijc sijn vader ende sijn moeder, want hi dede die calomnen oft beelden Baals wech, die sijn vader dede maken,

3

Mer hi bleef hangen aenden sonden Ierobeam des soons Nebath, die Israel dede sondigen, ende hi en ginc daer niet af

4

Maesa die coninc der Moabiten had veel schapen, ende verchijnsde den coninc Israel wolle van hondert duysent lammeren, ende van hondert duysent rammen, Mer doen Ahab doot was,

5

doen viel der Moabiten coninc af vanden coninc Israel,

6

Doen trock dye coninc Ioram ter seluer tijt wt van Samaria, ende ordineerde of heyrscoude dat geheel Israel,

7

ende sant tot Iosaphat den coninc Iuda, ende dede hem seggen. Der Moabiten coninc is van mi geuallen, coemt met mi ten strijde, teghen die Moabiten, Hi sprac, Ic wil op comen, Ic ben gelijc ghi, ende mijn volc gelijc v volc, ende mijn peerden gelijc v peerden, Ende sprac, Door welcken wege willen wi optrecken?

8

Hi sprack, Door den wech inder woestijnen Edom.

9

⁺Also troc die coninc Israel ende de coninc Iuda ende die coninc Edom, Ende doen si seuen dachreysen om trocken, so en had dat heyr noch dat vee dat onder hen was geen water,

+ B vers 9

10

Doe sprac de coninc Israel, o wee, die HERE heeft dese drie coningen vergadert oft genoot dat hise inder Moabiten handen souden geuen,

11

Mer Iosaphat sprac, En is hier gheen propheet des HEREN, dat wi den HERE door hem raets vraechden? Doen antwoorde een onder den knechten des Conincx Israel ende sprac?

12

Hier is Elisa de sone Saphat die Elia water op die handen goot, Iosaphat sprack des HEREN woort is bi hem. Also trocken tot hem af die coninc Israel, ende Iosaphat ende die coninc Edom.

13

⁺Elisa sprac totten coninc Israël. Wat hebt ghi met mi te doen? ghaet henen totten propheten ws vaders, ende totten propheten uwer moeder. Die coninc Israhel sprac tot hem. Neen, want de HEERE heeft dese drie coningen genoot, oft vergadert, dat hise inder Moabiten handen soude geuen.

+ C vers 13

14

Elisa sprac. ⁺ Also warachtelic als die HERE Sebaoth leeft voor dien ic stae. Waert dat ic Iosaphat den coninc Iuda niet en aen sage, ic en wilde v niet aensien noch achten. So brenget mi nv eenen speelman,

+ iii.re. xviij.a. ende xviiij

15

Ende doen de speelman op dat snarenspel speelde, so quam die hant des HEREN ouer hem ende sprac.

16

So seyt die HERE, maect grachten aen dese beke, want also spreect die HERE,

17

ghy en sult gheenen wint noch regen sien, nochtans sal die beke vol waters worden, dat ghi ende v gesinne, ende uwe vee drinct,

18

daer toe is dat cleyn voor den HERE, Hi sal ooc die Moabiten in uwen handen geuen,

19

also dat ghi slaen sult alle vaste steden, ende al wtuercoren steden, ende sult alle goede bomen afhouwen, ende sult alle waterfonteynen verstoppen, ende sult allen goeden acker met steenen woest maken.

20

Smorgens alsmen spijsoffer offert, siet, doen quam een water door den wech Edom, ende veruulde dat lant met water.

21

⁺Doen die Moabiten hoorden dat dye coningen op trocken, om teghen hen te strijden riepen si te samen alle gewapende, ende haer ouerste, ende traden aen die frontieren.

+ D vers 21

22

Ende doe si hen smorgens vroech op maecten, ende die sonne op ginc op dat water, so dochte den Moabiten, dat water tegen hen root sijn als bloet,

23

ende seyden, Het is bloet. Die coningen hebben hen metten sweerde verdoruen, ende deen sal den anderen geslagen hebben. Huy Moab maect v nv totter bueten

24

Maer doen si totten leger Israhel quamen, stonden die Israeliten op, ende sloeghen die Moabiten, ende si vloden voor hen, Mer si quamen in, ende sloeghen Moab,

25

Die steden braken si, ende elck wierp sine steenen op allen goeden acker, ende veruuldense, ende verstopten alle waterfonteynen, ende hieuwen alle goede boomen af, tot dat niet dan die steenen aen dye careel mueren ouerbleuen, ende si omringdense met slingher ende sloeghense.

26

Doen der Moabiten coninck sach, dat hem den strijdt te sterck was, so nam hi seuenhondert mannen tot hem, die dat sweert wt trocken, om wt te breken teghen den coninc Edom, maer si en vermochtent nyet.

27

Doe nam hi sinen eersten soon, die in sijn plaetse coninc soude werden, ende offerde hem opter mueren tot eenen brantoffer, Doe quam een groote gramscap ouer Israel, dat si van hem aftrocken, ende keerden wederomme tot haren lande.