Den Bybel met groter neersticheyt ghecorrigeert (Liesveltbijbel 1542)

Hoe dat Elias wech voer. Ende Heliseus sinen geest ontfinck Ende hoe hi dat bitter water soet maecte.

Dat .ij. Capittel

1

⁺DOen die HERE Elia in die tempeeste inden hemel wilde halen, so ginghen Elia ende Elisa van Gilgal,

+ A vers 1

2

ende Elia seyde tot Elisa. Lieue blijft hier, Want die HERE heeft mi tot Bethel geseynt. Elisa seyde, So warachtelic als die HERE leeft, ende uwe siele, ic en verlate v niet, ende doen si af quamen tot Bethel,

3

so gingen der propheten kinderen die tot Bethel waren wt tot Elisa, ende seiden tot hem, weet ghi ooc dat die HERE uwen heere heden van uwen hoofde sal nemen? Hi sprac, ic weet ooc wel, swijcht ghi maer stille.

4

⁺Ende Elia sprac tot hem, Elisa lieue blijft hier, want die HERE heeft mi te Iericho gesonden, Hi sprac So warachtelijc als die HERE leeft, ende uwe siele ic en verlate v niet. Ende doe si tot Iericho quamen,

+ B vers 4

5

so ghinghen der propheten kinderen dye tot Iericho waren tot Elisa ende spraken tot hem, Weet ghi oock dat die HERE uwen heere huyden van uwen hoofde nemen sal? Hi sprac ic weet ooc wel, swijcht mer stil

6

Ende Elia sprac tot hem. Lieue blijft hier, want dye HERE heeft mi geseynt aen die Iordane, Hi sprac. Also warachtelic die HERE leeft, ende uwe siele, ick en verlate v niet. Ende die twee gingen tsamen,

7

maer vijftich mannen onder der propheten kinderen gingen henen, ende traden tegen ouer van verre. Maer die twee stonden aen die Iordane.

8

Doen nam Elia sinen mantele ende wont hem tsamen, ende sloech int water, welcke hem op beyde siden deelde, also dat die .ij. drooge daer door gingen,

9

Ende als si ouer quamen, sprac Elia tot Elisa, bidt wat ic v doen sal, eer ic van v genomen worde, Elisa sprack, dat uwen geest op mi si, tweemael so vele te spreken

10

Hi seide ghi hebt een swaer sake ghebeden. Nochtans ist dat ghi mi sien sult, als ic van v genomen worde, so salt also sijn, en is dat niet, so en salt niet sijn.

11

Ende doen si tsamen gingen, ende hi sprac siet, doen quam eenen vierighen wagen met vierigen peerden, ende sceyde dye .ij. van malcanderen. Ende Elia voer also inder tempeesten ten hemele

12

Elisa sacht ende riep, ⁺ Mijn vader, mijn vader voerman Israel ende sijn ruyter, ende en sach hem niet meer. ⁺

Ende hi greep sine cleederen, ende scoordense in twee stucken, ende hief op den mantel Elia, dye hem ontuallen was,

+ C vers 12

+ Ecclesi. xxxviij dit was na Abrahams doot .iii.c. ende .x. iaer als dye werelt ghestaen had iiij.m.cc ende lxxviij. iaer voor cristus geboorte ix.c. ende xl iaer

13

ende keerden om, ende ginc aenden oeuer der Iordanen,

14

ende nam den seluen mantel Elia, die hem ontuallen was, ende sloech int water ende sprack, Waer is nv dye HERE de God Elia? ende sloech int water, doen deeldet hem op beyde siden, Ende Elisa ginc door,

15

Ende doen hem der propheten kinderen sagen, die tot Iericho tegen hem ouer waren, seyden si. Den geest Elia rust op Elisa, ende gingen hem te gemoete, ende aenbaden hem ter aerden, ende spraken tot hem.

16

Siet onder v knechten zijn vijftich redelijcke mannen, die laet gaen uwen here soecken, misschien die geest des HEREN heeft hem ghenomen, ende yewaerts op eenen berch, oft yewaerts in een dal gheworpen. Hi sprac, en laet niet gaen, mer benauden hem, tot dat hi hem scaemde, ende sprac. Laet henen gaen,

17

ende si sanden vijftich mannen, ende sochten drie dagen, maer si en vonden hem niet, ende quamen weder tot hem.

18

Ende hy bleef tot Iericho, ende hi sprac tot hen. En seyde ict v niet, dat ghi niet gaen en sout?

19

Ende die mannen der stadt spraken tot Elisa, Siet, het is in deser stadt goet woonen, also mijn Here siet, mer het is quaet water, ende dat lant is onuruchtbaer,

20

Hi sprac, brengt mi hier een nyeu soutuat, ende doeter sout in, ende si brachtent hem,

21

doen ghinc hi wt totter water

[p. *]

fonteynen, ende hi wierp dat sout daer in ende sprac Dus spreect de HERE, ic heb dit water gesont gemaect Daerom en salder voort aen geen doot noch onuruchtbaerheit wt comen,

22

Also wert dat water gesont, tot desen dage toe, na dat woort dat Elisa sprac.

23

Ende hi ginc op tot Bethel, ende als hi op den wech ginc, ⁺ so quamen cleyne knechtkens ter stat wt, ende bespotten hem ende spraken tot hem. Kaelcop coemt op, kaelcop coemt op,

+ D vers 23

24

ende hi keerde hem om, Ende doen hise sach, vloecte hijse inden naem des HEREN, doen quamen twee beyren wt den wout, ende verschoorden der kinderen .xlij.

25

Van daer ginc hi opten berch Carmel, ende keerde van daer wederom tot Samaria.