Den Bybel met groter neersticheyt ghecorrigeert (Liesveltbijbel 1542)

Iosaphat ende Ahab helpen malcanderen oorlogen. De propheet Micheas waerschout haer. Ende als si hem niet geloouen so worden si ghestraft.

Dat .xxij. Capittel.

1

⁺ENde daer ghinghen drie iaren omme dat gheen oorloge en was tusschen die van Sirien ende Israel.

+ A vers 1

2

Mer inden derden iare troc Iosaphat die coninc Iuda af, totten coninc Israel,

3

ende die Coninc Israel sprac tot sinen knechten, En wetet ghi niet dat Ramoth in Gilead onse is, ende wi sitten stil, ende en nemense niet vander hant des conincx tot Sirien?

4

Ende sprac tot Iosaphat, wilt ghi met my trecken inden strijt tot Ramoth in Gilead? Iosaphat sprac totten coninc Israel, Ic wil sijn als ghi, ende mijn volc als dijn volck, ende mijn peerden als dijn peerden.

5

Ende Iosaphat sprac totten coninc Israel,

6

vraecht doch heden om dat woort des HEREN. ⁺ Doe verghaderde die coninc Israel propheten by vier hondert mannen, ende seyde tot hen. Sal ic te Ramoth in Gilead trecken om te strijden, ofte sal ict laten staen. Sy spraken, Trect op, die HERE salt in die hant des conincx geuen,

+ B vers 6

7

Iosaphat sprac, En is hier geen prophete des HEREN meer, dat wi van hem vraghen.

8

Die Coninc Israel sprac tot Iosaphat, Daer is noch een man, Micha die sone Iemla, van welcken men den HERE vragen mach. Mer ic ben op hem gram, want hi en propheteert mi geen goet, mer enckel quaet. Iosaphat sprac. De coninc en spreke also niet.

9

Doen riep die coninc Israel eenen camerlinc ende sprac. Brenget haestelic hier Micha den sone Iemla.

10

⁺Die coninc Israel ende Iosaphat die coninc Iuda, saten elc op sinen stoel gecleet met cleederen, op de plaetse voor de dore, aen die poorte Samarie, ende al de propheten propheteerden voor hen,

+ C vers 10

11

Ende Zedekia dye sone Cnaena had hem yseren hoornen gemaect, ende sprac, dus seit de HERE, hier mede suldi den Siriers stoten, tot dat ghise vernielt,

12

ende al de propheten propheteerden also ende seiden. Trect op tot Ramoth in Gilead, ende vaert geluckelic, de HERE salt inde hant des conincx geuen

[p. *]

13

Ende die bode die gegaen was om Micha te roepen, seyde tot hem, siet der propheten redenen sijn eendrachtelijc goet voor den coninc, so laet nv v woort ooc zijn, als dat woort der seluer, ende spreect goet,

14

Micha seyde. Also warachtelic als die HERE leeft, ic sal spreken so wat die HERE mi seggen sal,

15

ende doe hi totten coninc quam, sprac die coninck tot hem, Micha sullen wi tot Ramoth in Gilead trecken om te striden oft sullen wijt laten staen? Hi sprac, ia, trect op, ende vaert geluckelic, die HERE salt in dye hant des conincx geuen.

16

Die coninc sprac weder tot hem, Ic besweere v dat ghi mi anders niet en segt, dan die waerheit inden name des HEREN.

17

⁺Hi sprac, ic sach geheel Israel verstroyt opten bergen als scapen die geenen herder en hebben. Ende die HEERE sprac, en hebben desen geenen heer? Elc keer thuys met vreden,

+ D vers 17

18

Doe sprac de coninc Israel tot Iosaphat, en heb ict v niet geseit, dat hi mi niet goets en propheteert, maer enckel quaet,

19

Hy sprac, daerom hoort nv dwoort des HEREN, Ick sach den HERE sitten op sinen stoel, ende alt hemelsce heyr neffens hem staen tsijnder rechter ende slincker hant.

20

Ende de HERE sprac, Wie sal Ahab wijs maken dat hi op trecke, ende valle te Ramoth in Gilead Ende die eene seyde dit, ende die ander seyde dat.

21

Doen ginc een geest wt, ende tradt voor den HEERE, ende sprac. Ic wilt hem wijs maken,

22

Die HERE sprac tot hem. Waer mede? Hi sprack, Ic wil wtgaen ende wil eenen valschen geest sijn in alle sijnder propheten mont. Hi sprac, Ghi sullet hem wijs maken, ende bescickent gaet wt ende doet also.

23

Nv siet, die HERE heeft eenen valscen geest gegeuen in al deser uwer propheten mont, ende de HERE heeft quaet ouer v gesproken.

24

⁺Doen ginc toe Zedekia die sone Canaena, ende sloech Micha op sijn kinnebacken, ende sprac, Hoe is die geest des HEEREN van mi geweken, dat hi met v spreect.

+ E vers 24

25

Micha sprac, siet, ghi sullet sien in dien dage, als ghi van die een camer in dander gaen sult dat ghi v verberget.

26

Die coninc Israel sprac. Neemt Micha, ende laet hem blijuen bi Amon den borgemeester ende bi Ioas den soone des conincx, ende segt,

27

Dus seyt die coninc, settet desen inden kercker, ende spijset hem met broot ende water der tribulacien, tot dat ick met vreden weder come.

28

Micha sprack, Coemt ghi met vreden weder, so en heeft die HERE door mi niet gesproken. Ende hi sprac. Hoort toe alle volck.

29

⁺Also troc de coninc Israel, ende Iosaphat de coninc Iuda op tot Ramoth in Gilead,

+ F vers 29

30

ende die coninc Israel sprac tot Iosaphat, Vercleet v, ende coemt inden strijdt met uwen cleederen aengedaen, Die coninc Israel vercleede hem ooc, ende troc inden strijt,

31

Mer de coninc van Sirien geboot den ouersten ouer sine wagens der welcker .xxxij. waren ende sprac. Ghi en sult niet strijden tegen cleyne noch groote, mer tegen den coninc Israel alleene.

32

Ende doen die ouersten der wagens Iosaphat sagen, so meynden si, dat hi die coninck Israel ware, ende vielen op hem met striden, Mer Iosaphat riep,

33

Doen die ouerste der wagens sagen dat hi die Coninc Israel niet en was, so keerden si achterwaerts van hem.

34

Een man spien den boge hart, ende scoot den coninc Israel tusschen die mage ende longhe, Ende hi sprac tot sinen voerman, keert v hant, ende voert mi wt den heyr, want ic ben gewont.

35

Ende die strijt nam douerhant inden seluen daghe, ende die coninc stont opten wa-gen, teghen die van Sirien, ende sterf tsauonts, Ende dat bloet vloeyde vander wonden midden inden wagen,

36

ende men liet wtroepen int heyr, doen die sonne onderginc ende seggen, Elc gae in sijn stadt, ende in sijn lant,

37

Also sterf die coninc ende wert tot Samaria ghebracht, ende si begroeuen hem tot Samaria,

38

Ende doe si den wagen wieschen bi den poele Samarie, lecten die honden sijn bloet op, ⁺ Die hoeren wiesschen hem na den woorde des HEREN, so hi gesproken hadde.

+ G vers 38

39

Wat meer van Ahab te seggen is, ende al wat hy gedaen heeft, ende dat yuorien huys dat hi timmerde, ende alle die steden die hi getimmert heeft, siet dat is ghescreuen in die Cronike der Coninghen Israel,

40

Alsoe ontsliep Ahab met sinen vaderen, ende sijn soon Ahasia wert coninc in sijn stede.

41

Ende Iosaphat die sone Assa, wert coninck ouer Iuda inden vierden iare Ahab des conincx Israel,

42

ende was .xxv. iaer out doen hi coninc wert, ende regneerde .xxv. iaer te Ierusalem. Sijne moeder hiet Asuba, een dochter Silhi,

43

Ende wandelde in alle den weghe sijns vaders Assa, ende en weke daer niet af, ende hy dede dat den HERE wel behaechde,

44

Nochtans en dede hi die Hoochten niet wech, ende dat volck offerde noch ende wierpen noch wierooc op den Hoochten,

45

ende hadde vrede metten coninc Israel.

46

Wat meer van Iosaphat te seggen is, ende die machte die hi dede, ende hoe hi ghestreden heeft, siet, dat is gescreuen inder croniken der coningen Iuda,

47

Ooc dede hi wten lande alle ouergebleuene hoereerders, die totter tijt sijns vaders Assa waren ouergebleuen,

48

Ende daer en was gheen coninc in Edom,

49

Ende Iosaphat hadde schepen laten maken op die zee, die in Ophier gaen souden, om gout te halen, maer si en ghinghen niet, Want si werden gebroken tot EzeonGeber.

50

Doen ter tijt sprac Ahasia die sone Ahab tot Iosaphat. Laet mijne knechten met uwen knechten in dye schepen varen, mer Iosaphat en wildes niet.

51

Ende Iosaphat ontsliep met sinen vaderen, ende wert begrauen met sinen vaderen in die stadt Dauid zijns vaders, Ende Ioram sine sone wert coninc in sijn stede.

Eynde des derden boecx der Coninghen.